Pene 122

Mei ia Pilato atu kia Heroda e Oki Akaou Mai

NOATU rai e kare a Iesu i uuna e e ariki aia, mei a Pilato kua akataka atura aia e kare tona Patireia i te apinga ei mataku anga na to Roma. “Kare to teianei ao taku basileia,” ta Iesu i tuatua atura kia Pilato. “Naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” Kua akatika ra a Iesu e toru taime e e Patireia tona, noatu rai e kare ia e no te enua nei.

Inara, kua raurau akaou atura a Pilato iaia: “Ko te ariki mari koe?” Koia oki, e ariki aina koe noatu rai e kare toou Patireia i to teianei ao?

Kua akakite atura a Iesu kia Pilato e e tika tana i manako ra, i te na ko anga: “Te tuatua mai na koe e e ariki au. I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.”

Ae, ko to Iesu akakoroanga tikai i te enua nei ei akakite i “te tuatua-mou,” kia taka meitaki te tuatua mou no tona Patireia. Kua papa a Iesu no te tiratiratu ki te reira tuatua mou noatu me ka tutaki aia ki tona uaorai oraanga. Noatu rai e kua ui atura a Pilato: “Eaa te tuatua-mou?” kare aia i tatari mai no tetai akamarama anga. Kua rava tana i akarongo ana no te tuku anga tika.

Kua oki atura a Pilato ki te aronga tini te tatari maira i vao i te are ariki. E mea papu e kua tuatua atura aia ki te kau taunga nunui ma te aronga katoa ia ratou ra, e ko Iesu i te pae iaia kua na ko atura: “Kare ua o taua tangata ra kino i kitea e au.”

No te riri i taua tuku anga tika ra, kua akamata taua urupu tangata ra i te maro e: “Te taoriori nei aia i te tangata i te tuatua tana e apii i Iudea katoa, mei Galilea mai, e tae rava mai nei i teianei ngai.”

Penei kua poitirere tikai a Pilato i te tu manako tau kore o te ngati Iuda ra. No reira i te kapikipiki maata anga te kau taunga nunui ra e te aronga pakari katoa ra, kua ariu atura a Pilato kia Iesu e kua ui atura: “Kare koe i akarongo i te au mea e manganui ta ratou i tapepe mai ia koe nei?” Inara kare ua ra a Iesu i ki atu i taua tuatua ra. Kua umere tikai a Pilato i tona tu maru ki mua i taua au akaapa anga kikino rava ra.

I te kiteanga e no Galilea a Iesu, kua kite a Pilato i tetai mataara kia kore ei e riro nana te apainga. Ko Heroda Anitipa te tutara o Galilea (e tamaiti ia na Heroda Maata ra), i Ierusalema aia no te Pasa, e kua tono atura a Pilato ia Iesu kiaia. I mua akera, kua tipuia e Heroda Anitipa te upoko o Ioane Papetito, e kua mataku a Heroda i tona rongo anga i te au angaanga semeio ta Iesu i rave ra, kua mataku e penei a Iesu ko Ioane tikai ia tei akatuia mei te mate maira.

Inara, kua rekareka maata a Heroda i te manakonako anga no te kiteanga ia Iesu. Kare te reira e no tona manako no te meitaki no Iesu me kare no tona inangaro kia tauta kia kite me e tika te au akaapa anga iaia ra e me kare ainei. Kareka, te kimi ua ra tona manako e te manakonako ra kia kite ia Iesu i te rave anga i te semeio.

Inara, kare a Iesu i akatika kia akamerengo i to Heroda inangaro. Ko te tika, i ta Heroda ra uiui anga iaia, kare rava aia i ki atu i tetai tuatua. No tona reka kore, kua akariro atura a Heroda ia Iesu ei apinga kanga nana e tona vaeau ra. Kua akakakau atura iaia ma tetai kakau kanapanapa e kua aviri atura iaia. Ei reira kua tono akaouia atura aia kia Pilato. Ko tei tupu, ko Heroda raua ko Pilato, e nga enemi raua i mua ana, kua riro mai ei oa meitaki i reira.

I to Iesu oki mai anga, kua karanga atura a Pilato i te kau taunga nunui, te ngati Iuda mana ra, e te tangata tini katoa kia akaputuputu mai e kua na ko atura: “I arataki mai ana kotou i teianei tangata kiaku nei, mei te mea e, i taruri keia te enua e ia: e i na, i kimi io nei oki au iaia i mua i to kotou aroaro, e kare rava ana e ara i kitea e au, i te au mea katoa ta kotou e tapepe iaia nei: E kare katoa oki i kitea e Heroda; [e nana i akaoki mai iaia kia tatou, NW]; e i na, kare rava ana ara i rave e tau ei iaia te mate. E teianei e pāpā au iaia, ka tuku ua atu ei.”

E no reira, ko te rua ia o ta Pilato akakite anga e ara kore a Iesu. Kua manako pakari aia e tuku ua iaia, no te mea kua kite aia e no te vareae o te kau taunga i arataki mai ei iaia. Inara i to Pilato tauta anga kia tuku ua ia Iesu ra, kua rauka maira tetai akakeu anga maroiroi kiaia kia rave pera. Iaia i runga i tona nooanga o te akavaanga, kua tuku maira tana vaine i te karere, ma te raurauanga iaia: “Auraka koe e rave atu i tenana tangata ara kore: e tumatetenga maata toku i te moemoea ioia i nakonei [nona, penei na te Atua maira].”

Inara, akapeea a Pilato i te tuku ua anga i teia tangata ara kore, mei tana i kite akera e ka tau aia kia akapera? Ioane 18:​36-38; Luka 23:​4-16; Mataio 27:​12-14, 18, 19; 14:​1, 2; Mareko 15:2-5.

▪ Akapeea a Iesu i te pau anga i te uianga no tona ariki anga?

▪ Eaa “te tuatua-mou” ta Iesu i akapou ra i tona oraanga i te enua nei i te akakitekite anga?

▪ Eaa ta Pilato akavaanga, akapeea te akono anga a te aronga tini ra, e eaa ta Pilato i rave kia Iesu ra?

▪ Koai a Heroda Anitipa ra, eaa aia i rekareka maataʼi i te aravei anga ia Iesu, e eaa tana i rave kiaia ra?

▪ Eaa a Pilato i manako pakari ei kia tuku ua ia Iesu kia aere?