I muri poto ua ake i tona papetito angaia, kua timataia a Iesu e tetai vaerua ora kitea koreia tei karangaia ko te Tiaporo ra ko Satani. Te akakiteanga i tetai o te au timata anga, te karanga ra te Puka Tapu e: “Kua arataki akaou atura te diabolo [ia Iesu] ki runga i tetai maunga teitei rava, e kua akakite maira kiaia i te au basileia katoa o te ao nei, e to ratou kakā.” (Mataio 4:8) Kua akakite atura a Satani kia Iesu: “E oronga atu au i te au, e te inuinu i teianei pa enua, kia koe na; kua tukuia mai oki kiaku, e naku e oronga atu na taku tangata e inangaro. E teianei kia tika ia koe i te akamori mai iaku, noou anake ïa.”​—Luka 4:6, 7.

Kua akakiteia mai e te mou ra a Satani i te mana akaaere i rungao i te au patireia katoatoa, me kare te au kavamani, o teianei ao. Kua akakore ainei a Iesu i teia akakite anga? Kare. Ma te tika, kua akapapu mai aia i te reira i tetai atianga na te taikuanga ia Satani e ko “te ariki o teianei ao.”​—Ioane 14:30.

I tau ki te Puka Tapu, e angera kino a Satani te mou ra i te mana akaaere maata. Te kapipiti ra te apotetoro Kerititiano ko Paulo ia Satani ma “te au vaerua kikino” e te tuatua ra no ratou ra ei “au tutara o teianei ao poiri.” (Ephesia 6:11, 12) Tei maata atu, te karanga ra te apotetoro ko Ioane e “te vai ua nei rai to te ao ravarai i raro ake i taua vaerua kino ra.” (1 Ioane 5:19) Te akakite ra te puka o Apokalupo o te Puka Tapu e ko Satani “tei pikikaa i to te ao katoatoa nei.” (Apokalupo 12:9) I te au tuatua akatutu anga, te akataka katoa maira a Apokalupo ia Satani ei tetai taae tei oronga ra ki te akatere anga poritiki o teia ao i “tona uaorai maroiroi, e tona uaorai terono, e te mana maata nona.”​—Apokalupo 13:2.

Te akakite katoa maira te au tupu anga o teianei ao e te vaira tetai mana kino maroiroi, te akavare karape ra i te au tangata ei kino no ratou uaorai. No teaa ra te tumu i kore ei i rauka i te au kavamani a te tangata i te akatupu i te au? No teaa atu ra tetai tumu i riro ei te au tangata kia makitakita e kia ta i tetai e tetai? Te riri anga i te ta anga maata e te mate i roto i tetai tamaki anga a te tangata, te karanga ra tetai i kite mata e: “Kare au i kite e akapeea roaʼi teia i tupu ei. E maata atu ia i te makitakita. E vaerua kino te reira te taangaanga ra i teia au tangata kia takore i tetai e tetai.”

Eaa ra a Satani i Akatikaiaʼi kia Tutara

Te maara ra ainei ia koe e eaa ta Satani i tuatua atu kia Iesu no te taoonga tutara i rungao i te enua nei? “E oronga atu au i te au, . . . kua tukuia mai oki kiaku,” karangaʼi a Satani. (Luka 4:6) Te akaari ra taua akakite anga e te taangaanga anake ra te Tiaporo ko Satani i te mana akaaere tei akatikaia e te Atua. Inara eaa ra te Atua i akatika uaʼi ia Satani?