To Iesu Oraanga e te Angaanga Orometua

Tuku Atu Anga e te Arataki Atu Anga

I TO Pilato kite anga i te tu maru e te tapunui o Iesu tei tamamaeia ra, kua tauta akaou kia tuku iaia, kua tere roa atu te riri o te kau taunga nunui i reira. Kua maro ua atura ratou i ta ratou akakoroanga kino kia kore e apinga ei arairai. No reira kua rave akaou i ta ratou kapikipikianga: “Ka patiti atu iaia! Ka patiti atu iaia!”​—NW.

“Na kotou uaorai e rave e patiti atu iaia,” (NW) ta Pilato ia i karanga atu ma te rikarika. E tuke i ta ratou i karanga i mua akera, e mana to te ngati Iuda i te tamate i te aronga rave kino no te au apa teiaa i te akonoanga atua ra. E no reira, kua tae ki te rima o te taime, kua akakite atura Pilato e e ara kore a Iesu, i te na ko anga: “Kare oki au i kite i tona kino.”

I te kiteanga te ngati Iuda e kare i puapingaia ta ratou akaapa anga i te pae poritiki, kua taiku akaou i ta ratou akaapa anga i te pae o te akonoanga atua no te tuatua akakino i te Atua ta ratou i tuatua i nga ora i mua akera, i to Iesu akavaanga ki mua i te Sunederi ra. “E ture ta matou,” ta ratou i karanga, “e ka mate tika aia i taua ture ra, koia i karanga e, e Tamaiti aia na te Atua.”

E akaapa anga ou teia i to Pilato akarongo anga, e kua akariro iaia kia mataku. Inara, i teianei kua kite aia e kare a Iesu i te tangata noa ua nei, te tau ra ta te moe a tana vaine i akakite maira e pera katoa oki to Iesu tu tangata ririnui maata. Inara e ‘tamaiti na te Atua’? Kua kite a Pilato e no Galilea mai a Iesu. Tera ra, ka tau ainei e i ora ana aia i mua ana? Kua arataki akaou atura iaia ki roto i te are ariki, e kua ui atura Pilato ki aia: “Noea a koe na?”

Kia vai muteki a Iesu. I akakite aia i mua akera e e ariki aia, inara kare tona Patireia i to teianei ao. Kare e puapinga no tetai atu akataka anga i teianei. No reira kua mamae to Pilato ra tu parau no tei kore i pauia tana uianga, e kua mura atura aia kia Iesu ma te au tuatua: “Kare koe e tuatua mai kiaku? Kare koe i kite e, tei iaku te mana kia tuku ua ia koe e tei iaku te mana no te patiti atu ia koe na?”​—NW.

Kua tuatua kauraro atura Iesu e: “Kare rava oou e mana kia rave mai iaku, naringa kare i orongaia mai toou mana no runga maira.” Te tuatua ra aia no te mana ta te Atua e akatika kia rave te au tutara tangata i te au apinga o te enua nei. Kua tuatua kapiti katoa maira Iesu: “E teianei, ko tei tuku atu iaku ia koe na, ko tana te ara maata.” E tika, ko te taunga maata ko Kaiapha e tona au taeake pera katoa a Iuda Ikariota ra e apainga teiaa ua atu ta ratou i ta Pilato, no ta ratou takinga kino anga tau kore ia Iesu.

I te maata te manako anga no Iesu e te mataku anga e penei no te Atua maira Tona akamata anga, kua tauta akaou a Pilato kia tukua Aia. Inara kua patoi te ngati Iuda ia Pilato. Kua akamata akaou ratou i ta ratou akaapa anga poritiki, na te akakokoanga kikite e: “Kia tuku koe i tenana tangata, kare koe i to Kaisara: ko tei tuatua e koia uaorai te ariki ra, kua patoi atu ia Kaisara.”

Noatu rai te reira au manako anga, kua arataki maira a Pilato ia Iesu ki vao e okotai atu taime. “Ka akara mai ana i to kotou ariki” ko tana ia i pati akaou atura.

