Turou Aere mai Ki te tu Oraanga Meitaki Rava Atu!
“Me ora tatou, ka ora tatou no Iehova.”—ROMA 14:8, NW.
1. Eaa ta Iesu i apii mai no runga i te tu oraanga meitaki rava atu?
INANGARO a Iehova kia rekareka tatou i tetai tu oraanga meitaki rava atu. Tukeke te au tu e akono ana te au tangata i to ratou oraanga, inara okotai ua rai tu meitaki rava atu. Te tu meitaki rava atu ka rauka ia tatou i te akono koia oki, kia aru rotai i te Tuatua a te Atua e kia apiiia mai e tana Tamaiti, ko Iesu Karaiti. Kua apii a Iesu i tana au pipi kia akamori i te Atua ma te vaerua e te tuatua mou, e kua akaue atu ia ratou kia akariro i te tangata ei pipi. (Mata. 28:19, 20; Ioa. 4:24) Na te aru rotaianga i te au ikuikuanga a Iesu, te akamareka ra tatou ia Iehova e te rekareka ra i Tana akameitakianga.
2. Akapeea te manganui i te ariu anga ki te karere o te Patireia i te anere mataiti mua, e eaa te aiteanga e e mema ratou no “Te Mataara”?
2 Me riro mai te aronga “i akonoia no te ora mutu kore” ei aronga irinaki e kua papetitoia, e tumuanga tau to tatou i te karanga atu kia ratou e, “Turou Aere Mai ki te Tu Oraanga Meitaki Rava Atu!” (Anga. 13:48) I te anere mataiti mua o to tatou Tuatau Noa, e tauatini ua atu tangata mei te pa enua tukeke kua ariki mai i te tuatua mou e kua akapapu mai ki te katoatoa i ta ratou akamorianga ki te Atua na te papetitoanga. (Anga. 2:41) E au mema taua au pipi mua ra no “Te Mataara.” (Anga. 9:2; 19:23, NW) E tau rai teia tuatua no te mea te aronga tei riro mai ei au pipi na Karaiti kua aru i tetai tu oraanga te akamou ra ki runga i te akarongo i roto ia Iesu Karaiti e te aru anga i tona akaraanga.—1 Pete. 2:21.
3. Eaa ra te iti tangata o Iehova ka papetitoia ai, e eia i papetitoia i te au ngauru mataiti i topa akenei?
3 Te tere viviki nei te angaanga akariro i te tangata ei pipi i teia tuatau openga e te raveia nei i roto i te au enua e 230. I te ngauru mataiti i topa akenei, tere atu ki te 2,700,000 tangata tei rave i te ikianga i te tavini ia Iehova e kia papetitoia na te akatutu anga i to ratou akatapuanga kiaia. Te averiti o te reira kua tere atu ki te 5,000 tangata i te au epetoma ravarai! Te ikianga kia papetitoia kua akatumuia ki runga i te inangaro i te Atua, te kite i te au Tuatua Tapu, e te irinakianga e eaa ta te reira e apii maira. E takainga puapinga te papetitoanga i roto i to tatou oraanga, e akairo te reira no te akamataanga i tetai pirianga vaitata kia Iehova. E akaarianga katoa te reira i te irinakianga papu e ka tauturu mai aia ia tatou kia tavini akarongo mou iaia, mei tana i rave i te tauturu anga i tona au tavini taito kia aaere na tona arataa.—Isa. 30:21.
Eaa ka Papetitoia Ai?
4, 5. Taiku mai i tetai au akameitakianga e te au mea puapinga no te papetitoanga.
4 Penei kua rauka ia koe te kite i te Atua, e kua rave i te au tauianga i roto i toou oraanga, e i teianei kua riro mai ei tangata kare i papetitoia. E meitaki taua tere anga ki mua. Inara, kua rave ainei koe i tetai akatapuanga ki te Atua na roto i te pure, e te inangaro ra kia papetitoia? Mei taau apiianga i te Pipiria, penei kua kite koe i teianei e ka akapaapaa ua rai koe ia Iehova i roto i toou oraanga, kare koe e akamareka ua ia koe uaorai me kore kia akamaata atu i te au apinga materia. (E tatau ia Salamo 148:11-13; Luka 12:15) No reira, eaa ra tetai au akameitakianga e te au mea puapinga no te papetitoanga?
