Pene 46

Kua Akatukiia Aia i Tona Kakau

KUA tae atura te tuatua ki Kaperenauma no to Iesu oki mai anga mei te Dekapoli ra, e aronga tini tei akaputu atu ki taatai e aravei atu iaia ra. Kare e ekoko anga e kua akarongorongo ratou e i akamarino ana aia i te matangi e i akaora katoa oki i nga tangata tei oia e te temoni ra. Ei reira, i tona takai anga ki taatai, kua akaputu atura ratou e takapini iaia, ma te manakonako anga e te inangaro katoa kia kite iaia ra.

Ko tetai i o ratou tei inangaro ra kia kite ia Iesu ko Iairo, e tutara ia no te sunago. Kua topa iora ki te vaevae o Iesu e kua pati, e te pati akaou anga. “Kua vaitata taku tamaine iti i te mate, ka aere maira koe, e tuku i to rima ki runga iaia, kia meitaki aia, e ka ora ïa aia.” I te mea koia anake tana tamaine e 12 ua mataiti, e tamaine akaperepere ia na Iairo ra.

Kua akatika a Iesu, e kua aru katoa te aronga tini ra iaia, kua aere atura ki te kainga o Iairo. Ka rauka ua ia tatou i te tamanako i te tu rekareka o te au tangata ra i te manakonako anga i tetai atu semeio kia raveia. Inara kua vai te manako o tetai vaine i taua aronga tini ra ki runga i tona uaorai manamanata kino roa.

E 12 mataiti te roa, i makiiaʼi taua vaine ra i te atekeria. Kua aere ana aia ki tetai taote i muri ake i tetai, e kua pou tana moni i te kimi i tetai au rapakau anga. Inara kare aia i meitaki mai; mari ra, kua kino roa atu tona maki.

Mei tei tau kia ariki koe e, kapiti atu ki te akaapikepike kino iaia, e mea akama tikai tona maki e te taakaakaanga. Kare tetai e tuatua ua i te reira maki i te ngai tangata ra. Pera katoa oki, i raro ake i te Ture a Mose ka akariro te tae anga toto i te vaine kia viivii, e ko tetai te ka amiri atu iaia me kare i tona kakau tei tou ra i te toto ka umuumuia aia kia orei iaia uaorai e ka vai tona tu viivii e aiai roa.

Kua akarongo ana te reira vaine i ta Iesu au semeio i rave e kua kitea iaia i teianei. I te mea e viivii aia, kua na roto ua atu aia i te aronga tini ra e pipini aere kia kore e kiteia, e te na ko anga kiaia uaorai: “Kia akatukia ua atu au i tona kakau, ka ora ïa au.” I tona rave anga i te reira, viviki ua ra tona kite anga e kua mao iora taua atekeria nona ra i reira!

“Koai ra tei akatukia mai iaku nei?” Mei teaa ra tona poitirere i taua au tuatua na Iesu ra! Akapeea aia i kite ei? Kua karanga atura Petero: ‘E te Orometua,’ ‘te ototi nei te tangata tini ia koe, e kua tuatua koe, “Naai i akatukia mai kiaku?” ’

I te kimi anga i taua vaine ra, kua akataka maira Iesu: “Kua akatukia mai tetai iaku; kua kite oki au e, e mana tei riro atu na no ko nei atu iaku nei.” E tika, kare i te akatuki ua nei, no te mea ko te akaoraanga tei tupu te rave ke atura i to Iesu maroiroi.

I te kiteanga te vaine ra e kare aia i kore i kitea, kua aere maira taua vaine ra kua topa maira ki raro ki mua ia Iesu, ma te mataku e te ruketeketeanga. I mua i te au tangata katoa ra, kua akakite aia i te tika katoa no tona maki ra e i akapeea i orai aia i reira tikai.

I te manako anga i tana aaki anga papu, kua akapumaana aroa atura Iesu iaia: “E taku tamaine, kua ora koe i toou akarongo, ka aere koe ma te au, e ma te ora i to maki.” Mei teaa ra te meitaki kia kite e ko Tei ikiia e te Atua ei tutara i te enua nei e peretana pumaana, e te aroa, te manako maira i te au tangata e tei iaia te mana no te tauturu ia ratou ra! Mataio 9:​18-22; Mareko 5:​21-34; Luka 8:​40-48; Levitiku 15:​25-27.

▪ Koai a Iairo, e eaa ra aia i aere mai ei kia Iesu?

▪ Eaa te manamanata o tetai vaine ra, e eaa i rave anga ngataʼi nona kia aere mai kia Iesu no tetai tauturu?

▪ I akapeea i oraʼi taua vaine ra, e i akapeea ta Iesu akapumaana iaia ra?