Te ‘Maata ra Ainei Taau Apinga ki te Atua Ra’?

I ROTO i te au parapore akakeu anga manako e manganui tei orongaia mai e Iesu Karaiti, ko tetai no runga ia i tetai ona enua apinga nui. I te tauta anga kia akapapu tinamouia tona uaorai oraanga no te tuatau ki mua, kua parani te ona enua kia patu i te au are kai mamaata atu. Inara, i roto i ta Iesu akatutuanga, kua kapikiia te tangata e e “neneva!” (Luka 12:16-21) E taangaanga katoa ana rai tetai au urianga Pipiria e manganui i te tuatua “auouo.” No teaa ra te akavaanga pakari?

I te akaraanga, kare roa te Atua i kapitiia mai ana ki roto i te au parani a teia tangata apinganui, e kare katoa aia i oronga ua atu ana i tetai akameitakianga ki te Atua no te puapinga o te enua. (Mataio 5:45) Mari ra, kua ngakau parau aia: “E taku vaerua e, e apinga maata toou, kua uipa ïa ki te vairanga no te au mataiti e manganui; e akaangaroi marie.” Ae, kua manako oki aia e ko te puapinga o tana au tautaanga ka riro ia ei “patu teitei ra.”​—Maseli 18:11.

I te akamatakite anga i taua tu akaparau ra, kua tata te pipi ko Iakobo: “E teianei, ko kotou ko tei karanga e, E aere tatou akonei e apopo ki roto i te oire ra ko mea, ka oko ei e kia okotai ake mataiti i te oko anga, e kia rauka mai te apinga: Kotou oki ko tei kore i kite i te ka tupu apopo: eaa oki to kotou ora anga nei? e auai ïa, no vaivai ake, e roa poto akera, ngaro atura ïa.”​—Iakobo 4:13, 14.

Tika atura ki taua au tuatua ra, kua karangaia atu ki te tangata apinganui i roto i ta Iesu parapore e: “E tera ra neneva e! ei teianei rai po e tiki naia mai ei toou vaerua: noai iora tenana au apinga taau i akaputu na?” Mei te auai e ngaro atura, ka mate atu te tangata apinganui i mua ake ka kite ei aia i tana moemoea i te akatupu angaia. Te kite ra ainei tatou i tetai apiianga? I karanga ei Iesu: “Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.” Te ‘maata ra ainei taau apinga ki te Atua ra’?