5 Ei Kerititiano akatapuia, e akakoroanga teitei rava atu to roto i toou oraanga. Ka mataora koe no te mea te rave ra koe i te anoano o te Atua. (Roma 12:1, 2) Ka akatupu mai te vaerua tapu o Iehova ki roto ia koe te au tu o te Atua mei te au e te akarongo. (Gala. 5:22, 23) Ka pau mai te Atua i taau au pure e ka akameitaki mai i taau au tautaanga kia rotai toou oraanga ki tana Tuatua. Ka riro taau angaanga orometua ei mea mataora tikai, e te akono anga i te tu ta te Atua e mareka ra ka akaketaketaia toou manakonakoanga no te ora mutu kore. Tei maata atu, te rave anga i tetai akatapuanga e kia papetitoia te akaari maira e te inangaro tikai ra koe kia riro mai e ko tetai o te Au Kite o Iehova.—Isa. 43:10-12.
6. Te akakite ra to tatou papetitoanga i teaa?
6 Na te akatapuanga ia tatou uaorai ki te Atua e te papetitoanga, te akakite ra tatou e no Iehova tatou. “Kare rava oki tetai o tatou nei, i ora kiaia anake uaorai,” i tata ei te apotetoro ko Paulo, “me ora tatou, ka ora tatou no Iehova, e me mate tatou, ka mate tatou no Iehova. No reira me ka ora ake tatou e me ka mate ake, tei ia Iehova tatou.” (Roma 14:7, 8, NW) Te akaari maira te Atua e te akaperepere ra aia ia tatou na te oronga anga mai i te tu rangatira. Me iki tikai tatou i te aruaru i teia tu oraanga no to tatou inangaro i te Atua, te akarekareka ra tatou i tona ngakau. (Mase. 27:11) To tatou papetitoanga e akairo te reira no ta tatou akatapuanga ki te Atua e te akakiteanga ki te katoatoa e ko Iehova to tatou Tutara. Te akaari maira te reira e te turu ra tatou iaia no runga i te maroanga no te turanga ngateitei i te ao e pini ua ake. (Anga. 5:29, 32) Tei tupu mai, tei ia tatou a Iehova. (E tatau ia Salamo 118:6.) Te akaari katoa maira te papetitoanga i tetai mataara kia rauka ia tatou tetai au akameitakianga pae vaerua i teianei e no te tuatau ki mua.
Akameitakiia ma Tetai Taokotaianga Taeake Aroa
7-9. (a) Eaa te akapapu anga ta Iesu i oronga ki te aronga tei akaruke i ta ratou apinga e kua aru atu iaia? (e) Akapeea ta Iesu taputou i roto ia Mareko 10:29, 30 i te akatupuia anga?
7 Kua tuatua te apotetoro ko Petero kia Iesu e: “I na matou, kua akaruke matou i te au mea katoa, e kua aru mai ia koe; eaa te ka rauka ia matou?” (Mata. 19:27) Te inangaro ra a Petero i te kite e eaa ta te tuatau ki mua ka akatupu mai nona e no tetai atu au pipi a Iesu. E oronga pu tikai ei ia ratou uaorai no te tutuanga i te Patireia, kua rave ratou i te au akaatinga anga puapinga. (Mata. 4:18-22) Eaa te akapapu anga ta Iesu i oronga atu kia ratou?
8 Tei aiteite ki ta Mareko tataanga, kua akakite a Iesu e ka riro mai tana au pipi ei tuanga no tetai taokotaianga taeake pae vaerua. Kua tuatua aia e: “Kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki, e te kainga, noku, e no te evangelia nei, E kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.” (Mare. 10:29, 30) Ko te au Kerititiano o te anere mataiti mua, mei ia Ludia, Akuila, Peresila, e Gaio, ko ratou tetai aronga tei oronga atu i to ratou “are” e kua riro mai ei ‘au taeake, au tuaine, e te au metua vaine’ ki te au taeake irinaki, mei ta Iesu rai i taputou mai.—Anga. 16:14, 15; 18:2-4; 3 Ioa. 1, 5-8.
