“Ka Vai Koe Kiaku Nei i te Parataito”

MEI iaia te tarianga ki runga i te rakau tamate anga, i te mateanga mamae, kua pati akatengaia e te tangata rave kino i te pae iaia: “E Iesu, e akamaara mai koe iaku kia tae koe ki toou patireia.” Noatu rai e koia tetai e mate ra ma te mamae kino rava, kua pau atu a Iesu e: “E tikai taku e karanga atu kia koe i teianei ra, Ka vai koe kiaku nei i te Parataito.” (Luka 23:42, 43, NW) Mei teaa te manakonakoanga pumaana no te oronga atu ki tetai tangata te mate ra!

Kua kite ainei koe e, e ko te New World Translation​—te urianga tei takiatoia i te parakarapa i runga ake—​i tuku i tetai maka i te ope o te tuatuaanga a Iesu “i teianei ra”? Te oronga maira teia i te manako e ko te ra o tona uaorai matenga, kua rauka rai ia Iesu i te taputou ki te tangata rave kino te ora anga i te Parataito. I tetai tua, kua tuku The New English Bible te maka ra i ta Iesu tuatua mei teia rai te tu: “Ka karanga atu au i teia kia koe: ka vai koe kiaku nei i te Parataito i teia nei ra.” Ko te maata anga o tetai au urianga kua akatika ki The New English Bible, te orongaanga mai i te manako e ka aere a Iesu e te tangata rave kino ki te Parataito i te reira ra tikai. Eaa ra i tuke ei? E ko teea te maka i tika ra?

E tikai, i te tuatau taito kare te au tataanga Ereni o te Puka Tapu e taangaanga i te au maka. No reira te akamata anga o te maka, kua tukuia atu ki roto e te au tangata tata e te au tangata uri reo i te Puka Tapu ma to ratou maramaanga i te tuatua mou o te Puka Tapu. Tera ra, e tika ainei teia peu akamaramaanga? Kua aere ainei a Iesu e te tangata rave kino ki te Parataito i te ra o to raua mate anga?

Kare, kia tau ki ta te Puka Tapu i akakite, kua aere atu raua ki te ngai tei kapikiia i te reo Ereni Haʹdes e i te reo Epera Sheʹol, koia oki kua taiku teia nga tuatua e ko te vaarua noa ua o te tangata nei. (Luka 18:31-33; 24:46; Angaanga 2:31) Kua karanga te Puka Tapu no ratou i te reira ngai: “Te aronga i mate ra kare a ratou apinga i kite . . . kare oki e angaanga i reira, kare e kimianga, kare oki e kite, kare oki e pakari i Teoro [Ereni, Ate], te ngai taau i aere na.” Kare te reira i te parataito!​—Koheleta 9:5, 10, NW.

Kare kia tae ki te toru o te ra kua akatuia a Iesu mei Ate mai. No reira, i te vaitataanga i te ono epetoma kua rave aia i te au mama anga ki tana au pipi tei takapini i te enua o Paretaina. Na tetai o te reira akakoroanga, kua karanga atu a Iesu kia Maria e: “Kare rai au i tae ki runga i toku Metua ra.” (Ioane 20:17) No reira, kare aia i tae ki tetai ngai tei kapikiia ra e parataito.​—Apokalupo 2:7.

I te toru anere mataiti T.N.​—te tuatau no te kapipitianga viviki o te apiianga Kerititiano e te manakoanga Ereni​—kua takiatoia e Origen a Iesu te tuatuanga e: “Ka vai koe kiaku nei i te Parataito a te Atua i teia nei ra.” I te a anere mataiti T.N., kua tauetono te au tangata tata o te ekaretia, i te tuku anga i te maka i muri ake “i teia nei ra.” Kua akaari mai teia e ko te mataara o te tatauanga i te peu o ta Iesu tuatua e tuatua enua takere roa. Pera katoa kua akakite te reira e i te a anere mataiti T.N., kua tatauia ana etai i ta Iesu tuatua te tauanga ki te mataara mei ta te New World Translation i akataka maira.

I teia tuatau nei ra, noatu e manganui te au tangata uri reo tei tuku i te maka ia Luka 23:43 mei to te peu ekaretia rai, kua tuku etai i te maka mei ta te New World Translation. No te akatauanga, i te uri anga Tiamani na tetai puapii kite ko Wilhelm Michaelis, kua tatau ia ta Iesu tuatua e: “E tikai, kua oronga atu au kia koe i teia tikaanga i teia nei ra: ka kapiti mai koe (i etai ra) iaku i te Parataito.”

Inara, eaa te aiteanga o ta Iesu tuatua ki te tangata rave kino? Penei kua akarongo aia ki te au tuatua, e koia te Ariki taputouia. Kare e ekoko anga, kua kite aia i te taoonga “ko te ariki teia no te ngati Iuda” ta Pilato i tata e kua tukuia ki runga i to Iesu upoko. (Luka 23:35-38) Noatu e kua kopae maro tikai te au arataki akonoanga ia Iesu, kua akakite teia tangata rave kino ra tei tataraara i tona akarongo, te tuatuaanga e: “E Iesu, e akamaara mai koe iaku, kia tae koe ki toou patireia.” Kare aia i tapapa atu kia tutara ma Iesu, mari ra kua inangaro aia kia puapinga aia mei ta Iesu tutara anga. E no reira, i taua ra ngata rava atu, kua taputouia ra e Iesu e ka vai te tangata rave kino kiaia i te Parataito.

I teea parataito? I roto i te Puka Tapu, te Parataito mua tei ngaro i nga metua mua mei tetai paka aua tiare rai o Edene ra. Kua taputou te Puka Tapu e ka akaoki akaouia mai te Parataito ki te enua nei i raro i to te Atua Patireia, ko Iesu te Ariki. (Salamo 37:9-11; Mika 4:3, 4) No reira, ka vai rai a Iesu ma te tangata rave kino e te manganui atu tei mate ra, me akatu mai aia ia ratou no te ngai tanumanga ki te ora i te enua parataito e ki te tuatau o te apiianga i te rave i to te Atua anoano e te oraanga e tuatau ua atu.​—Ioane 5:28, 29; Apokalupo 20:11-13; 21:3, 4.