Kare Aia i Ruaine Roa no te Tavini ia Iehova

E MANGANUI te au tangata ruaine te manako ra e ko te toenga o to ratou au mataiti te vai meangiti ua ra te manakonako anga no te mataora. Kua karanga katoa tetai vaine ruaine akariari teata kitea uaia e: “Kua taviivii au i toku oraanga, e kua tureti te taui i te reira . . . Me aaere au ko au anake ua, kua oki au i te akamaara i toku oraanga, e kare au e mataora ana i te mataara taku i rave ana . . . Te ape nei au i te au ngai katoatoa e kare e rauka i te noo tau ua.”

Tetai vaine ruaine tei ora ana e vaitata i te 2,000 mataiti i topa kare ona manamanata mei te reira te tu. E 84 ona mataiti e e takaua, inara e tu maroiroi tona, te mataora, e te mareka umereia e te Atua. Ko Ana tona ingoa, e e tumu takake tona no te rekareka. Eaa ra te reira?

‘Kare Rava i Akaruke i te Iero’

Te akaaravei nei te tangata tata Evangeria ko Luka ia tatou kia Ana. “E tetai peroveta vaine ra ko Ana, e tamaine na Phanuela, no te kopu o Asera” i Iseraela ra, i karangaʼi aia. Ei peroveta vaine, tei iaia te apinga aroa ua o te vaerua tapu o te Atua, me kore mana maroiroi, i tetai tu takake. E tei ia Ana tetai tuatau mekameka te totou ra no tetai atianga akara anga okotai ra.

Kua karanga a Luka e: “Kua ruaine roa aia, e itu ona mataiti i te noo anga raua ko te tane tana i akaipoipo i te paretenia anga ra: Kua takaua ra aia, ka varu akera ngauru anga tona mataiti e a ara.” (Luka 2:36, 37) Penei, kua riro mai a Ana ei takaua i tona vai mapu ua anga. Kua kite te au vaine Kerititiano takaua o tetai ua atu mataiti e e mei teaa atura te mamae ngakau i te ruti anga i tetai tane akaperepere i roto i te mate. Inara, mei te au vaine akono Atua e manganui i to tatou tuatau nei, kare roa a Ana i akatika i teia kite anga maromaroa ei akamutu i tana tavini anga ki te Atua.

Te akakite maira a Luka kia tatou e “kare rava [a Ana] i akaruke i te iero” i Ierusalema. (Luka 2:37) Kua ariki tau tikai aia i te akameitaki anga tei tupu mai i te tavini anga i ko i te are o te Atua ra. Kua akari mai tana au angaanga e koia, mei te ariki tata taramo o Iseraela ko Davida ra, e okotai anake ana apinga ka pati kia Iehova. E eaa oki te reira? Kua imene a Davida e: “Okotai aku mea anoano ia Iehova ra, ko taku ï e umuumu ua nei; kia noo rai i roto i te are o Iehova e ope roa ake oku puke rā i te ora anga nei, kia akara au i te meitaki o Iehova, e kia ui marie au ki roto i tona nao.” (Salamo 27:4) I roto katoa i teia turanga, mei te au vaine Kerititiano rai a Ana o teia tuatau nei tei kite i te rekareka i te tae putuputu anga ki te ngai akamori anga o Iehova.

Kua oronga a Ana i te akamori anga kia Iehova i te po e te ao. Kua rave aia i teia “ma te pure e te akakoreanga kai,” te akarianga i te aueanga e te anoano maata. (Luka 2:37) Penei na te kauraro anga a te ngati Iuda i te anere mataiti roa ra ki te au mana Kenitara, kapiti atu te au turanga kino o te akonoanga tei taeria rava ki te iero e tona kautaunga ra, i akakite mai i to Ana akakore anga i te kai e te pure anga ki te Atua ko Iehova ra. Inara e tumu katoa tona no te rekareka, e mea tau tikai no te mea no tetai apinga maata tikai tei tupu i tetai ra maata tikai i te mataiti 2 M.T.N.