9 Te tupu maata nei ta Iesu i tuatua i teia tuatau. Te “kainga” ta tona au pipi i akaruke ko te au mea o te oraanga ta te manganui i akaruke puareinga ua, kapiti mai te au mitinari, te au mema o te pamiri Betela, te au tavini tamou e tetai ke, kia akamaata atu i te au anoano o te Patireia i te au enua tukeke. E maata te au taeake e te au tuaine tei akaruke i to ratou are kia akamama mai i to ratou oraanga, e te rekareka nei tatou i te akarongo no runga i to ratou tupuanga, te akaari anga mai e akapeea a Iehova i te akono anga ia ratou, e akapeea ta ratou tavini anga iaia ei mea mataora kia ratou. (Anga. 20:35) Tei maata atu, ka rekareka te au tavini papetito katoatoa o Iehova i te au akameitakianga no te ‘kimi anga i te basileia na mua, e ta te Atua tuatua-tika ra’ ei tuanga no te taokotaianga taeake Kerititiano i te ao katoa.—Mata. 6:33.
Akaruruia “i Raro Ake i te Tapoki”
10, 11. Eaa te “tapoki o Tei Teitei ra,” e akapeea e rauka ai ia tatou te reira?
10 Ka akatupu te akatapuanga e te papetitoanga i tetai akameitakianga maata—te tikaanga ngateitei i te noo “i raro ake i te tapoki o Tei Teitei ra.” (E tatau ia Salamo 91:1.) E ngai akatutu anga teia no te akaruru anga e te tinamou, e turanga no te paruruanga kia kore e akakinoia i te pae vaerua. E “tapoki” teia no te mea ko te aronga anake ua tei kite i te au mea ta te Atua e manako ra e te irinaki ra iaia ka rauka ia ratou teia tu tinamou. Na te aru rotaianga i ta tatou akatapuanga e te irinaki tikai anga ki runga ia Iehova, te karanga ra tatou kiaia e: “Ko koe toku akapuanga, e toku pinanga; taku Atua, e taku i irinaki nei.” (Sala. 91:2) Ka riro mai te Atua ko Iehova ei nooanga ora no tatou. (Sala. 91:9) E ngai akaruru ke atu ainei tetai?
11 Te rauka anga i te tomo ‘ki raro ake i te tapoki’ o Iehova, te akaari katoaia maira e kua akameitakiia tatou ma te tikaanga ngateitei no te akatupu anga i tetai pirianga vaitata kiaia. Akamata teia ki te akatapuanga e te papetitoanga. I muri mai, te akatupu ra tatou i to tatou pirianga ki te Atua, na te akavaitata atu anga kiaia na roto i te apii Pipiria, te pure ngakau tae, e te akarongoanga kiaia. (Iako. 4:8) Kare rava e tangata i piri vaitata ana kia Iehova mari ra ko Iesu anake ua, e tona irinakianga no Tei Anga ra, kare rava i ngaueue ana. (Ioa. 8:29) No reira, kare rava tatou e ekoko no runga ia Iehova me kore i tona anoano e tona tu kite i te tauturu mai ia tatou kia akatupu tatou i ta tatou tia akatapuanga. (Kohe. 5:4) Te au akanoonooanga pae vaerua ta te Atua i oronga mai no tona iti tangata te akapapu maira e te aroa maira aia ia tatou e te inangaro ra kia autu tatou i te tavini anga iaia.
Akaperepere i to Tatou Parataito Pae Vaerua
12, 13. (a) Eaa te parataito pae vaerua? (e) Akapeea e rauka ai ia tatou i te tauturu atu i te aronga ou?
12 Te akatapuanga e te papetitoanga te akaari katoa maira i te mataara no tatou kia noo ki roto i te parataito pae vaerua akameitakiia. E turanga pae vaerua takake te reira te o maira te au taeake irinaki, te noo au ra ratou ma te Atua ko Iehova e ma tetai ke. (Sala. 29:11; Isa. 54:13) Kare e rauka i te au apinga o teianei ao i te akaaiteia atu ki to tatou parataito pae vaerua. Te kite meitakiia ra teia i ko i te au uruoaanga pa enua, i te ngai e taokotai mai ana to tatou au taeake e te au tuaine mei te au pa enua, te au reo e te pupu eteniki i roto i te tu au, taokotaianga, e te aroa taeake.
