Te Tare ra Ainei Koe i te Tutaki Anga?

KUA oronga atu a Iesu Karaiti i te manakonakoanga no te ora mutu kore ki tana au pipi, inara kua raurau katoa aia ia ratou kia tare i te tutaki anga no te riro anga mai ei Kerititiano. Kua akatutu mai aia i teia manako na te ui anga: “Koai ïa tangata i o kotou na, kia akakoro i te are e akatu, kare e timata ana i te noo ki raro, ka tatau ei i te apinga ei ou e oti ei [me kare, ka tare i te tutaki anga], i te rava anga tona apinga?” (Luka 14:28) Eaa te tutaki anga ta Iesu e tuatua nei?

Te aro atura te au Kerititiano katoatoa i te au timata anga​—etai e mea pakari. (Salamo 34:19; Mataio 10:36) No reira, ka anoanoia tatou kia akateateamamao i te pae manako e te pae vaerua kia kore tatou e poitirere me aere mai te patoi anga me kare tetai atu au manamanata kia tatou. Kia kite ke ana tatou i taua au akaaoanga te o maira i roto i te riro anga mai ei pipi na Karaiti, te kite anga e ko te tutaki anga​—te ora mei te ara e te mate​—e puapinga maata atu ia i tetai apinga te ka orongaia mai kia tatou e teia akatereanga. Ae, kare e rauka i tetai apinga ta te Atua ka tuku mai​—pera te mate​—i te akakino tamou ia tatou me rave ua atu tatou i te tavini iaia.​—2 Korinetia 4:​16-18; Philipi 3:8.

Akapeea to tatou akarongo i te riro anga mai kia maroiroi? Te tupu maroiroi ra to tatou akarongo i te au taime taki tai me akono tatou i te iki anga tau, te akono tamou anga i te au kaveinga Kerititiano, me kare te rave rotai anga i tetai angaanga ma te anoano o te Atua​—koia tikai ia tatou i raro i te taomi anga kia rave tuke. Me kite tatou uaorai i ta Iehova au akameitakianga tei tupu mai no to tatou aerenga tiratiratu, te akaketaketaia ra to tatou akarongo e te akaoonuia ra. Na roto i taua mataara, te aru ra tatou i te akaraanga o Iesu, tana au pipi mua, e te au tane e te au vaine akarongo na roto mai i te au tuatau i topa ra tei ‘tare meitaki i te tutaki anga’ no te tavinianga i te Atua.​—Mareko 1:​16-20; Ebera 11:​4, 7, 17, 24, 25, 32-38.