To Iesu Oraanga e te Angaanga Orometua

“Ko te Tamaiti Tikai Teia a te Atua”

KARE a Iesu i roa ana ki runga i te rakau e, i te avatea pu tikai, kua tupu te poiri anga e mea ngaro tikai, no nga ora e toru katoa. Kare ia na te arai anga a te marama i te ra, no te mea te tupu ra te reira i te tuatau anake ua o te marama ou, te ki ra te marama i te tuatau o te Pasa. Pera katoa oki, ko te arai anga i te ra e tokoiti ua nga miniti. No reira ko teia poiri anga no te mana mai o te Atua ra! Penei e tapu anga poto ua i te aronga aviri ia Iesu ra, ma te akariro anga kia akamutu ta ratou au ravenga akakino iaia.

Me no mua ake te reira tupu anga tamataku i te riri anga tetai tangata rave kino ra i tona taeake, e tana pati anga ia Iesu kia akamaara mai iaia, penei ko te tumu ia no tona tataraara anga. Penei no taua tuatau poiri ra i aere ei nga vaine e a ra, koia te metua vaine o Iesu e tona teina ko Salome, ko Maria Magadala, e Maria te metua vaine o te apotetoro ko Iakobo te Mea Iti ra, i te akavaitata atu anga ki te rakau tamamae anga. I reira a Ioane te apotetoro akaperepere a Iesu, ma ratou katoa ra.

Mei teaa ra te ‘puta anga’ te ngakau o te metua vaine o Iesu i tona akara anga i te tamaiti tana i utuutu ana e i akono ana, i te patiti angaia i reira ma te mamae kino roa! Inara, kare a Iesu i manako i tona uaorai mamae, mari ra i te meitaki no tona metua vaine. Na te tauta anga pakari, kua tungou atura aia kia Ioane e kua karanga iora ki tona metua vaine: “E maine, ka akara na i to tamaiti!” I muri akera, kua tungou atura kia Maria e kua tuatua iora kia Ioane: “Ka akara na i to metua vaine!”

Na reira ta Iesu tuku anga i tona metua vaine, tei riro ra ei takaua, na tana apotetoro akaperepere tikai e akono. Kua rave a Iesu i te reira no te mea kare etai atu tamaroa a Maria i akakite ake i te akarongo kiaia. E no reira tana akanoo anga i te akatauanga meitaki i te akapapaanga i te akanoonoo anga kare i te pae kopapa anake ua no tona metua vaine mari ra no tei anoano katoaia nona i te pae vaerua.

I te vaitata anga i te ora toru i te aiai avatea ra, kua na ko akera Iesu: “Kua kaki vai au.” Ei reira, kua manako aia e mei te mea rai, kua akakore tona Metua i te paruru anga iaia ei timata anga i tona tiratiratu kia tae roa ki te kotinga, kua kapiki aia ma te reo maata: “E taku Atua, e taku Atua, eaa koe i akaruke mai ei iaku?” I te akarongoanga i te reira, kua karanga tetai papaki te tu vaitata maira: “I na, te kapiki nei aia ia Elia.” I reira tikai kua oro atura tetai o ratou ra e, kua rave tei tapuruia i tetai rimu ki roto i te uaina kavangu i runga i te openga o tetai kakao, e kua apai atura kia inu aia. Inara kua na ko akera tetai papaki: “Vaio atu ana, kia kite tatou ia Elia i te aere anga mai e tuku mai iaia ki raro.”

I te rauka anga ia Iesu taua uaina kavangu ra, kua kapiki atura aia: “Kua oti!” Ae, kua oti takiri iaia te au apinga ravarai ta tona Metua i tono maira iaia ki te enua nei kia rave. I te openga ra, kua na ko atura aia: “E taku Metua, te tuku atu nei au i toku vaerua ki to rima na.” Kua tuku atura Iesu i tona mana ora ki te Atua ma te manako papu e ka akaoki akaou mai te Atua i te reira kiaia. Kua tupou atura aia i tona upoko e mate atu ra.

I te atianga tikai i uti ei a Iesu i tona aʼo openga, kua rokoia maira e te ngaruerue enua ririnui, ngaangaa atura te au toka. No te ririnui maata o taua ngaruerue anga ra e kua vavaiia iora te au menema i vao ake ia Ierusalema ra, e kua oparaia maira te au ivi o tei mate ki vao ia ratou. Ko te aronga i na reira i te aerenga, kua akara i te au kopapa mate tei oparaia akera ki vao, kua aere atura ratou ki te Oire e kua akakite atu i te reira.

Pera katoa oki, i te atianga tikai i mate ei a Iesu, kua ngaae iora te arai o te paruru i te ngai Tapu mei te ngai Tapu Rava o te iero o te Atua ra, mei runga ki raro. Te manakoia ra e e 18 mita te teitei o taua arai paruru ra e teimaa maata oki ia! Kare te reira semeio umere i akakite anake i to te Atua riri i te aronga tei ta i Tana Tamaiti mari katoa ra te akakite maira e kua rauka i teianei i te tomo atu ki roto i te ngai Tapu Rava, i te rangi tikai, na to Iesu ra matenga.

I te kite anga te au tangata i te ngaruerue enua e te akara anga i taua au mea ra i te tupuanga, kua maata rava atu to ratou mataku. Kua akakaka i te Atua te rangatira vaeau nana ra i akaaere te tamate anga. “Ko te Tamaiti tikai a te Atua teianei tangata,” ko tana ia i karanga. Penei koia tetai i reira i te uriuri anga i te tika o te tamaiti na te Atua ia Iesu i timataia ra ki mua ia Pilato. I teianei kua papu tona manako e ko Iesu te Tamaiti a te Atua, ae, e tika koia te tangata maata rava atu tei ora ana.

Kua maata katoa te manako anga o tetai papaki no teia au tupuanga semeio, e kua akamata ratou i te oki ki to ratou kainga ma te papaki i to ratou umauma, ei akakite i to ratou tu mii tikai e te akama. I te akara atu anga i taua mea i tupu ra mei te ngai mamao ke atura, e manganui te au vaine e pipi na Iesu tei tangi maata no taua au apinga i tupu ra. E ko te apotetoro ko Ioane i reira katoa. Mataio 27:45-56; Mareko 15:33-41; Luka 23:44-49; 2:34, 35; Ioane 19:25-30.

◆ Eaa i kore ei i tika e na te arai anga a te marama i te ra i tupu ei te poiri no te toru ora ra?

◆ I mua poto ake i tona matenga, eaa te akatauanga meitaki ta Iesu i oronga maira no te aronga e metua ruaine to ratou?

◆ Eaa nga tuatua openga e a ta Iesu i tuatua i mua ake ka mate ei aia?

◆ Eaa tei akatupuia e te ngaruerue enua ra, e eaa te tumu maata o te ngaae anga o te arai paruru o te iero ra kia rua tuanga?

◆ Eaa tei tupu ki te rangatira vaeau tei akaaere i te tamate anga ra, no te au semeio i tupu ra?