APII 46
Eaa ka Rave ei i te Akatapuanga e Kia Papetitoia?
Ka akatapu koe ia koe uaorai kia Iehova na te taputou anga na roto i te pure e ka akamori koe iaia anake e kia rave na mua i tona anoano i toou oraanga. (Salamo 40:8) Muri mai, ka papetitoia koe. Me rave koe i teia, te akaari ra koe e kua rave koe i tetai akatapuanga. Ko te iki anga puapinga rava atu teia kia akatapu tatou ia tatou uaorai kia Iehova. Eaa te ka akakeu ia koe kia rave i teia iki anga puapinga kia taui i toou oraanga?
1. Eaa te akakeu ra i tetai kia akatapu iaia uaorai?
Na te aroa e akakeu ia tatou kia akatapu ia tatou uaorai kia Iehova. (1 Ioane 4:10, 19) Te akamaroiroi maira te Pipiria ia tatou: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareko 12:30) Ka akaari tatou e te akaperepere ra tatou i te Atua na roto i ta tatou ka tuatua e ka rave. Mei te nga tokorua tei akaperepere i tetai e tetai e kua akaipoipo, pera rai to tatou inangaro ia Iehova te ka akakeu ia tatou kia akatapu ia tatou uaorai kiaia e kia papetitoia.
2. Eaa te au akameitakianga ta Iehova ka oronga ki tona Au Kite tei papetitoia?
Me papetitoia koe, ka riro koe ei tuanga no te ngutuare mataora o Iehova. Ka kite koe i tona aroa na roto i te au ravenga tukeke, e ka piri vaitata koe kiaia. (E tatau ia Malaki 3:16-18.) Ka riro a Iehova ei Metua noou, e ka rauka tetai ngutuare pae vaerua o te au taeake e te au tuaine takapini i te ao tei akaperepere iaia e te akaperepere maira aia ia koe. (E tatau ia Mareko 10:29, 30.) E tikai, ka rave koe i tetai au takainga i mua ake ka papetito ei. Ka anoanoia koe kia apii no runga ia Iehova, kia akaperepere iaia, e kia tuku i te akarongo ki roto i tana Tamaiti. E oti ka akatapu koe i toou oraanga kia Iehova. Me rave koe i teia au takainga e kia papetitoia, ka taki atu te reira ki te oraanga mataora e tuatau ua atu. Karanga te Tuatua a te Atua: “Ko te bapetizo ïa e ora katoaʼi tatou i teianei.”—1 Petero 3:21.
KIMI OONU
Apii kia kite eaa i puapinga ai kia akatapu koe i toou oraanga kia Iehova e kia papetitoia.
3. Ka iki tatou koai ta tatou ka tavini
I Iseraela taito, kua manako tetai pae e ka rauka ia ratou i te akamori ia Iehova e te atua pikikaa ko Baala. Inara kua tono a Iehova i tana peroveta ko Elia kia akatikatika i teia manako tarevake. E tatau ia 1 Ariki 18:21, e oti uriuri i teia uianga:
Eaa ta te ngati Iseraela i rave?
Mei te ngati Iseraela rai, ka iki katoa tatou koai ta tatou ka tavini. E tatau ia Luka 16:13, e oti uriuri i teia au uianga:
Eaa te tumu kare tatou e akamori i nga mea e rua, ko Iehova e tetai ke me kore tetai apinga ke atu?
Akapeea tatou me akaari kia Iehova e kua iki tatou i te akamori iaia?
4. Akamanako oonu i to Iehova akaperepere ia koe
Kua oronga mai a Iehova i te au apinga aroa akaperepere kia tatou. Eaa ta tatou ka oronga kiaia? Akatangi i te VITIO.
Eaa te au ravenga kua akaari mai a Iehova i tona aroa noou? E tatau ia Salamo 104:14, 15 e 1 Ioane 4:9, 10, e oti uriuri i teia au uianga:
Eaa te au apinga aroa taau i āriki rekareka no ko mai ia Iehova?
Eaa toou manako i te au apinga aroa no ko mai iaia?
Me āriki tatou i tetai apinga aroa reka tikai, ka inangaro tatou i te akaari i to tatou rekareka ki tei oronga mai i te reira. E tatau ia Deuteronomi 16:17, e oti uriuri i teia uianga:
Me akamanako koe i te au mea ravarai ta Iehova i rave noou, eaa taau ka akakeuia kia oronga kiaia?
5. Akatupu te akatapu anga i te au akameitakianga
Irinaki te maata anga o te tangata e ka mataora ratou me rauka te turanga rongonui, te ngai angaanga meitaki, me kore te moni. E tika ainei teia? Akatangi i te VITIO, e oti uriuri i te au uianga ka aru mai.
Noatu kua reka te tangata tuʼe poro i tana tipoti, eaa aia i akaruke ei i te reira?
Kua inangaro aia i te akatapu iaia uaorai, kare ki te tuʼe poro, mari ra kia Iehova. I toou manako kua rave ainei aia i te iki anga tau? Eaa ra?
I mua ake ka riro mai ei te apotetoro Paulo ei Kerititiano, kua aruaru aia i tetai oraanga rongonui. Kua apii aia i te ture a te ngati Iuda mei tetai puapii rongonui. Inara kua akaruke aia i te reira kia riro mai ei Kerititiano. Kua tataraara ainei a Paulo i te reira? E tatau ia Philipi 3:8, e oti uriuri i teia au uianga:
Eaa a Paulo i karanga ai e “teita,” me kore e tita tana angaanga i rave i mua ake ka riro mai ei aia ei Kerititiano?
Eaa i reira tana i rauka mai?
Akapeea koe me akaaite i te tavini anga ia Iehova ki tetai ua atu tu oraanga?
Te riro anga mai a Paulo ei Kerititiano, e maata tana i rauka mai i tana i ngere
KARANGA TE TANGATA: “E mea tau kore kia oronga i toou oraanga ki te Atua.”
I toou manako eaa i tau ei kia akatapu koe ia koe uaorai kia Iehova?
APIIANGA
Ka akakeu te aroa ia tatou kia akatapu ia tatou uaorai kia Iehova e kia papetitoia.
Uriurianga
Eaa a Iehova i tau ei kia akamoriia e kia akaperepereia e tatou?
Akapeea a Iehova me tutaki i tona Au Kite tei papetitoia?
Ka inangaro ainei koe i te akatapu ia koe uaorai kia Iehova?
KIMI KIMI
Akara i te tumu i akatapu ei tetai vaine imene e tetai tangata tipoti ia raua uaorai kia Iehova.
Ui te au Mapu E—Eaa Taku ka Inangaro i te Rave?—Te Oraanga i Mua Ana (6:54)
Akamanako i tetai au tumu kia akatapu koe ia koe uaorai.
“Eaa ka Akatapu ei ia Koe Uaorai Kia Iehova?” (Te Punanga Tiaki, Tianuare 15, 2010)
I teia imene vitio, akara i te mataora o te aronga tei akatapu ia ratou uaorai kia Iehova.
I roto i te tua “Roa Toku Manako Anga, ‘Eaa to Tatou Akakoroanga i Konei?’” akara eaa tei akakeu i tetai vaine kia akamanako i te au mea puapinga i te oraanga.
“Taui te Pipiria i te Oraanga” (Te Punanga Tiaki, Noema 1, 2012)