13 E tuke tikai to tatou parataito pae vaerua ta tatou e rekareka nei i to te au turanga kino i teianei ao i teia tuatau. (E tatau ia Isaia 65:13, 14.) Na te akakitekite anga i te karere o te Patireia, tei ia tatou te tikaanga ngateitei i te oronga atu ki tetai ke i tetai patianga kia tomo mai ki roto i te parataito pae vaerua. E akameitakianga katoa te reira i te tauturu i tetai ke koi taokotai ua maira ki te putuputuanga e ka puapingaia mei te terenianga i roto i te angaanga orometua. I raro ake i te aratakianga a te aronga pakari, ka akameitakiia tatou ma te tikaanga ngateitei no te tauturu anga i tetai aronga ou, mei ia Akuila raua ko Peresila rai tei ‘akakite tika atu i te tuatua a te Atua’ kia Apolo.—Anga. 18:24-26.
Kia Apii ua Atu rai mei ia Iesu
14, 15. Eaa te au tumuanga tau ka rauka ia tatou kia apii ua atu rai mei ia Iesu?
14 E tumuanga tau to tatou i te apii ua atu rai mei ia Iesu. I mua ake ka riro mai ei aia ei tangata, kua akapou a Iesu e mirioni ua atu mataiti i te angaanga i te pae i tona Metua. (Mase. 8:22, 30) Kua kite aia e ko te tu oraanga meitaki rava atu ko te tavini anga i te Atua e te akakitekite anga i te tuatua mou. (Ioa. 18:37) Papu ia Iesu e ko tetai mataara ke atu o te oraanga ka riro ei mea karapii e ei mea puapinga kore ua. Kua kite aia e ka timata pakariia aia e ka tamateia. (Mata. 20:18, 19; Ebe. 4:15) Ei Akaraanga no tatou, kua apii mai aia e akapeea tatou i te vai tiratiratu anga.
15 I muri poto ua ake te papetitoia anga a Iesu, kua timata a Satani iaia kia akaruke i te tu oraanga meitaki rava atu—inara kare i puapingaia. (Mata. 4:1-11) Te apii maira teia ia tatou e noatu eaa ta Satani ka rave, ka rauka ia tatou i te akono tamou i to tatou tu tiratiratu. Penei ka timata pakari aia i te aronga te vaitata ra i te papetitoia pera katoa te aronga ou tei papetitoia. (1 Pete. 5:8) Penei ka patoi mai to tatou au mema ngutuare no te mea kua akarongo ana ratou i te au mea tarevake no runga i te Au Kite o Iehova e te manako ra e te paruru ra ratou ia tatou. Inara, te oronga maira taua au timataanga ra i te au atianga kia akaari tatou i te au tu Kerititiano memeitaki, mei te akangateiteianga e te tu tau, me pau tatou i te au uianga e te oronga anga i tetai akakiteanga. (1 Pete. 3:15) No reira ka riro teia au tupuanga ei akakeu anga papu i te aronga e akarongo maira kia tatou.—1 Timo. 4:16.
Kia Piri Atu ki te Tu Oraanga Meitaki Rava Atu!
16, 17. (a) Eaa te au umuumuanga e toru no te ora tei kiteaia i roto ia Deuteronomi 30:19, 20? (e) Akapeea a Iesu, Ioane, e Paulo i te turuturu anga i ta Mose i tata?
16 No etai 1,500 mataiti i mua ake ka aaere ei a Iesu i te enua nei, kua akamaroiroi a Mose i te ngati Iseraela kia iki i tetai tu oraanga meitaki rava atu ka rauka mai i te reira tuatau. Kua tuatua aia e: “Te kapiki nei au ki te rangi e te enua ei kite noku ia kotou i teianei rā e, kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia.” (Deu. 30:19, 20) Kare a Iseraela i vai akarongo mou ana ki te Atua, inara e toru tumu umuumuuanga no te oraanga ta Mose i akakite mai, kare i taui. Kua akakite akaouia mai te reira e Iesu e tetai ke atu.
