Pene 21

I te Sunago o to Iesu Oirekainga Ra

KARE e ekoko anga e e poitirere anga tetai i Nazareta i to Iesu oki atu anga ki te kainga. I mua ake i tona akaruke anga kia papetitoia e Ioane e manga tere atu i te mataiti i topa ra, kua matau­ia a Iesu e ei kamuta. Inara i teianei kua matauia aia ei tangata rave i te semeio ki te ngai mamao e te atea katoa oki. Kua inangaro te au tangata i reira kia kite iaia i te rave anga i etai au angaanga umere i rotopu ia ratou ra.

Kua kake to ratou manakonakoanga i to Iesu aere anga ki te sunago i reira ra, tana ia peu i matau. I te tuatau te raveia ra te akoanga, kua tu akera aia ki runga e tatau, e kua orongaia atura kiaia te puka a Isaia peroveta ra. Kua kitea e ia te ngai te akakite maira i Tei akatainuia ra e te vaerua o Iehova, ko te ngai ia i roto i ta tatou Puka Tapu o teia tuatau nei i te pene 61.

I muri ake i te tatauanga e akapeea Tei tutu aere i te ora no te aronga tuikaa, e kia akara akaou te matapo, e te mataiti inangaro a Iehova, kua tuku atura a Iesu i tana puka ra ki te tavini ra e kua noo iora ki raro. Kua akara tamou atura te mata o te tangata ravarai kiaia. Kua tuatua atura aia, penei no tetai tuatau roa, i te akatakaanga: “Teianei tuatua i tataia nei, ta kotou i akarongo nei, kua tupu ïa i teianei rā.”

Kua umere atura taua aronga ra i tana “tuatua meitaki” ra e kua tuatua atu tetai ki tetai: “Kare aina teia i te tamaiti na Iosepha ra?” Inara i te kiteanga e te inangaro ra ratou kia akara iaia i te rave anga i te au semeio, kua tuatua atura a Iesu e: “E riro kotou i te akaaite mai iaku i te manga tuatua ra e, E te taunga ra, ka akaora ia koe uaorai: ko te angaanga taau i rave i ­Kaperenauma ra, ta matou i akarongo akenei, e rave katoa koe i ko nei i toou nei enua.” I te akara anga, kua manako te au tangata tupu o Iesu i mua ana ra e e mea tau kia akamataia te akaoraanga maki i tona kainga, ei puapinga no tona uaorai au tangata na mua. No reira kua manako ratou e kare a Iesu i manako atu ia ratou.

I te kiteanga i to ratou ra manakoanga, kua tuatua atura a Iesu i etai tuatua enua tau ra. E manganui te vaine takaua i Iseraela i te tuatau ia Elia, kua akakite atura aia, kare ra a Elia i tonokia kia ratou ra. Mari ra, kua aere atura aia ki tetai vaine takaua kare i to Iseraela i Sidona ra, i reira kua rave aia i tetai semeio akaoraanga. E i te tuatau ia Elisaia, e manganui te repera, mari ra ko Naamana anake no Suria ta Elisaia i akaora.

No te riri i taua au tuatua enua kare ra i rekaia e ratou tei akakite pu ra i to ratou tu noinoi e te akarongo kore, kua tu akera ratou ki runga i roto i te sunago e kua opara atura iaia ki vao i taua oire ra. I reira, i te nia o te maunga i akatuiaʼi a Nazareta ra, kua tauta ratou e titiri atu iaia ki raro. Inara kua aere ke atura a Iesu ia ratou e kua ora aia. Luka 4:​16-30; 1 Ariki 17:​8-16; 2 Ariki 5:​8-14.

▪ Eaa ra i tupu ei te manakonako anga i Nazareta ra?

▪ Eaa te manako o te au tangata ra no ta Iesu tutu anga, inara na teaa ratou i riri maataʼi?

▪ Eaa ta te au tangata ra i tauta e rave kia Iesu?