Eaa te Akakeu na ia Koe Kia Tavini i te Atua?

“E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.”​—MAREKO 12:30.

1, 2. Eaa te au apinga akamarekaanga te raveia ra i te angaanga tutu aereanga?

KARE te meitaki tikai o tetai motoka i akapapuia na tona tu akara anga anake ua. Penei ka akamaneaia tona akara anga o vao na te peni anga, e ka inangaro tetai tangata kia oko no te tu ieie; inara e mamao roa atu te puapinga te au apinga kare ra e kite uaia​—te matini tei akaoro i taua motoka ra, kapiti katoa etai atu au apinga katoa ei akatere i te reira.

² E aiteite katoa te reira ma te tavini anga Kerititiano i te Atua. Te rave maata ra te Au Kite o Iehova i te au angaanga tau i te Atua. I te au mataiti tataki tai, e tere atu i te pirioni ora te akapouia ra i te tutuanga i te tuatua meitaki o te Patireia o te Atua. Pera katoa, e au mirioni ua atu apii Puka Tapu te akonoia ra, e ko te aronga tei papetitoia ra te tae ra te numero ki te au anere ua atu tauatini. Me ko koe tetai e akakitekite aere ra i te tuatua meitaki, kua rave koe i tetai tuanga​—noatu me te akara meangiti uaia ra—​i roto i teia au papaanga marekaia. Ka papu ia koe e “kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.”​—Ebera 6:10.

3. Eaa i te pae atu i te au angaanga te tau ra ei manako anga puapinga maata ki te au Kerititiano, e no teaa ra?

³ Inara, kare na te au numero ua te vaito anga​—i te puapinga tikai o ta tatou angaanga—​kapipiti anga me kare tataki tai. Mei tei tuatuaia kia Samuela, “e akara oki te tangata ki te tu i vao ake, karekā Iehova e akara ïa i te ngakau.” (1 Samuela 16:7) Ae, ko to tatou tu o roto te mea maata ia i te Atua. E tika, e puapinga maata to te au angaanga. Te au angaanga akono i te Atua te akamanea ra i te apiianga a Iehova e te akaariu maira i te aronga tau ei au pipi. (Mataio 5:14-16; Tito 2:10; 2 Petero 3:11) Inara, kare ta tatou au angaanga e akakite mai i te tika katoa ra. E tumu to Iesu tei akatuakaouia maira no te akamanako anga i te putuputuanga i Ephesia ra​—noatu rai ta ratou au angaanga memeitaki ra. “Kua kite au i taau angaanga,” tana i tuatua kia ratou. “Te vai nei ra taku akaapa anga ia koe, i te mea kua vaoo koe i to inangaro mua ra.”​—Apokalupo 2:1-4.

4. (a) Na teea tu e riro ei ta tatou angaanga ki te Atua mei tetai peu ravenga ua ra? (e) Eaa ra i tau ei te akara matatio anga?

⁴ Te vaira tetai tu kino. I tetai tuatau roa, penei ka riro ta tatou angaanga ki te Atua mei tetai peu ravenga ua ra. Kua akataka mai tetai vaine Kerititiano i te reira na teia tu: “Ka aere au ki vao i te angaanga tutu aere, ka aere ki te au uipaanga, ka apii, ka pure​—inara kua rave au i te reira katoa na runga i te akatere anga otomatiki, kare i tetai ua atu manako ngakau.” Inara, ka tau kia akapaapaaia te au tavini o te Atua i ta ratou uapou anga ia ratou uaorai noatu rai te manako ngakau e “kua uriia ki raro” me kare kua “akaaka ra.” (2 Korinetia 4:9; 7:6) Inara, me topa ta tatou ravenga Kerititiano ki roto i tetai rua, ka tau tatou kia akara ki roto i te matini, ei akatutu ua. Noatu rai te au motoka meitaki rava ka tau ra kia putuputu te akarakara akatikatika anga; mei te reira katoa, ka tau te au Kerititiano kia rave putuputu i te akara matatio anga ia ratou uaorai. (2 Korinetia 13:5) Ka kite mai tetai ke i ta tatou au angaanga, inara kare i rauka ia ratou i te kite e eaa te akakeu ra i ta tatou au angaanga. No reira, ka tau tatou tataki tai kia manako i te uianga: ‘Eaa te akakeu ra iaku kia tavini i te Atua?’

