Vai Takake ua Mei Teianei Ao Tei Oripu Ua

1. Akapeea tatou te akarongo anga ki te Atua e te kavamani a te tangata?

TE APII maira te Pipiria ia tatou kia kauraro ki te au kavamani a te tangata, inara te akakite katoa ra e kia akarongo ua rai tatou ki te Atua. (Angaanga 5:29; Tito 3:1) Akapeea? Kua akamārama a Iesu i tetai kaveinga te ka tauturu ia tatou kia kite e koai ta tatou ka akarongo atu. Karanga aia e “e apai mari i ta Kaisara kia Kaisara; e ta te Atua ra, e apai ïa ki te Atua.”^[1] (Akara i te manako poto.) (Mataio 22:21) Ka apai tatou “i ta Kaisara kia Kaisara” me akono tatou i te au ture a te kavamani, me akangateitei i te aronga mana taoonga, e me tutaki i te tero. (Roma 13:7) Inara, me akaue mai te kavamani ia tatou kia rave i tetai angaanga kare te Atua e āriki ana, kare tatou e rave i te reira, inara ka akaari tatou i te tu akangateitei.

2. Akapeea tatou te akaari anga kare tatou e piri atu ki te angaanga poritiki o teianei ao?

² Tetai mataara ka apai tatou “i ta te Atua ra,” koia oki kare tatou e piri atu ki te au taumāroanga poritiki o teianei ao. Ka akatakake tatou mei teia au mea. (Isaia 2:4) No te mea te akatika ra a Iehova i te kavamani a te tangata kia tutara, kare tatou e patoi i te reira. Kare katoa tatou e piri atu ki tetai ua atu peu akaepaepa enua. (Roma 13:1, 2) Kare tatou e tauta i te taui i te kavamani me kore e akakeu i te aronga mana taoonga, e kare tatou e iki i roto i te angaanga poritiki e kare katoa e riro mai ei tangata poritiki.

3. Eaa ra tatou ka vai takake ei?

³ E maata te tumu i akakite ei te Atua kia vai takake tatou. Tetai, no te mea te aru nei tatou ia Iesu, “kare [aia] i to teianei ao.” Kare rava aia i piri atu ana ki te angaanga poritiki e te tamaki. (Ioane 6:15; 17:16) Tetai akaou tumu koia oki, te turu nei tatou i te Patireia o te Atua. No te mea kare tatou e turu ana i te kavamani a te tangata, e akava ngakau mā to tatou me tutu aere e na te Patireia anake o te Atua e akatikatika i te au manamanata o te tangata. Te piri nei te au akonoanga pikikaa ki te angaanga poritiki, e ka riro teia ei akatupu i te ke i rotopu i te tangata. Inara no te mea te vai takake ua nei tatou, kua taokotaiia tatou ma te au taeake e te au tuaine takapini i teianei ao.​—1 Petero 2:17.

4. (a) Akapeea tatou e kite ei ka ngata atu kia vai takake ua? (e) No teaa tatou ka akapapa i teianei kia vai takake ua?

⁴ Penei te noo nei tatou i tetai ngai kare te tangata e umuumuia kia piri atu ki te angaanga poritiki. Inara ia tatou e vaitata atura ki te openga o te akatereanga a Satani, ka ngata atu ia tatou kia vai takake. I teia tuatau, te riro nei te au tangata “ei akaatikau koreromotu ra” e “ei māro,” no reira kua tupu te ke i rotopu ia ratou. (2 Timoteo 3:3, 4) Kua tupu tetai au kino ki to tatou au taeake no te taui anga o te turanga kavamani i to ratou enua. Ko te tumu teia i anoanoia ai tatou kia akapapa i teia taime kia vai takake ua i roto i te au turanga ngata. Ka uriuri ana tatou e ā apinga te ka tauturu ia tatou kia akapapa.

AKAMANAKO I TE KAVAMANI A TE TANGATA MEI TA TE ATUA E MANAKO RA

5. Eaa to Iehova manako no runga i te kavamani a te tangata?

⁵ Tetai mataara ka akapapa tatou kia vai takake ua i teia taime koia oki, kia akamanako i te kavamani a te tangata mei ta Iehova e manako maira. I te anga mai anga te Atua i te tangata, kare aia i oronga ana i te tikaanga kia ratou kia akaaere ia ratou uaorai. (Ieremia 10:23) Ko tona manako no runga i te tangata, mei tetai ngutuare tangata okotai. Inara te akatakake ra te au kavamani i te au iti tangata no te mea te karanga nei ratou e ko to ratou enua te mea meitaki rava atu. Noatu e akara anga meitaki tetai au kavamani, kare e rauka ia ratou i te akatikatika i te au manamanata pouroa. Pera katoa, kua riro mai ratou ei enemi no te Patireia o te Atua, tei akamata i te tutara i te mataiti 1914. Kare e roa atu ana, na teia Patireia e takore i te au kavamani pouroa a te tangata.​—E tatau ia Salamo 2:2, 7-9.

