Kua Rave Ratou i to Iehova Anoano

Kua Tono a Iesu e 70 Au Pipi

KO TE tuatau pururu anga rau rakau te reira o te 32 T.N. E ono marama rai toe i mua ake i to Iesu mate anga. No reira, e raukaʼi i te akarapurapu i te angaanga tutu aere e e akamaata i te terenianga o etai o tana au pipi, kua tono aia e 70 au pipi e kua “tataki toko rua atura i te tono anga ia ratou na mua iaia i te au oire, e te au ngai ravarai tana i akakoro e, e aere katoa aia ki reira.”​—Luka 10:1.a

Kua tuku a Iesu i tana au pipi “na mua iaia” e raukaʼi i te au tangata i te iki viviki atu me no te Mesia ratou e me kare me tae mai a Iesu uaorai a muri mai. Inara eaa aia i tono ei ia ratou “tataki toko rua atura”? Te tika, e raukaʼi ia ratou kia riro ei akamaroiroianga ki tetai e tetai me aro atu i te patoi anga.

Te tuatua pakari anga i te rapurapu anga o ta ratou angaanga tutu aere, kua akakite a Iesu ki tana au pipi: “Te maata ua nei te mou, te iti nei ra te aronga e kokoti: e teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Luka 10:2) Kua tau te akaaite anga ki tetai kokoti anga mou, i tetai ua atu taroaroa anga i te tuatau kokoti anga ka akatupu ia i te kaimoumou anga i te au kai puapinga. Pera katoa, me akangaropoina te au pipi i ta ratou angaanga tutu aere anga, ka mate te au oraanga akaperepereia!​—Ezekiela 33:6.

Au Orometua Tamanata Koreia

Kua ikuiku a Iesu i tana au pipi: “Auraka ei āriki moni e taoiia, auraka ei pute, auraka ei tamaka: auraka e aroa ua atu i te tangata i te arataa ra.” (Luka 10:4) E mea matauia no tetai tangata tutaka kia apai kare te pute e te kai anake ua mari katoa ra tetai tamaka akaou, ko te pou aea te au poro vaevae e e motu te au itiki. Inara kare te au pipi a Iesu i anoanoia kia manata i teia au mea. Mari ra, kia irinaki ratou e ka akono Iehova ia ratou na roto i te au taeake Iseraela, no te mea e peu matauia te tu oronga ua.

Inara eaa a Iesu i tuatuaʼi ki tana au pipi auraka e aroa ua atu i tetai tangata? Kia anu ainei ratou, pera katoa te kino? Kare rava! Te tuatua Ereni a·spaʹzo·mai, te aiteanga kia takave i roto i tetai araveianga, penei e maata atu tona aiteanga i tetai “kia ora” maru ua nei me kore “ra meitaki.” Penei ka kapiti katoa mai te reira i te au ongi matauia, te au takave anga, e te au pukapuka anga roa te ka tupu me aravei e rua nga oa. Kua akakite tetai tangata tuatua: “Kare te au tuatua aroa i rotopu i te au tangata Orieni i vai ana, i rotopu ia tatou ra, tetai manga piko anga o te katu, me kore akatoro anga o te rima, inara kua raveia na roto i te au takave anga maata, e te au tuturi anga, e pera katoa te au tupou anga o te kopapa ki runga i te one. Kua umuumu pouroa teia i te taime maata.” (Akaaite ia 2 Ariki 4:29.) No reira kua tauturu a Iesu i tana au pipi kia kopae i te tamanata anga anoano koreia, noatu e e mea matauia.

I te openga, kua akakite a Iesu ki tana au pipi e me tomo ratou ki roto i tetai are e kua arikiia mai, ka tau ratou “i taua are rai noo ei, e kai ua rai i te kai, e inu ua rai oki, i ta ratou [ka] oronga mai.” Inara me tomo ratou ki roto i tetai oire e kare i ariki meitakiia mai, “e aere atu [ratou] ki vao ki to reira au arataa, e karanga atu ei, Te one o to kotou oire i piri mai kia matou, e orei atu nei matou, ei akakite anga atu kia kotou.” (Luka 10:7, 10, 11) Te oreianga me kore te oreianga i te one o tetai vaevae te aiteanga e te akaruke ra te au pipi ma te au i te are me kore te oire kare i ariki ra ki te au tupu anga te ka aere mai mei ko mai i te Atua i te openga ra. Inara i te aronga tei ariki i te au pipi a Iesu ma te takinga meitaki te tuku ra ia ratou uaorai ma te au akameitakianga. Kua akakite a Iesu ki tana au pipi i tetai atu ati anga: “Ko te kite mai ia kotou, kua kite mai ïa iaku, e te kite mai iaku nei, kua kite mai ïa i tei tono mai iaku nei. E ko te ka o mai i tetai kapu vai anu na tetai o teianei aronga tangata rikiriki, no te mea e pipi aia naku, tikai taku e karanga atu kia kotou, Kare takiri aia e ngere i te tutaki.”​—Mataio 10:40, 42.

Au Apiianga na Tatou

Te tuku anga angaanga kia tutu aere i te tuatua meitaki o te Patireia o te Atua e te akariro anga ei au pipi te raveia ra i teianei e tere atu i te 5,000,000 Au Kite o Iehova i te ao katoa. (Mataio 24:14; 28:19, 20) Kua kite ratou e e tuatua rapurapu ta ratou. No reira, te taangaanga meitaki ra ratou i to ratou taime, te kopaeanga i te au tamanamanata anga te ka arai ia ratou mei te rave pakari anga tikai i ta ratou angaanga puapinga.

Ka tauta te Au Kite o Iehova kia akaari i te tu meitaki ki te katoatoa ta ratou ka aravei. Pera katoa, kare ratou e o ngoie ua ki roto i te au pukapuka anga puapinga kore, e kare katoa ratou e taii ki roto i te au taumaro anga no runga i te au manako tangata me kore te tauta anga autu kore a teianei ao no te akatikatika i te au tika kore. (Ioane 17:16) Mari ra, ka akatumu ratou i ta ratou uriuri anga ki runga i te pauanga roa anake ua ki te au manamanata o te tangata nei​—te Patireia o te Atua.

I te maata anga o te taime, e kiteia ana te Au Kite o Iehova e angaanga tataki rua ra. Kare ainei e e maata atu ta ratou ka akatupu naringa ratou i angaanga tataki tai ua? Penei paa. Noatu ra, te kite ra te Au Kerititiano i teia tuatau i te puapinga o te angaanga anga i te pae i tetai e tetai ma tetai taeake irinaki. Ka riro te reira ei manga paruru anga i te tutu aereanga i te au ngai kino. Na te angaanga anga ma tetai tokorua e rauka katoaʼi i te aronga ou kia puapinga mei te tu karape o te au papuritia karape maata atu i te tuatua meitaki. Te tika, ka riro nga tokorua ei akamaroiroi anga i tetai e tetai.​—Maseli 27:17.

Ma te ekoko kore, ko te angaanga tutu aere te angaanga rapurapu roa atu e raveia ra i teia “tuatau openga.” (2 Timoteo 3:1) Te mataora ra te Au Kite o Iehova no te turuturu anga a tetai akataeake anga ao katoa ta ratou e angaanga ra i te ‘uapou anga ravarai i te akarongo i te evangelia nei.’​—Philipi 1:27.

[Tataanga Rikiriki i Raro]