Au Arairai Anga i te Akakeu Anga Tika

5. Eaa te akauenga ta Iesu i karanga ko te mea mua ia o te katoatoa ra?

⁵ I te ui anga kiaia ko teea o te au ture tei orongaia ki to Iseraela tei maata katoa ra, kua taiku atura Iesu i te akauenga tei akakite ra, kare i te akara anga o vao ua, mari ra i te akakeu anga o roto ra: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareko 12:28-30) Kua akataka maira Iesu eaa te mana akakeu i ta tatou tavini anga ia Iehova​—koia te aroa.

6, 7. (a) Na teea mataara kikite ta Satani rave kino anga i te ngutuare tangata, e no teaa ra? (2 Korinetia 2:11) (e) Eaa te akatupu anga ki tetai a te akono anga i tona meangiti mai anga i te manako no te mana tu-Atua?

⁶ Te anoano ra a Satani kia tapupu i to tatou kite i te tatanu i te tu puapinga o te aroa. Ei akatupu i teia, ko tetai ravenga tana i rave ana ko te takinga kino i te ngutuare tangata. No teaa ra? No te mea ko teia te ngai mua e te tamouanga maata e akapapaiaʼi to tatou au manako anga no te aroa. Te kite meitaki ra a Satani i te kaveinga Puka Tapu e ko tei apiiia i te tamariki anga ka riro ei puapinga i te pakari anga mai. (Maseli 22:6) Te tamata kikite ra aia i te akaanga ke i to tatou manako no te aroa i te tuatau te ou ra. Ei “te atua o teianei ao ra,” te kite ra a Satani i te meitaki no tana au akakoro anga me tupu ake i te maata anga ki roto i te au ngutuare kare ra i te au ngai tinamou te aroa mari ra e au ngai tamaki anga no te maru kore, te rotoriri, e te tuatua akakino.​—2 Korinetia 4:4; Ephesia 4:31, 32; 6:4, NW, tataanga i raro ake; Kolosa 3:21.

⁷ Te akakiteia maira i te puka Te Akariro Anga i Toou Oraanga Ngutuare Tangata kia Mataora te mataara akono a te metua tane i tana tuanga ei metua “ka akatupu i tetai mana ki runga i tana tamariki i muri mai i te tu akono i te mana taoonga, ta te tangata e te tu-Atua oki.”a Tetai tangata Kerititiano tei akonoia mai i raro ake i te rima teiaa o tetai metua ketaketa ra kua akatika aia: “Ko au nei, e mea ngoie ua te akarongoanga ia Iehova; ko te inangaro iaia e mea ngata atu ia.” Inara, e mea puapinga maata te akarongo, no te mea i to te Atua mata “E meitaki maata tei te akono i tei te atinga.” (1 Samuela 15:22) Inara eaa te ka tauturu ia tatou kia rave mamao atu i te akarongo ua e kia tatanu i te inangaro ia Iehova ei mana akakeuanga i ta tatou akamori anga?

“Te Riro nei oki Matou i te Aroa o te Mesia”

8, 9. Akapeea te atinga oko o Iesu i te akaoraora anga i to tatou inangaro ia Iehova?

⁸ Te akamatutu anga maata rava i te tatanuanga i te aroa ia Iehova ma te ngakau katoa ko te ariki anga ia i te atinga oko o Iesu Mesia. “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia.” (1 Ioane 4:9) Me marama tatou e te ariki i te reira, ka akakeu teia angaanga aroa i te akatupu anga i te aroa. “Te anoano nei tatou iaia, no te mea [ko Iehova] ana tei anoano mai ia tatou nei.”​—1 Ioane 4:19.

