Pene 45

Tetai Kare i Manakoia ei Pipi

MEI teaa ra te akaraanga mataku i to Iesu takai atu anga ki taatai. E rua nga tangata tu ke rai te riri no roto i te ngai tanumanga i te pae mai e kua oro atu kiaia ra. Kua uruia raua e te temoni. I te mea e kino atu te riri o tetai i tetai ra e kua roa tona mamae anga i raro i te mana temoni, kua riro ko ia tei manako maataia.

No te tuatau roa teia tangata tau kia aroaia i te nooanga kakau kore ua i te au tanumanga ra. E, i te ao e te po, kapiki aere uaʼi ma te kotikoti iaia uaorai ki te toka. I te maata o tona riri kare e tangata e akatikaia kia aere na taua mataara ra. Kua tautaia no te tapeka anga iaia, inara kua motu te pirianganaoa e kua atiati te auri iaia i tona vaevae ra. Kare i rauka i tetai tangata i te akavi iaia.

I te vaitata anga taua tangata ra kia Iesu kua akatopa maira ki tona vaevae, kua rave te au temoni tei mana ra ki runga iaia kia kapiki nui mai aia e: “Eaa taau iaku nei, e Iesu, e te Tamaiti a te Atua Teitei? Te pati atu nei ia koe i te ingoa o te Atua, auraka koe e akamamae iaku.”

Kua tuatua ua atu a Iesu: “Ka aere koe ki vao, e tenana vaerua viivii, i tenana tangata.” E kua ui atura Iesu: “Koai toou ingoa?”

“Ko Manotini toku ingoa, e manganui oki matou,” ko tana ia i pau mai. Te mataora ra te au temoni i te akaraanga i te mamaeanga te aronga ta ratou i uru ra, penei te rekareka ra ratou i te aere kapitianga ki runga i te tangata ma te tu vaerua mataku ua. Inara i te aravei anga ia Iesu, kua pati ratou auraka e tukuia ki roto i te vaarua. Kua kite akaou tatou e e mana maata to Iesu; e kua rauka iaia i te akavi i te au temoni riri nui ra. Te akakite katoa maira te reira e kua kite te au temoni e ko ta te Atua ra akavaanga no ratou e to ratou arataki, koia a Satani te Tiaporo; ka tiriia ratou katoatoa ki roto i te vaarua.

E anana puaka e 2,000 te kai ra i te pae mai i runga i te maunga ra. No reira kua karanga atura te au temoni: “E tuku koe ia matou kia tomo ki roto i tera ra anana puaka.” I te akara anga e mea mataora na te au temoni i te akanavenave ia ratou uaorai na te pokia anga i te au kopapa o te au mea ora e kiko to ratou ei mea tuke roa. I ta Iesu tuku anga ia ratou kia tomo ki roto i te au puaka ra, kua oro atu te 2,000 katoatoa o ratou ra na runga atu i te mato e topa atu ki raro i te tai.

I te kite anga te aronga tiaki puaka i te reira, kua oro atura ratou e akakite ki te oire e ki te au ngai katoa i reira ra. Kua aere katoa maira te au tangata kia kite i taua apinga i tupu ra. I to ratou tae atu anga, kite atura ratou i taua tangata i aere maira te au temoni ki vao iaia ra. E ina kua kakau aia i te kakau, e te meitaki ra te manako, te noo ra i te pae vaevae o Iesu!

Kua tuatua te aronga i kite mata e i akapeea i oraʼi taua tangata ra. Kua akakite katoa ratou ki te au tangata ra i te matenga tuke roa o te au puaka ra. I te akarongo anga te au tangata i te reira, tupu atura te mataku kia ratou, e kua manono akatenga atura ratou ia Iesu kia akaruke i to ratou ngai. E kua akatika aia, aere atura na te pai. Kua pati atura taua tangata i nooia e te temoni ra kia Iesu kia tuku iaia kia aru atu. Inara kua karanga atura Iesu ki aia: “Ka aere i to ngutuare i toou au taeake, e akakite atu kia ratou i taua mea maata ta [Iehova, NW] i rave io nei i te aroa ia koe.”

E mea matauia na Iesu i te apii atu i tei akaoraia e ia e auraka e akakite ki te tangata, no te mea kare aia e anoano kia manako i te au tumu no te au ripoti akamanako ngakau ra. Inara e mea tau teia tuke anga no te mea ko taua tangata tei oia ra e te temoni ka akakitekite aere ki te au tangata penei kare e tuatau no Iesu kia tuatua atu kia ratou ra. Pera katoa oki, na te kite anga i taua tangata ra e oronga i te akapapu anga i to Iesu mana no te rave i te meitaki, e te akakoreanga i etai ua atu ripoti tei tau kore penei ka tuatua aereia no te mate anga te au puaka ra.

I te rave anga i ta Iesu i akaue atura, kua aere atu taua tangata i oia ra e te temoni i mua ana. Kua akamata aia i te akakite aere i te au mea katoa ta Iesu i rave kiaia e takapini i te Dekapoli ra, e kua umere tikai te au tangata katoa ra. Mataio 8:​28-34; Mareko 5:​1-20; Luka 8:​26-39; Apokalupo 20:​1-3.

▪ Eaa ra, i tukuiaʼi te manako anga ki runga i te okotai anake o nga tangata e rua tei oia ra e te temoni?

▪ Eaa te akakite maira e kua kite te au temoni e ka tiria ratou ki roto i te vaarua a te tuatau ki mua?

▪ I te akara anga, eaa te au temoni i rekarekaʼi kia o atu ki roto i te au tangata e te au manu?

▪ Eaa a Iesu i akatakaʼi i te tangata mua tei oia ra e te temoni, ma te akaueanga iaia kia akakite kia etai atu i Tana i rave nona ra?