17 Te mea mua, ‘kia inangaro tatou i to tatou Atua ra ia Iehova.’ Ka akaari tatou e te inangaro ra tatou i te Atua na te aru rotaianga i tona arataa tuatua tika. (Mata. 22:37) Te rua, ‘kia akarongo tatou ki to Iehova reo’ na te apiianga i te Tuatua a te Atua e na te akono anga i tana au akauenga. (1 Ioa. 5:3) Te umuumu maira teia kia tae putuputu tatou ki te au uipaanga Kerititiano, ki te ngai e uriuriia ra te Pipiria. (Ebe. 10:23-25) Te toru, ‘kia piri atu tatou kia Iehova.’ Noatu e eaa ta tatou ka aro atu, kia taangaanga ua rai tatou i te akarongo i roto i te Atua e kia aru i tana Tamaiti.—2 Kori. 4:16-18.
18. (a) Akapeea The Watch Tower i te akataka anga mai i te tuatua mou i te mataiti 1914? (e) Eaa to tatou manako no runga i te marama o te tuatua mou i teia tuatau?
18 E akameitakianga tikai te reira i te aru rotaianga i te tuatua mou Pipiria! I te mataiti 1914, kua neneiia teia akakiteanga puapinga i roto i te makatini The Watch Tower: “Kare ainei tatou i te au tangata tei akameitakiia, e te mataora? Kare ainei to tatou Atua i te pikikaa kore? Me te kite ra tetai tangata i tetai apinga meitaki atu, e mou aia i te reira. Me kite tetai i o kotou na i tetai apinga meitaki atu, te inangaro nei matou e kia akakite mai kotou kia matou i te reira. Kare a matou apinga meitaki ke atu i kite ana mari ra ko tei kitea uaia i roto i te Tuatua a te Atua. . . . Kare e rauka i te akamarama atu no runga i te au, te rekareka e te akameitakianga ta te kite marama anga i te Atua mou i akatupu mai ki roto i to tatou ngakau e te oraanga. Te Tua no to te Atua ra Pakari, te Tuatua Tau, te Mana e te Aroa te akamerengo ra i to tatou manako karape e te au anoano o te ngakau. Kare tatou e kimi atu ki tetai ngai ke. Kare tatou e inangaro i tetai apinga ke atu inara kia maata atu te kite no runga i to tatou Atua.” (The Watch Tower, Titema 15, 1914, kapi 377-378) To tatou ariki rekareka anga i te marama o te pae vaerua e te tuatua mou, kare e taui. E tika rai, tei ia tatou te tumuanga maata i te akapereperekavana kia “taki aere tatou na te mārama o Iehova.”—Isa. 2:5; Sala. 43:3; Mase. 4:18.
19. Eaa ra te aronga tei tau no te papetitoanga ka rave ei i taua takainga ra ma te kore e tavarevare?
19 Me ka inangaro koe i te ‘taki aere na te mārama o Iehova’ inara kare i akatapuia ake ei Kerititiano papetitoia, auraka e tavarevare. E tauta i te rave i te au umuumuanga a te Pipiria no te papetitoanga—ko te mataara anake uaia i te akaari i te rekareka no ta te Atua e ta Karaiti i rave ana no tatou. E oronga kia Iehova i taau apinga puapinga maata i te pae kopapa—ko toou oraanga. E akaari e te inangaro ra koe i te rave i to te Atua anoano na te aru anga i tana Tamaiti. (2 Kori. 5:14, 15) Kare ekokoanga, ko te tu oraanga meitaki rava atu te reira!
Akapeea Koe me Pau?
• Te akatutu maira to tatou papetitoanga i teaa?
• Eaa ra i puapinga ai te apiianga mei ia Iesu?
• Eaa te au akameitakianga ka tupu mai i te akatapuanga e te papetitoanga ki te Atua?
• Eaa te ka tauturu ia tatou kia piri atu ki te tu oraanga meitaki rava atu?
[Tutu i te kapi 25]
Te akaari maira toou papetitoanga e kua iki koe i te tu oraanga meitaki rava atu
[Au Tutu i te kapi 26]
Te akaruru ra ainei koe “i raro ake i te tapoki”?