⁹ Kua ariki mareka ua a Iesu i tana angaanga i te tavini ei Akaora no te tangata nei. “Ko te mea teia i kite ei tatou i te aroa, ko te Mesia i oronga i tona uaorai ora no tatou.” (1 Ioane 3:16; Ioane 15:13) Ka tau to Iesu aroa tuku atinga iaia uaorai kia akakeu i tetai manako ariki anga i roto ia tatou. Ei akatutu anga: Me i akaoraia mai koe i te maremoanga. Ka rauka ua ainei ia koe i te aere ki te kainga, ka tamaro ia koe, e ka akangaropoina atu i te reira? Kare rava ia! Ka manako ngakau kaiou koe ki te tangata tei akaora maira ia koe. No te mea, te kaiou ra koe ki te reira tangata no toou oraanga. Te meangiti maira ainei ta tatou kaiou ki te Atua ko Iehova raua ko Iesu Karaiti? Naringa kare te oko, ka maremo akatutu anga tatou tataki tai, ki roto i te ara e te mate. Kareka ra, no teia angaanga aroa maata, tei ia tatou te manakonako anga no te oraanga mutu kore ki runga i te enua parataito.​—Roma 5:12, 18; 1 Petero 2:24.

10. (a) Akapeea tatou i te akariro anga i te oko ei apinga no tatou uaorai? (e) Akapeea tatou i akakeuiaʼi e te aroa o te Mesia ra?

¹⁰ E tamanako marie i te oko. E rave i te reira noou uaorai, mei ia Paulo rai: “Toku nei ora anga i roto i te kopapa nei, te ora nei au i te akarongo i te Tamaiti a te Atua, ko tei aroa mai iaku, e kua oronga mai iaia uaorai noku.” (Galatia 2:20) Taua tamanako anga ra ka akatupu i te akakeu anga ngakau, no te mea kua tata a Paulo ki to Korinetia: “Te riro nei oki matou i te aroa o te Mesia ra, no te mea . . . i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.” (2 Korinetia 5:14, 15) Te karanga ra The Jerusalem Bible e te aroa o Karaiti “te tapoki takiri ra ia tatou.” Me akamanako ana tatou i te aroa o Karaiti, te oparaia ra tatou, te akakeu oonuia ra, e te tapoki takiriia ra. Te tuki maira i to tatou ngakau e te akakeu ra ia tatou kia angaanga. Mei ta J. B. Phillips uri anga i akataka maira i te reira, “te puipui anga tikai o ta tatou au angaanga ko te aroa ia o Karaiti.” Tetai ua atu tu akakeu anga kare e akatupu mai i te uua anga tamouia ki roto ia tatou, mei te akaariia maira e te akatauanga a te au Pharisea ra.

“E Matakite oki i te Akaopue a te Au Pharisea”

11. E akataka mai i te tu manako o te au Pharisea i te au angaanga akonoanga ra.

¹¹ Kua apai ke atura te au Pharisea i te oraanga katoa ki vao o te akamori anga i te Atua ra. Kare i akamaroiroi i te aroa no te Atua, kua akaketaketa ratou i te au angaanga ei rakau vaitoanga no te tu i te pae vaerua. Na to ratou rave i te au ture rikiriki ra i akariro kia akara anga tuatua tika ratou i vao ua, inara ko roto ia ratou “kua ki ïa i te ivi turuma e te au mea viivii katoa.”​—Mataio 23:27.

12. I muri ake i ta Iesu rapakau anga i te tangata ra, i akapeea te au Pharisea i te akaari anga i te marokiakiaanga to ratou ngakau?

