Pene 110

Akaoti Anga i te Angaanga Orometua i te Iero

TE RAVE ra a Iesu i tona kitea openga anga i te iero. Ko te tika, te akaoti ra aia i tana angaanga ei orometua i te enua nei, ko te au tupu anga anake o tona timata anga e te tamate anga tei toe ra, e toru ra i muri akera i tupu ei. I reira kua rave ua atu aia i tana akaapa anga pakari i te au tata tuatua e te au Pharisea ra.

E toru atu taime i karanga akaou ei aia: “Aue kotou, e te au tata tuatua, e te au Pharisea e, e aronga pikikaa!” Te mea mua, kua tuatua atura aia i te aue no ratou no tei tama ratou “i to vao i te kapu e te mereki, kareka o roto, te ki nei ïa i te noinoi apinga, e te kaki anga tau kore.” No reira kua ako atura aia: “Akamata na i te tamā i te kapu e te mereki i roto, e kia mā katoa a vao.”

I muri akera kua akakite atura aia i te aue no te au tata tuatua e te au Pharisea no te tu pe e te viivii i roto ia ratou ta ratou e uuna ra na te akamanea anga i vao ua. “Te arite nei kotou i te tanumanga akateateaia nei,” tana ia i tuatua, “tei akaieie i vao ake, ko roto ra, kua ki ïa i te ivi turama e te au mea viivii katoa.”

I te openga, kua kitea to ratou pikikaa i to ratou akatikaanga kia patu i te au menema no te au peroveta ra e kia akamanea ei akariro i te manako o te tangata ki ta ratou uaorai angaanga e ta ratou apinga oronga ua. Inara, mei ta Iesu i akakite ra, ko “te tamariki kotou a te aronga i ta i te au peroveta ra.” E tika rai, ko te ka akakite i to ratou pikikaa te vaira i te turanga kino!

I te rave ua atu anga, kua tuatua a Iesu i etai tuatua ketaketa roa te akaapa anga. Kua na ko ra: “E te au ovi nei, e ta te vipera anaunga! Ea kotou e oraʼi i te mate i te po?” Ko Keena ko te o ia tei titiriia te au teita o Ierusalema ra ki reira. No reira te karanga ra a Iesu e no te aruaruanga i to ratou mataara kino, ka mamae te au tata tuatua e te au Pharisea i te akapouanga mutu kore ra.

No te aronga tana ka tono atu ei mono nona ra, kua karanga atu a Iesu: “Ka ta kotou i tetai papaki, e ka akasatauro; e ka pāpā oki i tetai papaki i roto i to kotou au sunago, e ka tuaru atu ki tera oire, ki tera oire. Kia uriia mai ki runga ia kotou te toto ara kore katoa i maringi i te enua nei, mei te toto mairai o Abela tuatua-tika, e tae roa ake ki te toto o Zekaria te tamaiti a Barakia [ko Iehoiada i roto ia Paraleipomeno Rua], ta kotou i ta i rotopu i te atarau e te nao ra. Koia mou taku e karanga atu kia kotou nei, E uri katoaia mai taua au mea ra ki runga i teianei uki.”

No tei ako akaapa atura a Zekaria i te au arataki o Iseraela ra, “kua kotikoti kupenga akera ratou iaia, e kua peî iora iaia ki te toka, i te akauenga a te ariki, i roto i te paepae i te are o Iehova.” Inara, mei ta Iesu i totou ra, ka tutaki ra to Iseraela no te toto tuatua tika katoa i akamaringiia ra. E 37 mataiti i muri akera kua tutaki ratou, i te 70 T.N., i te akapou angaia e te vaeau o Roma a Ierusalema e e tere atu i te tai mirioni ngati Iuda i pou.

I to Iesu akamanako anga i te reira turanga e te mataku, kua tupu te taitaia kiaia. “E Ierusalema e, e Ierusalema e,” kua akakite akaou atura aia, “manganui toku inangaro anga i te akaputuputu i to tamariki, mei te moa e akakoukou i tana anauanga i raro ake i tona peau, kare ra i tika ia kotou! I na, kua vaio taneaia to kotou nei are.”

Kua karanga katoa atura a Iesu: “Kare kotou e kite mai iaku, e tae ua atu ki te rā e tuatuaʼi kotou e, Kia ora aia, tei aere mai ma te ingoa o te Atu.” Ko taua tuatau ra ko te taenga mai ia o te Mesia i tona aerenga mai i tona Patireia i te rangi ra e ka kite te au tangata iaia na te mata o te akarongo.

Kua aere atura a Iesu ki te ngai e raukai iaia i te akara i te pia apinga i te iero ra e te aronga tini te tuku ra i ta ratou moni ki roto i taua pia ra. E maata ta te aronga apinganui i tuku ki roto. Inara kua tae maira tetai vaine takaua apinga kore e kua tuku e rua moni rikiriki e meangiti ua te puapinga.

Kua karanga atura a Iesu ki tana au pipi, e kua na ko atura: “Koia mou taku e karanga atu kia kotou na, E maata ta te vaine takaua apinga kore nei i tuku ki roto, i ta ratou ravarai i tuku ki roto i te pia apinga.” Penei kua manako ratou eaa te reira ka tikaʼi. No reira kua akataka atura a Iesu: “No roto oki i te toenga i to ratou apinga, . . . ta ratou i tuku mai ki roto; kareka aia nei, kua ope roa tona apinga rikiriki rava kore, i te tukuia e ia ki roto.” I muri ake i tana tuatua anga i te reira, kua akaruke atura a Iesu i te iero no te tuatau openga ra.

I te umereanga i te maata e te manea o te iero ra, kua tuatua atura tana au pipi kiaia: “E te Orometua, ka akara na i te tu o teianei au toka e te are i te mamaata.” E tika, ko taua au toka ra e tere atu i te 11 mita te roa, e tere atu i te 5 mita te atea, e e tere atu i te 3 mita te teitei!

“Te akara nei koe i teia au are mamaata nei?” Kua karanga atura a Iesu. “Kare rava tetai toka e vaioia ki rungao i tetai, e ope rava ïa i te uriia ki raro.”

I muri ake i te tuatuaanga i teia au mea nei, kua aere atura a Iesu e tana au apotetoro ki tetai pae i te O i Kiderona e kua kake atura ki te Maunga i Oliveta. Mei reira maira kua akara atu ratou ki raro ki te iero mekameka ra. Mataio 23:​25–​24:3; Mareko 12:​41–​13:3; Luka 21:​1-6; 2 Paraleipomeno 24:​20-22.

▪ Eaa ta Iesu i rave i tona aere openga anga ki te iero ra?

▪ Akapeea te akakite angaia te tu pikikaa o te au tata tuatua e te au Pharisea ra?

▪ Eaa te aite anga o “te mate i te po”?

▪ Eaa ra a Iesu i karangaʼi e e maata atu ta te vaine takaua ra i oronga i ta te aronga apinganui ra?