2. Eaa te au tupu anga e te au tu tei kiteaia, mei te 1914 mai?

Kua ui ta Iesu au pipi kiaia: ‘E akakite mai i te akairo o toou aerenga mai, e te openga o teianei ao?’ (Mataio 24:3) Kua totou a Iesu i te au mea ka tupu me tutara aia i te rangi ei Ariki no te Patireia o te Atua. Ka tupu te tamaki, te onge, e te ngaruerue enua. (E tatau ia Mataio 24:7.) Kua totou katoa te Pipiria e ka “kino maata” te tu o te tangata i te “tuatau openga.” (2 Timoteo 3:​1-5) Kua kiteaia teia au tupu anga e te au tu, mei te 1914 mai.

3. Mei te taime i tutara ai te Patireia o te Atua, eaa te au tupuanga e te au tu, i kino maata ei?

I muri ua ake te riro anga a Iesu ei Ariki no te Patireia o te Atua, kua tamaki atu aia ia Satani e tana au temoni, i te rangi. Kua ruti a Satani i te reira tamaki. Karanga te Pipiria kua “uriia aia ki vao ki runga i te enua nei, e tana au angela katoa, kua uri katoaia ki vao.” (Apokalupo 12:9, 10, 12) E riri maata to Satani, no te mea kua kite aia e ka takoreia aia. Te akatupu nei aia i te kino e te mamae i te enua nei. No reira teianei ao i kino ei! Ka takore te Patireia o te Atua i teia au manamanata.