¹² I tetai atianga kua rapakau aroa atu a Iesu i tetai tangata kua maro te rima. Mei teaa ra te mataora o taua tangata ra i te kite anga i te rapakau vivikianga te reira maki kare ra e ekoko anga e kua akatupu kia maata te manamanata i te pae kopapa e te manako ngakau katoa! Inara, kare te au Pharisea i rekareka ma ia katoa ra. Kareka ra, kua akaapa ua ratou no tetai tumu i kite ua​—e i rave ana a Iesu i te rapakau anga i te Tapati. I te manako maata anga i ta ratou tumu kite i te ture, kua ngaro takiri i te au Pharisea te vaerua o te Ture. No reira rai a Iesu i “kinokino ra i te mārokiakiaanga o to ratou ngakau”! (Mareko 3:1-5) Pera katoa oki, kua akamatakite atura aia i tana au pipi: “E matakite oki i te akaopue a te au Pharisea.” (Mataio 16:6) Te akakite puia maira ta ratou au angaanga e te au tu manako e te Puka Tapu ei puapinga no tatou.

13. Eaa te apiianga no tatou i te akatauanga a te au Pharisea ra?

¹³ Te apii maira te akaraanga a te au Pharisea ia tatou e ka tau tatou kia manako meitaki i te au angaanga ra. E tika, e puapinga maata to te au angaanga, no te mea “te akarongo kare e angaanga ra, e mea mate katoa ia.” (Iakobo 2:26) Inara, ko te tu ia o te au tangata apa ua nei i te akaapa ia etai ke ra i ta ratou i rave ana kare i to ratou tu tikai. I etai tuatau, penei te akaapa ua ra tatou ia tatou uaorai na teia mataara. Penei ka riro tatou kia manako maata i te angaanga, mei te mea rai ko teia te tumu maata o to tatou tu i te pae vaerua. Penei ka ngaropoina ia tatou te puapinga maata o te akara matatioanga i to tatou manako. (Akaaite ia 2 Korinetia 5:12.) Penei ka riro tatou ei aronga ketaketa te aru i te au ture tei “tamauku nei i te namu, e te apuku ua nei i te kamela,” te raveanga i te tuatua a te ture mari ra te akakore ra i tona akakoro anga.​—Mataio 23:24.

14. Akapeea te au Pharisea i aite ei ki te kapu viivii ra me kare mereki viivii?

¹⁴ Kare te au Pharisea i kite e me te inangaro mou ra te tangata ia Iehova, ka aru ua mai te au angaanga tau i te Atua ra. Ka tae mai te au tu vaerua mei roto ki vao. Kua akaapa maroiroi a Iesu i te au Pharisea no te tarevake to ratou manakoanga i teia tu, i te na ko anga: “Aue kotou, e te au tata tuatua, e te au Pharisea e, e aronga pikikaa! te tamā nei kotou i to vao i te kapu e te mereki, kareka o roto, te ki nei ïa i te noinoi apinga, e te kaki anga kore. E te Pharisea matapo e! e akamata na i te tamā i te kapu e te mereki i roto, e kia mā katoa a vao.”​—Mataio 23:25, 26.

15. E akakite mai i etai akaraanga te akaari maira e te akara ra a Iesu kia mamao atu i to vao ua.

¹⁵ Te akara anga i vao o te kapu, te mereki, me kare tetai are te akakite ua maira i tetai tuanga ua. Kua va ua ta Iesu au pipi i te manea o te iero i Ierusalema ra, ta Iesu i karanga ra “e ana no te aronga keia ra” no te au apinga tei raveia i roto ra. (Mareko 11:17; 13:1) Tei tika no te iero ra te tika katoa ra no te au mirioni ua atu o te aronga te manako ra e Kerititiano ratou, mei tei akaariia maira e te rave anga a Kerititome. Kua karanga a Iesu e ka akava aia i tetai papaki o te aronga tei “rave i te au akairo” i tona ingoa ra ei “aronga rave tuatua kino.” (Mataio 7:22, 23) Ei tuke anga maata, kua tuatua aia no tetai vaine takaua tei oronga ra i te moni meangiti ua i te iero ra: “E maata ta te vaine takaua apinga kore nei i tuku ki roto, i ta ratou ravarai i tuku ki roto i te pia apinga . . . Aia nei, kua ope roa tona apinga rikiriki rava kore, i te tukuia e ia ki roto.” (Mareko 12:41-44) Au akavaanga tau kore? Kare rava ia. I nga turanga e rua ra, kua akaata maira Iesu i to Iehova manako. (Ioane 8:16) Kua kite aia i te au manako no te au angaanga ra e kua akava aia kia tau ki te reira.