“Ka rave ke atu iaia! Ka rave ke atu iaia! E patiti atu iaia na!” (NW) ko te pauanga te reira.

“Ka patiti atu ainei au i to kotou ariki?” (NW) Ta Pilato ia i ui atu ma te taitaia.

Kua tupu ke ana te manamanata ki te ngati Iuda i raro ake i te tutara a to Roma. E tika, kua reka kore ratou i te tutara anga a Roma! Inara, na te tu pikikaa, kua karanga te kau taunga nunui e: “Kare o matou ariki, mari ra ko Kaisara anake ra.”

I te matakuanga no tona taoonga poritiki e tona ingoa akaperepereia, kua kauraro a Pilato i te openga ki raro ake i te au akauenga ketaketa a te ngati Iuda ra. Kua tuku atura aia ia Iesu kia ratou. Kua kiriti atura te vaeau i to Iesu kakau purapura e kua akakakau ma te kakau vao ra. I te arataki anga ia Iesu kia patitiia, kua akaueia nana rai e apai i tona uaorai rakau tamamae anga.

I teianei kua tae ki te popongi avatea i te Varaire, Nisana 14; penei te vaitata ra ki te avatea tikai. No te ara a Iesu mei te mamaiata o te Paraparau mairai, e kua mamae aia i tetai tupuanga tamamaeia i muri ake i tetai. E mea kitea uaia, ka ngere aia i te maroiroi no te teiaa o te rakau. No reira kua manako tangi tetai tangata te aere ra i te pae mai e tangata Kurene no Aperika, ko Simona te ingoa, kua apai atura i te reira nana. Ia ratou e aere ra, e manganui te aronga tei aru atu kapiti katoa i etai vaine tini tei papa ra ia ratou uaorai no te mii e te aue anga ia Iesu.

Kua ariu maira Iesu ki taua aronga vaine ra, kua na ko maira: “E te au tamaine no Ierusalema nei, auraka e aue iaku, ka aue ra ia kotou uaorai, e i ta kotou tamariki. I na oki, te vaitata maira te tuatau, e tuatuaʼi ratou e, E ao to te pa, e te kopu kare i anau, e te u kare i ngoteia. Ei reira ratou e tuatuaʼi ki te au maunga, E topa mai ki rungao ia matou; e ki te au tuaivi ra, E tapoki mai ana ia matou. Ko te ravenga oki teia i te rakau mata nei, akapeeaia ra te marō?”

Te tuatua ra Iesu no te pu rakau o te iti tangata ngati Iuda, te vaira tona tu mata i reira no te mauu e te ora ra no te mea te vaira Iesu i reira e te toenga o te aronga tei akarongo ra iaia. Inara kia kore atu te reira aronga i roto i taua iti tangata ra, e rakau mate anake i te pae vaerua te ka toe mai, ae, e akaaerenga iti tangata kua mae. Aue mei teaa ra te tumu no te aue anga i te rave anga te nuku vaeau o Roma ei tavini tamate na te Atua, i te akatanea anga i te enua o te ngati Iuda ra! Ioane 19:6-17; 18:31; Luka 23:24-31; Mataio 27:31, 32; Mareko 15:20, 21.

◆ Eaa te akaapa anga ia Iesu ta te au arataki akonoanga atua i rave i te kore anga i tupu kia puapinga ta ratou au akaapa anga no te pae poritiki?

◆ Penei eaa a Pilato i riro ei kia maata atu te mataku anga?

◆ Koai ma tei apai i te ara maata atu no tei tupu kia Iesu?

◆ I akapeea i raukai i te kau taunga ra i te akariro ia Pilato kia tuku atu ia Iesu kia tamateia?

◆ Eaa ta Iesu i tuatua atu ki te aronga vaine tei aue ra nona, e eaa te aite anga o tana tuatua no te pu rakau “mata nei” e i muri ake kua “marō”?