Pene 125

Mamae i Runga i te Rakau Tamamae

E RUA nga tangata keikeia tei taki kapitiia atu ma Iesu katoa kia tamateia. Kare i mamao atu i te oire, kua tapu taua aronga katoa ra i te ngai tei tapaia ra ko Golagota, me kare e ngai Vairanga Katu.

Kua kiritiia te au kakau o te nga tangata tei tapekaia ra. E kua orongaia atu te uaina i irokia ki te apinga akakona. I te akara anga, na te au vaine o Ierusalema i akateateamamao, e kare to Roma e akakore i te reira vairakau akanauru i te mamae no te aronga tei patitiia ra. Inara i to Iesu tongi anga i te reira, kua akakore aia i te inu atu. No teaa ra? E mea papu e te anoano ra aia kia vairai tona kite katoa e tona manako no teia tuatau timata anga maataia no tona akarongo.

Kua akatakotoia a Iesu i reira ki runga i te rakau ra ma tona nga rima i runga ake i tona upoko. Kua patiti atura te nga tangata vaeau i nga nairo mamaata ki roto i tona nga rima e ki roto i tona nga vaevae. Kua pakati aia i te mamae i te tomo anga nga nairo i tona kiko e te uaua katoa oki. I te akatu anga ake i taua rakau ra ki runga, kua kino roa atu te mamae, no te mea kua akangaae te teimaa o te kopapa ra i nga puta nairo ra. Inara, kare aia i akakoko atu mari ra, kua pure a Iesu no te au vaeau Roma ra: “E taku Metua, e akakore mai koe i ta ratou ara, kare oki ratou i kite i ta ratou i rave nei.”

Kua tuku katoa atura Pilato i tetai akakiteanga ki runga i te rakau tei tatau ra e: “Ko Iesu i Nazareta te Ariki o te Ngati Iuda ra.” I te akara anga, kua tata aia i te reira kare no tona akangateitei anake ia Iesu mari ra no tona rikarika i te kau taunga ngati Iuda no ta ratou rave anga i te tuku anga tika no to Iesu matenga mei iaia atu. Kia raukai i te katoatoa i te tatau i taua akakiteanga ra, kua akaue a Pilato kia tataia i nga reo e toru katoa​—⁠te Epera, te Ratini tikai, e i te Ereni noa ua ra.

E kua riri te kau taunga nunui ra, kapiti katoa ia Kaiapha raua ko Ana. Kua akakino i teia akakiteanga papu i to ratou ora autu anga. No reira kua patoi ratou: “Eiaa e tataia e, Ko te ariki o te ngati Iuda; e na ko ra e, Kua karanga aia e, Ko au te ariki o te ngati Iuda.” No tona riri i rave ei i te akatupu i ta te kau taunga ra, kua pau atura Pilato ma te rikarika tikai: “Ko tei tataia e au ra, kua tataia rai.”

Kua akaputu atura te kau taunga, ma te urupu tini katoa, ki te ngai o te tamate anga, e kua akaapa atura te kau taunga i taua tuatua akakiteanga ra. Kua taiku akaou atura ratou i te tuatua pikikaa tei orongaia i mua akera i te akavaanga a te Sunederi. Kare i te mea poitirere e, kua tuatua akakino atura te aronga tei aere na reira; ma te takirikiri i to ratou mimiti e te aviri ma te na ko anga: “Ko tei vavaʼi i te nao e, e kua po toru anake kua akatu akaou, Ka akaora ia koe uaorai: ko te Tamaiti a te Atua koe na, ka eke mai koe ki raro nei i tenana [rakau tamamae anga, NW]”!

“Kua akaora aia i etai ke ra; kare ra e tika kia akaora iaia uaorai”! kua tuatua kapiti katoatoa maira te kau taunga nunui e te aronga o ta ratou akonoanga. “Ko te Ariki aia no Iseraela, ka eke mai aia i teianei mei runga i te [rakau tamamae anga, NW], e na matou e akarongo atu iaia. I irinaki ana aia i te Atua; e te kite maira te Atua iaia, e akaora aia iaia i teianei: nana uaorai oki i karanga e, E Tamaiti au na te Atua.”

Kua mou katoa atura i taua vaerua ra, kua rave atura to te vaeau i te aviri anga. Kua oronga aviri katoa atura ratou i te uaina kava ki aia, penei kua mou atu kare i tae tikai ki tona vaa maro ra. “Te ariki koe o te ngati Iuda ra,” ta ratou i aviri, “ka akaora ana ia koe uaorai.” Pera katoa oki nga tangata keikeia ra​—⁠kua patitiia tetai i te pae katau o Iesu, e ko tetai i tona pae kaui⁠—​kua aviri katoa iaia. E tamanako ana! Koia te tangata maata rava atu tei ora ana, ae, koia tei rave kapiti ra ma te Atua ko Iehova i te anga mai anga i te au mea ravarai, kua mamae tikai aia i teia au akakino anga katoatoa!

Kua rave atura te au vaeau i to Iesu au kakau o vao e kua vee atura e a tuanga. E kua tuku atura i te ke­rero kia kitea e ka riro noai ia. Inara ko te kakau o roto, kare e tapa, e meitaki rava te tu. No reira kua tuatua iora te vaeau ratou ratou uaorai: “Auraka tatou e aeae, ka tua kelero ra, kia kitea te atu.” No reira, kua tupu atura ia ratou te tuatua i tataia ra i reira tei na ko ra: “Kua tua iora ratou i toku au kakau no ratou, e kua akatopa kelero oki ratou i toku pere­ue.”

I muri akera kua ariki tetai o te nga tangata keikeia ra e e ariki tikai a Iesu. No reira, kua kauvae maira aia i tona taeake, na ko maira: “Kare oou mataku i te Atua, te mate katoa oki koe okotai rai tu? Kua tika oki to taua nei mate; ko te tutaki oki teia i ta taua i rave ra: kareka teianei tangata, kare rava ana tuatua kino.” I reira kua tuatua atura aia kia Iesu, ma te patianga: “E akamaara mai koe iaku, kia tae koe ki toou basileia.”

“Koia mou taku e karanga atu kia koe nei,” ta Iesu i karanga atu, “Ei Parataito taua ka aravei ei.” (NW) Ka tupu teia taputou kia tutara mai a Iesu ei Ariki mei te rangi maira e ka akatuakaou mai ei i teia tangata rave kino tei tataraara kia ora ki runga i te enua i Parataito te ka riro na te aronga e ora atu ia Aramakito e to ratou au oa e tatanu. Mataio 27:​33-44; Mareko 15:​22-32; Luka 23:​27, 32-43; Ioane 19:​17-24.

▪ Eaa ra a Iesu i kore ei i inu i te uaina kava ra?

▪ Eaa i te akara anga, te akakiteanga tei tukuia ra ki runga i te rakau tamamae o Iesu ra, e eaa tetai atu tupu anga i rotopu ia Pilato e te au kau taunga ra?

▪ Eaa atu te aviri anga tei orongaia kia Iesu iaia i runga i te rakau ta­mamae ra, e na teaa i akakeu i te reira?

▪ Akapeea te akatupu anga i te totou tei raveia ra ki te au kakau o Iesu?

▪ Eaa te taui anga ta tetai o nga tangata keikeia ra i akono, e ka akapeea a Iesu i te akatupu anga i tana patianga ra?