“Tei Tau ra ki Tona Uaorai Kite”

16. Eaa i kore ei tatou e tau kia akaaiteite atu i ta tatou angaanga ki ta tetai Kerititiano ke ra?

¹⁶ Me te tika ra to tatou au manako, kare e tau kia rave putuputuia te au akaaiteite anga. Ei akatauanga, e meangiti ua te meitaki te ka rauka mai na te taemoemo i te tautaanga i te akapou atu te au ora i te angaanga orometua ta tetai Kerititiano e rave ra me kare kia akaaite atu i tana i rave ana i te tutu aereanga. I karanga a Iesu e anoano atu koe ia Iehova ma to ngakau katoa, to manako, to meta, e to ririnui​—kare no tetai ke ra. Te kite o te tangata tataki tai, te maroiroi, e te au turanga e tuke tuke. Me ka tika i toou turanga, ka akakeu te anoano ia koe kia maata te taime i te angaanga orometua​—penei ei orometua painia i te au tuatau katoa. Inara, me te akakoromaki ra koe i te maki, penei ka meangiti mai te taime taau ka akapou i te angaanga orometua i taau i anoano. Auraka e mareka kore. Kare te tiratiratu ki te Atua e vaitoia i te au ora. Na te ma o te au manako, e tumu ia noou kia rekareka. Kua tata a Paulo: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”​—Galatia 6:4.

17. I roto i taau uaorai au tuatua, e akakite tapoto mai i te parapore o te au tareni ra.

¹⁷ E akamanako ana i ta Iesu parapore no te au tareni ra, tei tataia ia Mataio 25:14-30. E tangata tetai tei akapapa ra e aere ki tetai enua mamao e kua karanga ki tona aronga tavini kua tuku atura i tana apinga kia ratou. “Tuku atura i ta tetai e rima taleni, e rua ta tetai, okotai ua ta tetai; i tei tau katoa i aua nga tangata ra.” E oki maira te pu e akatikatika i te tuatua anga ia ratou te aronga tavini ra nona, eaa tana i kite? Te tavini tei orongaia ra e rima tareni nana kua taoi katoa maira i nga tareni ke e rima. Mei te reira katoa, te tavini tei orongaia ra e rua tareni nana kua taoi katoa maira i nga tareni ke e rua. Te tavini tei orongaia ra e tai tareni nana kua tanu atu i te reira ki raro i te one e kare ana apinga i rave ei akatere atu i te apinga a tona pu. Eaa ta te pu akataka anga i taua turanga ra?

18, 19. (a) Eaa ra te pu i kore ei e akaaiteite i te tavini i orongaia ra e rua tareni ma te tavini i orongaia ra e rima tareni? (e) Eaa ta te parapore o te au tareni e apii maira ia tatou no te akapaapaa anga e te au akaaite anga? (ng) Eaa ra te toru o te tavini ra i akaapaiaʼi?