6. Akapeea tatou me akono i te au mana taoonga a te kavamani?

⁶ Te akatika nei te Atua i te kavamani a te tangata no te mea ka akamou ratou i te turanga au e te tinamou. Ka tauturu teia ia tatou kia tutu i te nuti meitaki o te Patireia o te Atua. (Roma 13:3, 4) Te akakite katoa ra te Atua kia pure tatou no te aronga mana taoonga e rauka ai ia tatou kia akamori Iaia ma te au. (1 Timoteo 2:1, 2) Me kare tatou e akono meitakiia, penei ka pati tatou i te tauturu a te aronga mana o te kavamani. Ko teia ta Paulo i rave. (Angaanga 25:11) Noatu te karanga ra te Pipiria e ko Satani te akatere nei i te kavamani a te tangata, kare te reira e karanga e te akatere nei aia i te aronga mana tataki tai o te kavamani. (Luka 4:5, 6) No reira, auraka tatou e karanga ki tetai ua atu e kua akatereia tetai tangata mana taoonga e te Tiaporo. Te akamārama maira te Pipiria e auraka tatou e akakino atu i tetai ke.​—Tito 3:1, 2.

7. Eaa te au manako ka kopae tatou?

⁷ Te akarongo ra tatou ki te Atua na te kore e turuturu i tetai tangata me kore pupu poritiki, noatu e ka puapingaia tatou e to ratou au manako. Tetai taime, kare teia i te mea māmā ua no tatou. Ei akaraanga, akamanako ana kua patoi te iti tangata i tetai kavamani tei akatupu i te mamae maata ki te katoatoa, kapiti mai te Au Kite o Iehova. E tika, kare koe e piri atu ki te aronga patoi. Inara, ka manako ainei koe e te tano ua ra ta te aronga patoi e ka inangaro koe kia autu ratou? (Ephesia 2:2) Me inangaro tatou kia vai takake ua, kare tatou e manako e e tika rai me kore e meitaki atu tetai tua i tetai. Ka kitea teia tu na roto i ta tatou e tuatua ra e e rave ra.

“KIA PAKARI KOTOU” “E TE APA KORE”

8. Akapeea tatou te akaari anga i te tu “pakari” e te “apa kore” me e ngata kia vai takake ua?

⁸ Tetai atu mataara kia vai takake ua koia oki, “kia pakari kotou mei te ovi, e te apa kore mei te kukupa.” (E tatau ia Mataio 10:16, 17.) Ka “pakari” tatou me akamanako i te au turanga ngata i mua ia tatou. E ka “apa kore” tatou me vai takake ua i roto i teia au turanga ngata. Ka uriuri ana tatou i teia au turanga e eaa ta tatou ka rave kia vai takake ua.

9. Eaa ta tatou ka matakite atu me pukapuka ki tetai ke?

⁹ Ta tatou pukapuka anga. Ka anoanoia tatou kia matakite me uriuri te tangata i te au manamanata poritiki. Ei akaraanga, me pukapuka tatou ki tetai tangata no runga i te Patireia o te Atua, kare tatou e karanga e ka āriki me kore ka patoi tatou i te au manako o tetai pupu me kore arataki poritiki. Kare tatou e uriuri i ta te tangata ravenga kia akatikatika i te au manamanata, mari ra e akaari no roto i te Pipiria akapeea te Patireia o te Atua te akatikatika anga i te reira. Me inangaro te tangata i te taumāro no runga i tetai tumu manako, mei te akaipoipo tane e te tane me kore vaine e te vaine, e te titiri pepe, e akakite kia ratou i ta te Tuatua a te Atua e apii maira e akapeea koe te aru anga i teia i roto i toou oraanga. Me karanga tetai e ka tau kia akakoreia me kore kia taui tetai ture, kare tatou e piri atu ki tetai tua, e kare e māro iaia kia taui i tona manako.

