Pene 42

Kua Kauvae Atura a Iesu i te au Pharisea

KUA taumaro atura a Iesu e me no Satani te mana i tuaru ei aia i te au temoni, kua mavete ke a Satani iaia uaorai i reira. E kua tuatua ua atura aia: “E akameitaki na i te rakau, e akameitaki katoa i tona ua; kare ra, e akakino i te rakau, akakino katoa i tona ua; te kitea nei oki te tu o te rakau i tona uaorai ua.”

E mea neneva kia akaapa e ko te ua meitaki no te tuaruanga i te temoni ki vao e tupu anga ia no ta Iesu tavinianga ia Satani. Me e meitaki te ua, kare e tau e e kino te rakau. I tetai pae, ko te au ua kikino a te au Pharisea ra, te akaapa kino e te patoi anga tau kore ia Iesu ra e akapapu anga te reira e e kino ratou uaorai. “E te anaunga vipera nei,” ta Iesu ia i tuatua, “eaa e tikaʼi ia kotou, te aronga kino, kia tuatua mai i te tuatua meitaki? no te ki oki o te ngakau ra e tuatuaʼi te vaa.”

I te mea te akaata maira ta tatou au tuatua i te tu o to tatou ngakau, na ta tatou tuatua e oronga mai i te tumu anga no te akavaanga. “Te karanga atu nei au ia kotou e,” e na Iesu ei, “e akavaia te tangata i te au tuatua puapinga kore katoa ta ratou e tuatua ra, kia tae ki te rā akavaanga ra. E akatikaia koe i taau tuatua, e akaapaia koe i taau tuatua.”

Noatu rai ta Iesu au angaanga mana katoa ra, kua pati atu te au tata tuatua e te au Pharisea ra: “E te Orometua, te inangaro nei matou kia kite matou i tetai akairo ia koe.” Penei kare teia papaki tangata no Ierusalema mai i kite tikai i tana au semeio ra, te vaira te akapapu anga a te aronga i kite mata tikai e kare e rauka kia akakoreia. No reira kua akakite atura a Iesu i te au arataki ngati Iuda ra: “E uki tangata kikino teia e te akaturi, te kimi nei i te akairo, kare ra e orongaia atu te akairo, mari ra te akairo i te peroveta ra ia Iona.”

I te akatakaanga i te aite anga o tana tuatua ra, kua na ko atura a Iesu: “Mei ia Iona oki, e toru ona po, e toru oki ao, i roto i te kopu o te ika maata ra; ka riro katoa te Tamaiti a te tangata nei, e toru ona po ki raro i te enua, e toru oki ao.” I muri ake i te apuku angaia e te ika ra, kua aere maira a Iona ki vao mei te mea rai e kua akatuakaouia, no reira te totou atura a Iesu e ka mate rai aia e i te toru o te ra ka akatuia mai kia ora. Inara, i to Iesu akatuakaou angaia i muri akera, kua kopae te au arataki ngati Iuda i ‘te akairo ia Iona.’

No reira a Iesu i karangaʼi e e tu mai te tangata o Nineve ki runga ki te akavaanga, tei tataraara ra i te tuatuaanga a Iona, e ka akaapa i te au ngati Iuda tei kopae ra ia Iesu. Mei te reira katoa, kua oronga maira aia i tetai aite anga ma te ariki vaine o Seba ra, tei aere maira no te openga o te enua kia akarongo i te pakari o Solomona ra e kua umere i tana i kite e i akarongo katoa ra. Kua akataka katoa maira Iesu: “E i na, e maata teia ia Solomona.”

Ei reira a Iesu i orongaʼi i te akatutuanga o tetai tangata tei aere mai ra tetai vaerua viivii ki vao iaia. Inara, kare taua tangata ra i akaki i te ngai i akarukeia ra ki etai apinga meitaki, e no reira kua oia aia e toko itu katoa vaerua kino ra. “Koia katoa oki teianei uki tangata kikino,” ko ta Iesu ia i karanga. Kua tamaia te iti tangata Iseraela ra e kua kite i te tu o te akaouia ra​—⁠mei te akaruke anga poto o te vaerua viivii ra. Inara na te kopae anga a te iti tangata i te au peroveta a te Atua ra, e tae roa ki tana patoi anga i te Mesia uaorai ra, te akakite maira i tona tu kino e e tere atu te kino i tei muatangana mairai.

Ia Iesu e tuatua ra, kua tae mai tona metua vaine e tona ai taeake e kua tu ua mai i te pae i muri ake i te aronga tini ra. E kua tuatua maira tetai e: “I na, te tu ua maira to metua vaine e to ai taeake ki vao, te inangaro i te tuatua mai kia koe.”

“Koai taku metua vaine? Koai oki toku ai taeake?” ko ta Iesu ia i ui atu. Kua tou atura tona rima ki tana aronga pipi, na ko maira, “I na, taku metua vaine, e toku ai taeake! Te akono i te inangaro o taku Metua i te ao ra, ko toku ïa taeake, taku tuaine, e taku metua vaine.” Na te reira mataara kua akaari maira a Iesu e noatu rai te akaperepereia o te au pirianga kopu tangata te ruru ra iaia kia ratou, e maata atu te akaperepere i tona pirianga ma tana au pipi ra. Mataio 12:​33-50; Mareko 3:​31-35; Luka 8:​19-21.

▪ Akapeea i kore ei e akariro te au Pharisea i te “rakau” e te “ua” katoa kia meitaki?

▪ Eaa te ‘akairo ia Iona,’ e akapeea te kopae angaia i muri akera?

▪ Eaa te arite anga o te iti tangata Iseraela o te anere mataiti mua ra ki te tangata i aere mai ra te vaerua viivii ki vao iaia ra?

▪ I akapeea ta Iesu akaketaketa anga i tona pirianga vaitata ki tana au pipi ra?