E Raukanga Ngata Tikai Teia!

“E AKAO ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.” (Mataio 19:24) Kua tuatua a Iesu Karaiti i teia no te apii i tana au pipi i tetai apii anga. Koi patoi ua akera tetai tutara mapu apinganui i tetai pati anga kia riro mai ei pipi na Iesu e kia rauka te au mea umere i te pae vaerua e manganui. Kua iki taua tangata ra i te mou i tana au apinga e manganui i te aru atu i te Mesia.

Kare a Iesu e tuatua ra i konei e e raukanga ngata tikai no tetai tangata apinganui kia rauka te ora mutu kore i roto i te akanooanga Patireia, no te mea kua riro mai tetai au tangata apinganui ei au pipi nana. (Mataio 27:57; Luka 19:2, 9) Inara, e raukanga ngata no tetai ua atu tangata apinganui tei maata atu tona inangaro i tana au apinga i te au mea i te pae vaerua. Na roto anake ua i te kite anga i tona anoano i te pae vaerua e te kimianga i te tauturu mei te atua e raukaʼi i teia tangata te ora tei orongaia mai e te Atua.​—Mataio 5:3; 19:16-26.

Auraka e irinaki tikai i te akatutuanga o te kamera e te puta nira. Te taangaanga ra a Iesu i te tuatua akamaata no te akamarama i te tu ngata tikai o te aroanga a te au tangata apinganui tei tauta i te akamareka i te Atua koi tamou ei i tetai tu oraanga apinganui, e te puapinga.​—1 Timoteo 6:17-19.

Kua karanga etai pae e ko te puta nira e aua ngutupa meangiti te reira i roto i tetai patu oire te ka rauka i te kamera i te tomo na roto ma te ngata kore me kare ana apinga akateiaa iaia. Inara te tuatua Ereni rha·phisʹ, tei uriia e e “nira” i roto ia Mataio 19:24 e Mareko 10:25, no ko mai i tetai verepa koia te aiteanga “tuitui.” Ia Luka 18:25 te tuatua be·loʹne te akakite maira e e nira tuitui te reira, e i reira te tatau ra te New World Translation e: “Te tika, e ngoie ake, i tetai kamera kia na roto i te puta o tetai nira tuitui i tetai tangata apinganui kia tae ki roto i te patireia o te Atua.” E tukeke te aronga mana tei turu i teia tuatuaanga. Kua karanga a W. E. Vine e: “Te manako o te taangaangaanga i ‘te puta nira’ ki te au aua ngutupa meangiti e mea te reira no teia tuatau; kare e kimi anga taito no te reira.”​—An Expository Dictionary of New Testament Words.

Tetai kamera maatamaata i te tautaanga kia o na roto i te puta o tetai nira tuitui meangiti ra “e manako akamaata ia o te Itinga,” i karanga ei tetai tata anga. E ko etai pae no to ratou tu kikite kua rave ratou i te mea ngata ra, kua karanga The Babylonian Talmud e: “Kua taki ratou i tetai erepani na roto i te puta o tetai nira.” No reira kua taangaanga a Iesu i tetai tuatua akamaata e te tuke maata no te akakite tikai i tetai mea raukanga ngata. E raukanga ngata no tetai kamera, me kore no tetai erepani, i te na roto i te puta o tetai nira tuitui. Inara, ma te tauturu mei te atua, ka rauka i tetai tangata apinganui i te akaruke i tetai akara anga puapinga e kia kimi tikai i te oraanga mutu kore. Ka rauka katoa i te aronga e anoano to ratou ma te ngakau tae no te apii e te rave i te anoano o Tei Teitei Rava ko te Atua ko Iehova.