10. Akapeea tatou te akapapu anga kia vai takake ua me akara e me tatau i tetai apinga i runga i te nuti?

¹⁰ Aronga akakitekite o te nuti. Tetai taime, ka akakiteia te nuti na roto i te mataara e turuturu maata ra i tetai tua o te taumāroanga. E tika teia i roto i te au enua kua akatereia te nuti e te kavamani. Me piri atu te aronga akakitekite nuti ki tetai tua, kia matakite tatou eiaa e manako mei ia ratou rai. Ei akaraanga, e ui kia koe uaorai, ‘Te reka ra ainei au i te akarongo ki tetai tangata akakite nuti no te mea te āriki ra au i tana tuatua no runga i te poritiki?’ Ei tauturu ia koe kia vai takake ua, eiaa e akarongo me kore e akara i te au nuti te piri ra ki tetai tua i roto i te au taumāroanga poritiki. Mari ra, e akarongo ua ki te au nuti kare e piri ana ki tetai tua. Pera katoa, e akaaite ua rai i taau e akarongo ra ki “te akonoanga tuatua tikai” i roto i te Pipiria.​—2 Timoteo 1:13.

11. Akapeea e ngata ei ia tatou kia vai takake ua me riro ta tatou apinga ei mea puapinga rava atu kia tatou?

¹¹ Te moni e te apinga. Me riro te moni e te apinga ei mea puapinga maata kia tatou, penei ka ngata i te vai takake ua. I muri ake i te mataiti 1970, e manganui te Au Kite o Iehova i Malawi kua akaruke i to ratou au apinga no te mea kare ratou e turu i tetai pupu poritiki. Te mea mii ra, kare tetai pae i akaruke i to ratou turanga meitaki o te oraanga. Akamaara tetai tuaine ko Ruth tona ingoa, “Kua aru tetai pae ia matou ki te ngai tuikaa, inara i muri mai kua piri atu ki tetai pupu poritiki e kua oki ki to ratou kainga no te mea kare ratou i inangaro i te akakoromaki i te au turanga ngata i roto i te puakapa tuikaa.” Inara, kare te maataanga o te iti tangata o te Atua e pera ana. Ka vai takake ua rai ratou noatu e ka iti mai ta ratou moni me kore ka ngere i ta ratou au apinga.​—Ebera 10:34.

12, 13. (a) Eaa to Iehova manako i te tangata katoatoa? (e) Akapeea tatou te kite anga e te ngakau parau ra i to tatou enua anau?

¹² Te ngakau parau. E mea mātau no te tangata kia akaparau e kia akapaapaa i to ratou iti tangata, pa enua, peu, oire, me kore enua. Inara, kare a Iehova e manako ana e e meitaki atu tetai tangata me kore iti tangata i tetai atu. Kiaia, aiteite ua te katoatoa. E tika, kua anga a Iehova ia tatou kia tuke mei tetai e tetai, e ka mataora tatou i teia au tu. Kare aia e inangaro ia tatou kia akaruke i ta tatou peu tupuna, inara kare katoa aia e inangaro kia manako tatou e e meitaki atu tatou i tetai.​—Roma 10:12.

¹³ Auraka tatou e ngakau parau i to tatou enua me kore iti tangata e ka manako tatou e meitaki atu tatou i tetai ua atu. Me manako akapera tatou, penei ka ngata ia tatou kia vai takake ua. Kua tupu teia i te anere mataiti mua. Kare tetai au taeake Epera i akono meitaki ana i te au vaine takaua Ereni. (Angaanga 6:1) Akapeea tatou e kite ei e te tupu maira teia tu ngakau parau i roto ia tatou? Me akakite mai tetai taeake me kore tuaine no tetai ngai ke mai i tona manako, ka viviki ainei koe i te manako e, ‘E meitaki atu ta matou ravenga i konei,’ e oti ka kopae i tona manako? Me koia ïa, e akamaara i teia akoanga puapinga: “Ei ngakau akaaka ra, i te manako akameitaki atu tetai ki tetai.”​—Philipi 2:3.

KA TAUTURU A IEHOVA IA KOE

14. Akapeea te pure me tauturu ia tatou, e eaa te akaraanga Pipiria te akapapu maira i teia?

¹⁴ Te toru o te mataara kia vai takake ua, kia irinaki ia Iehova. E pure no te vaerua tapu, te ka akatupu i te tu akakoromaki e te akono meitaki. Ka tauturu teia au tu ia koe me rave te kavamani i tetai angaanga tika kore e te kino. E pati kia Iehova no te pakari kia mārama koe i te au turanga te ka riro ei mea ngata kia vai takake ua. Pati katoa kia Iehova no te tauturu kia rave i te mea tika i roto i te reira turanga. (Iakobo 1:5) Penei ka tiria koe ki roto i te are auri me kore ka akautungaia no toou tu tiratiratu kia Iehova. Me koia ïa, e pure no te ngakau toa kia rauka ia koe i te akamārama meitaki i te tumu i vai takake ei koe. E mea papu e ka tauturu mai a Iehova ia koe kia akakoromaki.​—E tatau ia Angaanga 4:27-31.

