Akapeea Iehova e Akamaara Mai ei Ia Koe?

“EAKAMAARA mai iaku, e taku Atua e.” E manganui te taime kua pati akatenga Nehemia i te Atua na roto i te reira au tuatua. (Nehemia 5:19; 13:14, 31) E mea natura ua no te tangata me o i roto i tetai manamanata, ka ariu ki te Atua ma taua au pati anga rai.

Inara, eaa, to te tangata manako me pati atu ratou i te Atua kia akamaara mai ia ratou? Papu e, ka manakonako ratou e kia rave te Atua ma te maata atu e kia maara ua i to ratou ingoa. Kare e ekokoanga ka manakonako tikai ratou mei tetai o te nga tangata kino e rua tei tamateia i te pae mai ia Iesu. Ko teia tangata, kare e mei tetai atu, kua pati akatenga kia Iesu: “E akamaara mai koe iaku, kia tae koe ki toou basileia.” Kare aia i inangaro ua ia Iesu kia akamaara e koai aia mari katoa ra kia rave i tetai apinga nona​—kia akatuakaou iaia.​—Luka 23:42.

I te au taime ravarai, te akaari maira te Pipiria e ki te Atua, te aiteanga o te ‘akamaaraanga’ me kore ‘akamanakoanga’ ko te rave anga i te angaanga tau. Ei akatauanga, i muri ake i te tapoki angaia te enua e te vai puke no te 150 au ra, “te manako ra te Atua ia Noa . . . , e kua akaaraara iora te Atua i tetai matangi na runga i te enua, kia mate taua vai ra.” (Genese 8:1) I te au anere mataiti i muri mai, ko Samasona, kua akamatapoia e kua tapekaia e te au Philiseti, kua pure atu: “E taku Atu e Iehova, e akamaara mai koe iaku, taku ïa pure ia koe, i teianei e akamaroiroi mai koe iaku nei, taku rai ïa pure ia koe, okotai akamaroiroi anga toe ko teia anake nei.” Kua akamaara mai a Iehova ia Samasona na te orongaanga kiaia i te maroiroi maata kia akautunga aia uaorai i te au enemi o te Atua. (Akava 16:28-30) Ko Nehemia ra, kua akameitaki a Iehova i tona maroiroi, e kua akaokiia te akamorianga mou ki Ierusalema.

“Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra” i tatai te apotetoro ko Paulo. (Roma 15:4) Me akamaara tatou ia Iehova e te kimi i tona anoano, mei tona au tavini tiratiratu i muatangana, ka irinaki tatou e ka akamaara mai a Iehova ia tatou e ka tauturu ia tatou kia rauka mai ta tatou au apinga i te au ra tataki tai, na te turu anga ia tatou i to tatou au timata anga, e na te akaora anga ia tatou me apai mai aia i te akavaanga ki runga i te aronga Atua kore.​—Mataio 6:33; 2 Petero 2:9.