Pene 87

Apapa no te Tuatau ki Mua ma te Pakari Taangaangaia

KOI oti ua akera ta Iesu tuatua anga i te tua no te tamaiti kaimoumou apinga ra ki te urupu tei kapiti katoa ra i tana au pipi, te aronga koi tero tiratiratu kore ra e etai atu aronga rave ara tei matauia ra, te au tata tuatua e te au Pharisea katoa oki. I reira, i te tuatua anga ki tana au pipi, kua akakite atu aia i tetai akatutu anga no runga i tetai tangata apinga nui tei rauka maira iaia tetai akakite anga reka kore no te akaaere, me kare tavini i tona ngutuare.

Ta Iesu i akakite, kua kapiki atu te tangata apinga nui ra i tana tavini e kua karanga atu kiaia ka akamutuia aia i te angaanga. Kua tamanako iora taua akaaere ra e “Akapeea ra au? te apai ke nei taku pu i te taoonga akaaere iaku nei: kare e tika iaku kia tatanu; e akama oki au i te pati aere, E ka akapera au, kia oo mai ratou iaku ki roto i to ratou are, kia akangereia au i te taoonga akaaere nei.”

Eaa te parani a te reira tuati? I na, kua kapiki aia i te aronga te kaiou ra ki tona pu. Kua ui atura aia ki tetai, “Eaa te maata i taau kaiou?”

Kua pau mai te tangata mua ra e, ‘e 2,200 rita inu orive.’

Kua karanga atura aia kiaia, ‘Ka rave i te pepa koreromotu naau, ka noo ki raro e ka tata viviki ei e 1,100.’

Kua karanga atura oki aia ki tetai: ‘Teianei ko koe, eaa te maata i taau kaiou.’

‘E 22,000 rita titona,’ tana ia i karanga.

‘Ka rave i te pepa koreromotu naau, ka tataʼi e e 18,000.’

E tika oki to te tuati ra kia akatopa mai i te pira kaiou ki tona pu, no te mea te vaira iaia te akaaere i te pae o te moni no te apinga a tona pu ra. No reira na te akatopa anga i te moni, te akariro ra aia i te reira aronga ei oa nona e ka rauka ia ratou te akaoki atu kiaia i te au akaperepere anga me kore atu tana angaanga.

I te rongo anga te pu e eaa tei tupu ra, kua manako meitaki aia. Ko te tika, e kua “akameitaki aia i taua tuati ra, noatu e tika kore, no te mea kua rave aia ma te pakari taangaangaia.” E, kua kapiti katoa atu a Iesu: “E pakari maata atu oki to te tamariki o teia akatereanga o te au mea nei na te mataara taangaangaia ki to ratou uaorai uki, i to te tamariki o te marama ra.”

I reira, i te akakite anga i te apiianga no tana au pipi, kua akamaroiroi atura Iesu e: “E akariro kotou i te au oa no kotou uaorai na te apinga nui tika kore ra, e kia kore e puapinga te reira, ka akao atu ratou ia kotou ki roto i te au ngai noo anga mutu kore ra.”

Kare a Iesu i akameitaki i te tuati ra no tona tu tuatua tika kore mari ra no tona akara mamao, ma te pakari taangaangaia. E putuputu “te tamariki o teia akatereanga o te au mea nei” i te akono karape i ta ratou moni me kare to ratou taoonga ei akariro kia akaoa mai te aronga te ka rauka ia ratou te akaoki mai te akaperepere anga kia ratou rai. No reira te au tavini o te Atua, koia “te tamariki o te marama,” ka tau katoa kia akono i ta ratou au apinga, koia ta ratou “apinga nui tika kore ra,” na te mataara pakari ei puapinga no ratou uaorai.

Inara mei ta Iesu i tuatua ra, ka tau ratou kia akariro i etai ke ei oa no ratou na roto i ta ratou apinga nui e na ratou e akao atu ia ratou “ki roto i te au ngai noo anga mutukore ra.” No te au mema o te anana iti, ko teia au ngai ko te rangi ia; no te au “mamoe ke atu,” ko te enua Parataito ia. I te mea ko te Atua ko Iehova anake raua ko tana Tamaiti te ka rauka kia akao atu i te au tangata ki roto i teia au ngai, ka tau tatou kia akamaroiroi i te tatanu i te akaoaanga ma raua katoa i te taangaanga anga i ta tatou “apinga nui tika kore” ei turu i te angaanga no te Patireia. E, me puapinga kore te apinga nui me kare kia kino atu, mei te mea e papu tikai ka pera, ka vairai te tuatau mutu kore ki mua no tatou.

Kua tuatua ua atura a Iesu e ko te aronga akono meitaki i te rave anga i teia au apinga ua nei, me kare mea ngiti ra, ka akono meitaki katoa i te rave anga i te au mea maata atu te puapinga. “No reira” kua tuatua ua atura aia, “me kare ra kotou i akapapu ia kotou uaorai i te akono meitaki i te au apinga nui tika kore ra, koai i reira te ka irinakiia kia oronga i te mea mou na kotou, [koia oki, te apinga vaerua, me kare te apinga no te Patireia ra]? Pera katoa oki me kare kotou i akapapu e ka akono meitaki kotou uaorai i te apinga na tetai ke ra [koia te au apinga no te Patireia ta te Atua i oronga ki tona au tavini ra], koai i reira te ka oronga kia kotou i te apinga no kotou uaorai [koia te tutaki no te oraanga ki te au ngai noo anga mutu kore ra]?”

Kare tatou e tau ei tavini mou no te Atua ra e ei tuikaa katoa i te au apinga nui tika kore ra, koia te au apinga nui o te kopapa ra, i te reira taime rai, mei ta Iesu i ta­openga maira: “Kare e tika i te tavini o te ngutuare i te akono atu ki nga pu e rua; no te mea, ka riro aia kia makitakita atu i tetai, e te inangaro atu i tetai, e kare ra, ka piri atu ki tetai e ka reka kore atu i tetai. Kare e tika ia kotou kia akono i te Atua e te apinga nui katoa oki.” Luka 15:​1, 2; 16:​1-13, NW; Ioane 10:16.

▪ Akapeea te akaoa atu anga a te tuati i ta Iesu akatutu anga ra ma te aronga te ka rauka i te tauturu iaia i muri akera?

▪ Eaa te au “apinga nui tika kore ra,” e akapeea e raukai ia tatou i te aka­riro i te au tangata ei oa na te reira au apinga?

▪ Koai te ka tika kia akao atu ia tatou ki roto i “te au ngai noo anga mutukore ra,” e eaa ra te reira au ngai?