15. Akapeea te Pipiria te tauturu anga ia tatou kia vai takake ua? (Akara katoa i te pia “Akaketaketa te Pipiria i to Raua Irinaki Anga.”)

¹⁵ Kua oronga mai a Iehova i te Pipiria ei akamaroiroi ia tatou. E akamanako oonu i te au irava te ka tauturu ia koe kia vai takake ua. E tauta kia tamou ngakau i teia au irava no te mea ka tauturu te reira ia koe me kare aau Pipiria. Ka akaketaketa katoa te Pipiria i toou manakonakoanga no ta te Atua e akakite ra no te tuatau ki mua. Ka anoanoia te manakonakoanga kia akakoromaki i te takinokino anga. (Roma 8:25) E iki i te au irava te akataka maira i te au mea taau ka inangaro tikai i te kite i roto i te ao ou, e kia akamanako ia koe uaorai i reira.

KIA PUAPINGAIA MEI TE AU TAVINI AKARONGO MOU O IEHOVA

16, 17. Eaa ta tatou ka apii mai mei te akaraanga o te au tavini tiratiratu o te Atua tei vai takake ua? (Akara i te tutu mua.)

¹⁶ Te ā o te apinga te ka tauturu ia tatou kia vai takake ua koia oki, kia akamanako i te akaraanga o te au tavini tiratiratu o Iehova. E manganui i te tuatau Pipiria tei ngakau toa, e kua rave i te au ikianga meitaki tei tauturu ia ratou kia vai takake ua. Akamanako ana ia Sadaraka, Meseka, e Abedenego. Kare ratou e akamori i tetai tiki te komono ra i te kavamani o Babulonia. (E tatau ia Daniela 3:16-18.) Kua tauturu teia tua Pipiria i te manganui i teia tuatau kia ngakau toa e kia kore e akamori i te reva o to ratou enua. Kare katoa a Iesu e piri ana ki te angaanga porotiki e te au manamanata tei akatakake i te au tangata. Kua kite aia e ka riro tona akaraanga meitaki ei tauturu i tana au pipi. Akakite aia e: “Ka akamaroiroi ra, kua riro te re o teianei ao iaku.”​—Ioane 16:33.

¹⁷ E manganui te Au Kite o Iehova i teia tuatau tei vai takake ua. Tetai papaki, kua pāpāia, kua tiria ki roto i te are auri e kua tamateia no to ratou tu tiratiratu kia Iehova. Ka tauturu to ratou akaraanga ia tatou kia ngakau toa. Akakite mai tetai taeake no Turkey mai: “Ko Franz Reiter tetai taeake mapu tei tamateia no te mea kare aia e piri atu ki te nuku vaeau o Hitler. Ko te reta tana i tata ki tona metua vaine i te po i mua ake i tona mateanga, te akaari maira i tona akarongo ketaketa e te irinaki papu kia Iehova. Ka inangaro au i te aru i tona akaraanga me na roto au i tetai timataanga mei teia te tu.”^[2]​—Akara i te manako poto.

18, 19. (a) Akapeea te au taeake i roto i taau putuputuanga me tauturu ia koe kia vai takake ua? (e) Eaa taau ka tauta i te rave?

¹⁸ Ka tauturu te au taeake e te au tuaine i roto i taau putuputuanga ia koe kia vai takake ua. E akakite ki te aronga pakari me te aro atura koe i tetai turanga ngata. Ka oronga mai ratou i te akoanga meitaki i roto i te Pipiria. Pera katoa, me kite te au taeake i roto i te putuputuanga i toou turanga, ka akamaroiroi ratou ia koe. E pati ia ratou kia pure noou. Pera katoa, e tauturu tatou i te au taeake e kia pure no ratou. (Mataio 7:12) Ka kite koe i te au papaanga o te ingoa o te au taeake i roto i te are auri i runga i te jw.org tei kapikiia e “Jehovah’s Witnesses Imprisoned for Their Faith—By Location.” Ka kitea teia i roto i te ngai NEWSROOM > LEGAL DEVELOPMENTS. E iki i tetai au ingoa e e pati ia Iehova kia tauturu i teia au taeake e te au tuaine kia ngakau toa e kia vai tiratiratu kiaia.​—Ephesia 6:19, 20.

¹⁹ Ia tatou e vaitata atura ki te openga, kua kite tatou e ka māroia tatou e te au kavamani kia piri ki tetai tua. Ko te tumu teia i puapinga ai no tatou kia akapapa i teianei kia vai takake ua i roto i teia ao oripu ua!