7. Eaa te akatutu anga ta Iesu i tuatua ki te au urupu tei aere maira kia akarongo atu kiaia ra?

⁷ Kua akakite maataia te puapinga o te manako tika no te Tuatua a te Atua ki roto i tetai o ta Iesu au parapore. I ta Iesu akakite anga i te tuatua meitaki i Paretaina katoa ra, kua akaputu atu te au urupu kia akarongo iaia ra. (Luka 8:1, 4) Inara, kare ko te katoatoa, tei inangaro tikai i te tuatua a te Atua ra. Kare e ekoko anga, e e manganui tei aere mai kia akarongo iaia no te mea kua anoano ratou kia kite i te au temeio me kare no to ratou rekareka i tana tu meitaki o te apiianga. No reira kua tuatua atura Iesu ki te au urupu ra i tetai akatutuanga: “Aere atura te ruru ua, e ruru i tana ua; e tei te ruru anga, topa iora tetai pae i te pae arataa; e takatakaiia iora, e kaingaia iora e te manu o te reva. Topa iora tetai pae ki runga i te ngai paikea; e tei te tupu anga ra, mae atura, no te mea kare i mauu. Topa iora tetai pae ki roto i te ngangaere; tupu katoa atura te ngangaere, pokia atura. Topa iora oki tetai pae ki te ngai one meitaki, tupu akera, e uua atura, taki tai anere i te ua okotai.”​—Luka 8:5-8.

9. Eaa te akatutuia maira e te ua tei topa (a) i te pae arataa ra? (e) ki runga i te ngai paikea? (ng) i te one ngangaere ra?

⁹ Kua tuatua a Iesu e ko tetai pae ua kua topa i te pae arataa e kua takatakaiia ki raro. Te taiku ra teia i te au tangata tei maata ra te apiapi e kua kore te ua o te Patireia e tupu ki roto i to ratou ngakau. I mua ake ka raukai ia ratou te akatupu inangaro no te Tuatua a te Atua “kua aere maira te diabolo, e kua rave ke atura i te tuatua i roto i to ratou ngakau ra, ko te akarongo aea ratou, e ko te ora aea.” (Luka 8:12) Kua topa tetai pae ua ki runga i te ngai paikea. Te taiku ra teia i te au tangata tei akara atura i te tuatua Pipiria mari ra kare i tuku i te reira kia tupu ki to ratou ngakau. Me tupu mai te patoianga me kare me kite ratou i te raveanga ngata kia akono i te akoanga Pipiria, kua “taka ke atura” ratou no te mea kare o ratou aka. (Luka 8:13) Te vaira i reira te aronga tei akarongo i te tuatua mari ra kua riro ke to ratou manako na te pokia e te au apiapi e te au apinganui “e te au mea navenave o teianei oraanga.” I te openga, mei te au ua tei tupu ra ki roto i te ngangaere, kua “pokia atura.”​—Luka 8:14.