I te vaitata anga taua tangata ra kia Iesu kua akatopa maira ki tona vaevae, kua rave te au temoni tei mana ra ki runga iaia kia kapiki nui mai aia e: “Eaa taau iaku nei, e Iesu, e te Tamaiti a te Atua Teitei? Te pati atu nei ia koe i te ingoa o te Atua, auraka koe e akamamae iaku.”

“Ko Manotini toku ingoa, e manganui oki matou,” ko tana ia i pau mai. Te mataora ra te au temoni i te akaraanga i te mamaeanga te aronga ta ratou i uru ra, penei te rekareka ra ratou i te aere kapitianga ki runga i te tangata ma te tu vaerua mataku ua. Inara i te aravei anga ia Iesu, kua pati ratou auraka e tukuia ki roto i te vaarua. Kua kite akaou tatou e e mana maata to Iesu; e kua rauka iaia i te akavi i te au temoni riri nui ra. Te akakite katoa maira te reira e kua kite te au temoni e ko ta te Atua ra akavaanga no ratou e to ratou arataki, koia a Satani te Tiaporo; ka tiriia ratou katoatoa ki roto i te vaarua.