Pene 47

Riro Atura te Roimata ei Rekareka Maata

I TO Iairo kite anga i te akaora angaia te vaine e maki atekeria tona, kare e ekoko anga e kua maata atu tona irinaki anga i to Iesu ra mana rave semeio. I taua ra ra, i mua poto akera, kua pati atura Iairo kia Iesu e aere atu e tauturu i tana tamaine akaperepere e 12 ona mataiti, te takoto ra e vaitata ra i te mate. Inara, i reira tikai kua tupu ta Iairo i mataku maata ra. Ia Iesu e tuatua atura ki taua vaine ra, kua tae maira etai nga tangata e kua akakite marie atura kia Iairo: “Kua mate rava to tamaine; eaa koe e tamanamanata ei i te Orometua?”

Mei teaa ra te kino o te reira nuti! E tamanako ana: Ko te reira tangata, tei iaia ra te akangateitei anga maata i te reira ngai, kare takiri aia i kite eaa tana ka rave i tona kite anga e kua mate tana tamaine. Inara, kua akarongo atu a Iesu i ta ratou tuatua anga. Kua ariu atura aia kia Iairo, kua tuatua akamaroiroi atura: “Auraka e mataku, ka akarongo ua mai koe.”

Kua aere kapiti atura Iesu ma taua tangata ngakau mii ra ki tona kainga. I to ratou tae atu anga, kite atura ratou i te aue e te tangi maata. E urupu tangata tei akaputu atu ki reira, e te papa ra ia ratou uaorai no te mamae ngakau. I to Iesu tomo atu anga ki roto, kua karanga atura aia: “Eaa kotou i eaʼi, e i maataʼi to kotou aue? Kare te tamaine nei i mate, kua moe ra.”

I te akarongo anga i te reira tuatua, kua taitoito maira taua aronga ra ia Iesu no te mea kua kite ratou e kua mate tikai te reira tamaine. Inara, kua karanga a Iesu e te moe ua ra aia. Na te rave anga i tona mana no ko mai i te Atua ra, ka akaari aia e ka rauka ngoie ua i te akaoki mai i te tangata mei te mate mei ia ratou rai i moe tinainai maira.

Ei reira kua tono atura Iesu i te au tangata katoatoa ki vao mari ra ko Petero, ko Iakobo, ko Ioane, e te metua vaine e te metua tane o te tamaine mate ra. Kua arataki atura aia i teia nga tangata tokorima ma ia katoa ra ki te ngai e takoto ra taua tamaine ou ra. Kua mou atura i te rima o taua tamaine ra, kua na ko atura Iesu: “Talita kumi,” tera te aiteanga me uriia: “E maine, ka tu ki runga!” Kua tu maira taua tamaine ra ki runga i reira, aaere iora! No te akara anga iaia e vaitata i te ngaro ke te manako o tona nga metua no te maata o te rekareka.

I muri ake i te akaue anga kia orongaia te manga na taua tamaine ra kia kai, kua ako ua atura Iesu ia Iairo raua ko tana vaine e, auraka rava e akakite atu ki te tangata i tei tupu ra. Inara noatu ta Iesu i tuatua atura, kua totoa te tuatua no te reira ki tera enua katoa. Ko te rua teia o te tuakaouanga ta Iesu i rave ra. Mataio 9:​18-26; Mareko 5:​35-43; Luka 8:​41-56.

▪ Eaa te nuti tei orongaia kia Iairo, e i akapeea ta Iesu akamaroiroi anga iaia?

▪ Eaa te tu i to ratou tae atu anga ki te kainga o Iairo?

▪ Eaa a Iesu i karangaʼi e te moe ua ra taua tamaine tei mate ra?

▪ Koai te tokorima ma Iesu katoa ra tei kite i taua tuakaouanga ra?