Pene 74

Ako ia Mareta, e te Apii no te Pure

I TE tuatau o ta Iesu angaanga tutu aere i Iudea, kua aere atu aia ki te oire meangiti i Betania. Ko te ngai teia i noo ei a Mareta, a Maria e to raua tungane katoa koia a Lazaro. Penei kua aravei ke ana a Iesu i teia nga tangata e toru i mua akera, iaia i rave ra i te tutu aere anga, e kua riro mai ratou ei oa piri vaitata. I na kua aere atura Iesu ki te are o Mareta e kua turouia maira aia.

Kua varenga a Mareta i te akapapa i tana au apinga meitaki rava na Iesu. E akangateitei anga maata kia aere atu te Mesia tei taputouia ra ki te ngutuare o tetai tangata! No reira kua rave a Mareta i te teateamamao anga i te manga meitaki e te raverave anga i etai atu mea e manganui tei tau ei akariro kia rekareka e kia pumaana to Iesu noo anga ki reira.

I tetai pae, kua noo te tuakana o Mareta koia a Maria i te pae vaevae o Iesu, i te akarongo anga kiaia. I muri akera, kua aere mai a Mareta e kua tuatua maira kia Iesu: “E te Atu, kare koe e akono mai, ko au anake teia rave uaʼi, kua akaruke mai nei toku taeake iaku? e karanga atu koe kiaia e rave katoa mai.”

Inara kare a Iesu i tuatua atu kia Maria. Kareka ra, kua ako atura aia ia Mareta no te apiapi maata i te au apinga kopapa. Kua ako aroa atura aia: “E Mareta e, e Mareta, kua apiapi koe, e te manamanata ra i te au mea katoa e manganui. E tokoiti ua, me kare e okotai rava ra mea e anoanoia.” (NW) Te karanga ra a Iesu e kare e tau kia akapou e roa te tuatau no te teateamamao kia rai te kai tuke tuke no te kaikai. Kia tokoiti ua me kare kia okotai ua kua rava ia.

E meitaki ra te manako o Mareta; te inangaro ra aia ei vaine akono meitaki i te manuiri. Inara, na tona manako apiapi no te au apinga kopapa, kua ngere aia i te tuatau e raukai te apiianga mei ko mai i ta te Atua uaorai Tamaiti ra! No reira kua tuatua taopenga atura Iesu: “E kua inangaro oki a Maria nei i taua tuanga meitaki nei, kare rava oki tana e riro ke.”

I tetai atianga i muri akera, kua pati atura tetai pipi kia Iesu: “E te Atu, e apii mai ia matou nei i te pure, mei ia Ioane i apii katoa atu i tana au pipi.” Penei kare te reira pipi i reira i te mataiti e te apa i topa i mua akera i ta Iesu oronga anga i te pure akaraanga i tana Tuatua i te Maunga ra. No reira kua taiku akaou atura Iesu i tana apiianga e kua oronga katoa oki i te akatutu anga ei akaketaketa i tei umuumuia no te rave tamou i te pure.

Kua karanga atura Iesu: “E oa to tetai i o kotou na, ka aere atu ei aia kiaia i te turuaipo, ka karanga atu ei kiaia ra e, E taku oa, o mai ana e toru manga; Kua tapae mai nei tetai oa oku nei i tona aerenga, e kare aku kia tuku atu i mua i tona aroaro. E kia tuatua mai aia i roto ra, kia na ko mai, Auraka e akapekapeka mai iaku: kua tamouia te pa, tei runga au i te roi e taku au tamariki katoa; kare e tika iaku kia tu ki runga e o atu naau. E akakite atu au kia kotou, Kore ua aia i tu ki runga e oronga atu i te mea e oa aia nona; e tu ra aia i te pati akatenga, ka oronga atu ei i tana i anoano ra.”

Kare te aite anga o teianei akatutuanga e kare te Atua ko Iehova e rekareka i te akarongo mai i te au patianga, mei tera oa o te tangata i tana tua ra. Kare, tera ra te akatutu maira aia e me ka akarongo te oa ki te au patianga akatenga kare ra aia i marekaia, mei teaa atura te maata atu o to tatou Metua aroa i te rangi ra! E kua tuatua ua atura Iesu: “E karanga atu oki au kia kotou, E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou. Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.”

Ei reira kua taiku atura Iesu no te au metua tangata apa ua nei, kua na ko atura: “Koai ia metua i o kotou nei, e kia pati mai tana tamaiti i te ika, e apai atu aina i te ovi nana ei ika? E kia pati aia i te ua moa, e apai atu aina i te sekopio? E te tika na ia kotou, kino ua rai, kia oronga i te mea meitaki no ta kotou tamariki, mei teaa atura te maata o ta te Metua i te rangi oronga i te vaerua tapu ki te aronga tei pati atu kiaia ra!” E tika rava, e akamaroiroi anga akakeu tikai ta Iesu i oronga maira kia rave tamou marie i te pure. Luka 10:​38–11:13.

▪ Eaa ra i maataʼi ta Mareta teateamamao anga no Iesu?

▪ Eaa ta Maria i rave, e eaa ra a Iesu i tuatua akameitaki ei iaia e kare ia Mareta ra?

▪ Na teaa i akakeu ia Iesu kia taoki akaou i tana apiianga no te pure?

▪ Akapeea ta Iesu akatutu anga i tei umuumuia no te rave tamou i te pure?