¹⁸ Te mea mua, e akamanako tatou i nga tavini tei orongaia atura nga tareni e rima ki tetai e nga tareni e rua ki tetai. Ki aua nga tavini tataki tai ra, kua na ko atura te pu e: “Kua tika rava, e teianei tavini meitaki e te pikikaa kore.” Ka tuatua atu ainei koe i teia ki te tavini e rima ra ana tareni me e rua ua tana nga tareni i rauka mai? Kare paa! I tetai tua, kare aia i tuatua atu ki te tavini tei rauka maira iaia e rua tareni e: ‘Eaa i kore ei i rauka mai ia koe kia rima? I na, toou taeake tavini e maata tana i rauka mai naku!’ Kare, taua pu aroa ua ra, tei akatutu maira ia Iesu, kare i akaaiteite atu i tetai e tetai. Kua oronga atu aia i nga tareni “tei tau ra ki tona uaorai kite,” e kare aia i manako kia tere atu i tei orongaia maira e raua tataki tai. E aiteite te akapaapaa anga i aua nga tavini ra, no te mea i angaanga raua ma te meta katoa na to raua pu. Ka rauka ia tatou pouroa te apii mei teia nei.

¹⁹ Inara, kare te toru o te tavini i akapaapaaia. Ko te tika, kua uriia atu aia ki roto i te poiri i vao ra. I te rauka anga e tai ua tareni iaia, kare aia i manakoia kia taoi mai kia aite atu mei ta te tavini e rima ana tareni. Inara, kare ua aia i tauta ana! Ko tona akavaanga kino i te openga ra no tona ‘kino e te akatau’ te ngakau, tei akakite maira i te ngere i te inangaro no te pu.

20. Akapeea ta Iehova ra manako anga i to tatou au tu kotingaia?

²⁰ Te manako maira a Iehova ia tatou tataki tai kia anoano atu iaia ma to tatou ririnui katoa, inara mei teaa te akapumaanaanga ngakau i te kite anga e “kua kite oki aia i to tatou tu; te manako ra aia e, e one tatou nei”! (Salamo 103:14) Te tuatua ra a Maseli 21:2 e “te kimi matatio rā Iehova i te ngakau”​—kare i te au papa anga tuatua. Te kite ra aia i etai ua atu au kotinga kare ra a tatou akatere anga ki rungao, me no te pae i te moni, te kopapa, te manako ngakau, me kare tetai atu apinga ra. (Isaia 63:9) I te reira taime katoa, te manakonako maira aia ia tatou kia taangaanga maata tatou i ta tatou au apinga katoa ia tatou nei. E apa kore ua a Iehova, inara me te akono ra aia i tona aronga akamori apa ua ra, kare aia e manako mai ana kia apa kore ua ratou. Kare aia i te tau kore i tana au akonoanga kare katoa i te tika kore i tana au manakonako anga.

21. Me na te anoano i akakeu i ta tatou angaanga ki te Atua ra, eaa te au tupu anga meitaki te ka aru mai?

²¹ Te anoanoanga ia Iehova ma to tatou ngakau katoa, te meta katoa, te manako katoa, e te ririnui katoa e “maata ïa i te au atinga karakaratio katoa ra, e te au atinga kai oki.” (Mareko 12:33) Me na te anoano i akakeu ia tatou, ei reira tatou e rave ei i tei maata katoa te ka rauka ia tatou i te angaanga a te Atua ra. Kua tata a Petero e me e au tu tau i te Atua, kapiti katoa te aroa, “e tei ia kotou te reira au mea, e te maata ra, na te reira e akakite e, kare kotou i te akatau e te uua kore i te kite i to tatou Atu ia Iesu Mesia ra.”​—2 Petero 1:8.

[Au Tataanga Rikiriki i Raro]

Te Akara Akaou Anga

◻ Eaa te mana tau ei akakeu i ta tatou angaanga ki te Atua?

◻ Akapeea te inangaro ia Karaiti i te akakeu anga ia tatou kia tavini ia Iehova ra?

◻ Eaa te au ravenga a te au Pharisea te tau ra tatou kia kopae ke atu?

◻ Eaa ra i pakari kore ei kia akaaiteite atu i ta tatou angaanga ki ta tetai ua atu Kerititiano ra?

[Au Tutu i te kapi 16]

Te au tu kite, te maroiroi, e te au turanga o te au tangata tataki tai te tuke tuke ra