Pene 60

Akakite Momua Anga i to te Mesia Patireia Kaka

KUA tae maira a Iesu ki te au tuanga o Kaisarea Philipi, e te apii ra aia i te aronga tini ma tana au pipi katoa ra. Kua tuatua atura aia i teianei te akakiteanga umere kia ratou: “Tikai taku e karanga atu kia kotou nei, Kare tetai papaki o teianei aronga e tu mai nei, e rokoia e te mate, e kite ei ratou i te Tamaiti a te tangata i te aere anga mai i tona basileia.”

‘Eaa ra te aiteanga o ta Iesu tuatua?’ e tau te au pipi kia akamanako. Vaitata ki te epetoma i muri akera, kua arataki atura Iesu ia Petero, ia Iakobo, e Ioane katoa ratou i aere ei, kua aere atura ratou ki runga i tetai maunga teitei. Penei i te po, no te mea te varea moe ra nga pipi. Ia Iesu e pure ra, kua akatukeia aia ki mua ia ratou. Kaka atura tona mata mei te ra ra, teatea atura tona kakau mei te marama kaka ra.

I reira, kua mama maira nga tangata akatutuia e rua, kua akatakaia e ko “Mose raua ko Elia,” kua akamata i te tuatua mai kia Iesu no tona ‘akaruke anga te ka tupu ki Ierusalema ra.’ Te akara anga te taiku ra te reira akaruke anga i to Iesu matenga e te tuakaouanga. No reira, te akapapu maira te reira tuatua anga e kare e rauka kia akakoreia tona matenga taakaaka, mei ta Petero i umuumu ra.

Ei reira kua ara tikai, kua akara e kua akarongo nga pipi ra ma te va ua. Noatu rai e e orama te reira, i te akara anga mei te mea rai e tika tikai e kua akamata a Petero i te kapiti atu ki roto i te reira, i te na ko anga: “E te Atu, e mea meitaki kia noo tatou i ko nei: kia tika ia koe, e akatu matou i e toru are puakapa i ko nei; noou tetai, no Mose tetai, no Elia oki tetai.”

E te tuatua ra Petero, kua tapokiia maira ratou e tetai tiao marama kua tuatua maira tetai reo no roto i taua tiao ra, na ko maira: “Ko taku Tamaiti akaperepere teia, kua mareka rava au iaia; e akarongo kotou iaia.” Akarongo akera te au pipi i te reo, tipapa iora ki raro te mata. Inara kua karanga atura Iesu: “Ka tu, auraka e mataku.” Kia akara akera ratou, kare ua a ratou tangata i kitea, ko Iesu anake ua.

I tera mai ra i to ratou eke anga mai mei te maunga, kua akaue atura Iesu: “Auraka e akakite atu ki tetai tangata ta kotou i kite nei, e kia tu akaou te Tamaiti a te tangata nei mei te mate maira.” Kua akatupu te mama anga mai o Elia i te orama ra i tetai uianga ki roto i te manako o nga pipi ra. Kua ui maira ratou: “Eaa i tuatua mai ei te au tata tuatua e, ko Elia na te ka aere [mua, NW] mai?”

Kua karanga atura Iesu: “Kua riro mai anā Elia, kare ra ratou i kite iaia.” Inara, i tuatua a Iesu no Ioane Papetito, tei rave ra i te angaanga mei ta Elia rai te tu. Na Ioane i teateamamao te mataara no te Mesia, mei ta Elia i rave no Elisaia ra.

Mei teaa ra te akamaroiroi anga ta te reira orama, kia Iesu e pera katoa oki ki tana nga pipi ra! Ko te reira orama, e akakite momua anga anake ia i te kaka o to te Mesia ra Patireia. Kua kite nga pipi ra, “i te Tamaiti a te tangata i te aerenga mai i tona ra basileia,” mei ta Iesu rai i totou maira i te epetoma i mua akera. I muri mai i to Iesu matenga, kua tata a Petero no to ratou ‘riro anga ei kite mata i to te Mesia kakā ia ratou i runga i te maunga teitei ra ma ia katoa ra.’

Kua pati oki te au Pharisea kia Iesu i te akairo ei akapapu e ko ia tei totouia maira i te Tuatua Tapu ei Ariki na te Atua ra i iki. Kare ra i orongaia te akairo mei te reira kia ratou. I tetai tua, kua akatikaia ta Iesu nga pipi piri vaitata kiaia ra kia kite i to Iesu akatuke angaia ei akapapu i te au totou no te Patireia. No reira, kua tata a Petero i muri akera: “No reira tei ia tatou te tuatua totou tei akamouia ra.”​—NW. Mataio 16:​13, Mataio 16:28–​17:13; Mareko 9:​1-13; Luka 9:​27-37; 2 Petero 1:​16-19.

▪ I mua ake i te tongi anga i te mate, i akapeea te kite anga o tetai papaki i to te Mesia ra aere mai anga i tona Patireia?

▪ I roto i te orama ra, eaa ta Mose raua ko Elia i tuatua kapiti ma Iesu katoa ra?

▪ Eaa ra teia orama i riro ei ei tauturu e te akamaroiroi ki nga pipi ra?