Pene 121

I Mua i te Sunederi, E Aere Atu ei kia Pilato

TE AERE atura te po ki tona openga. E toru taime to Petero uuna anga ia Iesu, e kua oti te timata e te aviri anga a te au mema o te Sunederi e kua aere ke atu. Inara, te vaitata maira te maiata i te popongi Varaire kua akaputuputu akaou maira ratou ki to ratou are uipa anga Sunederi i teia taime. Ko to ratou akakoroanga kia akakite i te akaraanga e kia tau i te ture e te timata anga i taua po ra. I te rave anga mai ia Iesu ki mua ia ratou, kua tuatua atura ratou, mei ta ratou i tuatua i te po ra: “Ko te Mesia ainei koe? ka akakite mai kia matou.”

Kua na ko atura aia: “Akakite ua atu rai au kia kotou, kare rai kotou e akarongo.” “E kia ui katoa atu au kia kotou, kare ïa kotou e tuatua mai.” Inara, kua akakite mataku kore atura a Iesu i te akatakaanga iaia, i te na ko anga: “Teia ra ka noo taua Tamaiti a te tangata nei i te rima katau o te mana ra o te Atua.”

“Ko te Tamaiti mari koe a te Atua?” te anoano ra ratou katoatoa kia kite.

“Ko ta kotou i tuatua mai na, ko au tikai oki teia,” ta Iesu i pau atu.

No teia aronga i manako e kia ta, kua rava teia pauanga. Kua akamanako ratou e akakino te reira. “Eaa atu rai to tatou kite?” ta ratou i ui. “Tei kite ua akenei tatou i roto i tona uaorai vaa.” E kua tapeka iora ratou ia Iesu, e arataki ke atura, e kua tuku atura iaia ki te kavana o Roma kia Ponotio Pilato.

No te akara mai a Iuda, tei pikikaa ia Iesu ra i taua au ravenga ra. I tona kite anga e kua akaapaia a Iesu kia tamateia, kua mii aia. No reira kua aere atura aia ki te kau taunga nunui e te aronga pakari ra i te akaoki atu i te 30 moni ario, ma te akatakaanga: “Kua ara au, ko au i pikikaa atu i te tangata ara kore nei.”

“Eaa ua ta matou i tena? tei ia koe uaorai ïa!” ta ratou i pau ngakau kore atura. Kua titiri iora a Iuda i te au moni ario ki roto i te iero e kua aere atura e tamata i te tari iaia uaorai. Inara, i te akara anga kua ati te manga rakau ta Iuda i tapeka i te taura, e kua topa iora tona kopapa ki runga i te au toka i raro, e kua ngaa atura ia.

Kare i papu te manako o te kau taunga nunui eaa ta ratou ka rave i taua au moni ario. “Kare e tika i te ture kia tuku ki roto i te putunga moni tapu nei,” ta ratou ia i tuatua, “e oko toto teia.” I muri ake i ta ratou uriurianga kapipiti, kua oko ratou i te kainga no te potera ei tanumanga no te tangata ke ke. E tapaia iora te reira koro “E Kainga Toto.”

I te popongi roa a Iesu i takiia atu ei ki te are o te kavana. Inara ko te au ngati Iuda tei aere kapiti atura ma ia katoa kare i akatikaia kia tomo atu ratou ki roto no to ratou manako e ka viivii ratou kia piri atu ma te au Etene. No reira ei akono i ta ratou tuanga, kua aere maira a Pilato ki vao. Kua ui atura aia: “I akaapa ana kotou i teianei tangata i te aa?”

“Naringa aia kare i te tangata ara, kare matou e tuku atu iaia kia koe na,” ko ta ratou ia i pau atu.

No te kore i anoano kia o atu aia i te reira, kua tuatua maira a Pilato: “Ka rave mari kotou, ka akava atu iaia, i ta kotou ture.”

I te akakiteanga i to ratou manako e ta iaia, kua karanga te ngati Iuda: “Kare e tau i te ture kia ta matou i te tangata.” E tika oki, kia ta ratou ia Iesu i te tuatau o te Oroa Pasa ra, ka riro ia ei pekapeka maata no te au tangata katoa ra, no te mea e manganui tei manako akateitei ia Iesu. Inara me ka rauka ia ratou te tuku e na to Roma e tamate iaia no te akaapa anga a te poritiki, ka riro te reira ei akaatea mai ia ratou i te reira apainga i mua i te au tangata katoa.

No reira kua akamata maira te au arataki o te akonoanga atua i te au akaapa anga tuke tuke, eiaa etai timata anga i mua akera i taikuiaʼi i ta ratou akaapa anga ia Iesu no te tuatua akakino. Kua rave maira ratou i te akaapa anga e toru tuanga: “Kua kite akenei matou i teianei tangata [1] i te taruri ke anga i teianei enua, e [2] te akakore anga i te tautaūnga na Kaisara, i te [3] tuatua anga iaia uaorai e, ko te Ariki ra aia, ko te Mesia.”

Na te akaapa anga e te karanga ra a Iesu e ariki aia te ka tamanata ia Pilato. Kua oki akaou atura aia ki roto i te are ariki, kua karanga atura ia Iesu kiaia, kua na ko atura: “Ko te Ariki ainei koe o te ngati Iuda?” Mei tera te tu, kua aati ainei koe i te ture i te tuatuaanga ia koe uaorai e ariki ei patoi ia Kaisara?

Kua anoano a Iesu kia kite aia eaa te maata o ta Pilato i akarongo ana nona, no reira kua ui atura aia: “Naau uaorai aina tenana tuatua, e na tetai ke ainei koe i akapera mai iaku”?

Kua akakite maira a Pilato i tona kite kore iaia e te anoano ra kia kite i te au tika. Kua karanga atura a Pilato: “E ngati Iuda ainei au? Na toou uaorai enua, e na te kau taunga nunui ra, i tuku mai koe kiaku nei: i aa na koe?”

Kare a Iesu i tapae ke i taua maroanga, koia oki no te ariki anga. Kare e ekoko anga e kua poitirere a Pilato i ta Iesu pauanga i teianei. Luka 22:​66–​23:3; Mataio 27:​1-11; Mareko 15:1; Ioane 18:​28-35; Angaanga 1:​16-20.

▪ Eaa te akakoroanga i akaputu akaou ei te Sunederi i te popongi?

▪ I akapeea to Iuda mate anga, e eaa tei raveia i te 30 moni ario?

▪ Eaa to te ngati Iuda ra anoano e na to Roma e ta ia Iesu, kare e na ratou uaorai e ta iaia?

▪ Eaa te au akaapa anga ia Iesu a te ngati Iuda?