Pene 51

Ta Ua i te Tuatau Tamataora Ra Anau Anga

I MURI ake i te apii anga i tana au apotetoro, kua akaunga atura Iesu ia ratou kia aere ki te ngai no te tutu aere e tataki rua i te aere anga. Penei ko nga taeake kapitiia ko Petero raua ko Anederea, ko Iakobo raua ko Ioane, ko Philipa raua ko Baratolomea, ko Toma e Mataio, ko Iakobo e Tadaio, e Simona raua ko Iuda Ikariota. Kua akakitekite teia nga pupu tutu evangeria e ono i te tuatua meitaki o te Patireia e kua rave i te semeio akaora maki i te au ngai ravarai ta ratou i aere atu.

Te vaira a Ioane Papetito i roto i te are tapekaanga. Kua vaitata i te rua mataiti iaia ki reira. Penei te maara ra ia koe e kua akakite a Ioane ki te ngai tangata e e tarevake no Heroda Anatipa kia rave ia Herodia, koia te vaine a tona taeake ko Philipa, ei vaine nana uaorai. I te mea kua karanga a Heroda Anatipa e te aru ra aia i te Ture a Mose, kua tau ta Ioane akakite anga i teia kapitianga akaturi. No reira kua tiria e Heroda a Ioane ki roto i te are tapekaanga, penei na Herodia i raurau atu.

Kua kite mai a Heroda Anatipa e e tangata tuatua tika a Ioane e kua mareka i te akarongo atu kiaia. E no reira kua ngaro iaia e kare i kite e eaa tana ka rave kiaia. I tetai tua, kua makitakita a Herodia ia Ioane e kua kimi tamou e tamate iaia. I te openga ra, kua va mai te tuatau tana i tapapa ra.

I mua poto ake i te Pasa o te 32 T.N., kua akapapa a Heroda i tetai akaputuputuanga maata no tona ra anau anga. Kua uipa maira te aronga mana e te au opita vaeau a Heroda ra, pera katoa te aronga nunui i Galilea. I te roa anga taua aiai ra kua tonokia a Salomi, koia te tamaine mapu a Herodia na tana tane mua na Philipa, kia ura na te au manuiri. Kua va ua te aronga tane tei matakitaki i tana ura anga.

Kua mareka tikai a Heroda ia Salomi e kua karanga atura aia: “E pati ua mai koe iaku i taau ua ka inangaro, e ka oronga atu au i te reira kia koe.” E kua taputou katoa aia: “Taau ua atu ka pati mai ki aku nei, ka oronga atu au i te reira kia koe, e tae roa ki te apa o toku patireia.”

I mua ake i te pau anga iaia, kua aere atura a Salomi e kua ui atu ki tona metua vaine. “Eaa taku kia pati?” ko tana ia i ui atu.

Kua rauka mai taua tuatau ra i reira! Kua pau atura a Herodia ma te tapupu kore: “Te mimiti o Ioane Papetito!”

E viviki ua a Salomi i te oki atu kia Heroda e kua pati kiaia: “Ka inangaro au ia koe kia oronga mai ki aku i teianei te mimiti o Ioane Papetito ki runga i tetai mereki.”

Kua manamanata maata a Heroda. Inara no te mea i akarongo ana tana au manuiri i tana taputou ra, kua akama aia me ka kore e orongaia te reira, noatu rai e ka taia tetai tangata apa kore ra. Kua tono vivikiia atu te tangata tamate ki te are tapeka ma tana au akauenga rikarika ra. Kare i roa ana kua oki maira ma te mimiti o Ioane i runga i te mereki, e kua oronga atu aia i te reira kia Salomi. E kua apai atura aia ki tona metua vaine. I te akarongo anga te au pipi a Ioane i tei tupu ra, kua aere atura ratou kua tiki i te kopapa e kua tanu i te reira, e kua aere atu e akakite kia Iesu.

I muri akera, no to Heroda akarongo anga i ta Iesu akaora anga i te au tangata e te tuaru anga i te temoni, kua mataku aia, i te manako anga e penei ko Ioane a Iesu tei akatuia mei te mate maira. I muri akera kua inangaro maata aia kia aravei ia Iesu, kare e kia akarongo i tana tutu anga, mari ra kia akapapu e me e tika tana e mataku ra e me kare ainei. Mataio 10:​1-5; 11:1; 14:​1-12; Mareko 6:​14-29, NW; Luka 9:​7-9.

▪ Eaa ra e tei roto a Ioane i te are tapekaanga, e eaa a Heroda i kore ei e inangaro kia tamateia aia ra?

▪ I te openga ra, i akapeea i raukaʼi ia Herodia i te rave kia tamateia a Ioane?

▪ I muri ake i to Ioane ra matenga, eaa a Heroda i inangaro ei kia aravei atu ia Iesu?