Tetai Akameitaki Anga Kare i Tapapaia

I teia ra akatauanga teitei rava ra, kua apainaia mai te pepe ko Iesu ra ki te iero i Ierusalema e tona mama, ko Maria, e tona papa angai, ko Iosepha. Kua kite atu a Simeona ruaine ra i te pepe e kua tuatua atu i te au tuatua totou i taua atianga ra. (Luka 2:25-35) Tei te iero a Ana tei matauia. “E koia i tomo mai ki roto i reira,” ta Luka ia i ripoti. (Luka 2:38) Mei teaa atura to Ana rekareka i te kite anga atu tona nga mata ruaine i te Mesia no te tuatau ki mua ra!

E 40 ra i mua atu ana, kua tapoitirere atu te angera a te Atua i te au tiaki mamoe i vaitata atu ki Betelehema ma te au tuatua e: “I na oki, e tuatua meitaki taku e taoi mai kia kotou na, ka riro ïa ei rekareka maata no te tangata ravarai. I na konei oki i anau ei te Ora no kotou i te oire o Davida.” Kua akapaapaa atura tetai urupu maata no te rangi ra ia Iehova i te tuatua anga e: “Kia akakakāia te Atua i runga i te rangi teitei, e ei au to to teianei ao, e kia kite aroaia mai te tangata nei.” (Luka 2:8-14) Akapera rai, kua akakeuia a Ana kia akakite aere no runga Iaia te ka riro mai e Mesia!

I te kite anga atu i te pepe ko Iesu ra, “akapaapaa atura i te Atu, e kua tuatua iora [a Ana ki] te aronga katoa i tapapa i te ora i Ierusalema ra.” (Luka 2:38) Mei ia Simeona ruaine ra, tei akameitaki katoaia kia kite i te pepe ko Iesu i te iero ra, kare e ekoko anga e kua anoano rai aia, te pureanga, e te tatarianga no te Akaora tei taputouia maira. Ko te tuatua meitaki e ko Iesu te Reira kua meitaki rava nona kiaia uaorai.

Noatu e kare a Ana i tapapa atu e kia ora ua atu ia Iesu e tupu ra, eaa ra tana i rave? Kua akakitekite rekareka aere aia ki etai no runga i te akamatara anga te vaitata maira i te raveia na roto i teia Mesia e aere mai nei.

Te Akaraanga Memeitaki o Ana

Eia au tangata akonoanga o te ao nei te ka oronga atu i taua akakite anga me kare te oronga ra rai i te akamori anga i te po e te ao no e 84 mataiti? Penei paa, kua pati atu ratou i te moni akaangaroi anga i tetai au mataiti i mua atu ana. E tuke roa a Ana e Simeona. Kua akanoo raua i te au akaraanga memeitaki no te au tavini ruaine katoatoa o Iehova. E tikai, kua inangaro tikai raua i te are akamori anga o Iehova e kua akapaapaa iaia ma to raua ngakau katoa.

I roto ia Ana tei ia tatou te akaraanga meitaki no tetai takaua akono Atua ra. Ma te tika, te aite meitaki ra ta Luka akataka anga no teia vaine ruaine taakaaka ra ma te au tu o tetai vaine takaua tau ra tei papaia ia 1 Timoteo 5:3-16. I reira te karanga ra te apotetoro ko Paulo e ko te reira tu vaine takaua “te tamou oki i te pure, e te pati anga atu, i te po e te ao,” e “ei vaine na te tane okotai,” e te ‘rave maroiroi ra i te au angaanga memeitaki katoa ra.’ Ko Ana taua tu vaine ra.

I teia tuatau, te kite nei tatou i te au takaua ruaine tiratiratu ra i te orongaanga i te akamori anga ki te Atua i te po e te ao i roto i te tauatini ua atu au putuputuanga o te Au Kite o Iehova takapini i te enua ra. Mei teaa atura to tatou ariki anga i teia au “Ana” i teia tuatau i rotopu ia tatou nei!

Noatu i te mataiti e tere atura, ka rauka i te au tane e te au vaine i te maani i tetai akatapu anga ki te Atua e te akatutu anga i teia na te papetito anga ki te vai. Kare te aronga ruaine i ruaine roa no te tavini ia Iehova e te akakitekite aere no runga i te Patireia o te Mesia tei akataoongaia i teianei i te au rangi ra e kare e roa atu ana ka apai mai i te au akameitaki anga puapinga maata ki te au tangata akarongo. Ko te au tangata ruaine i teia tuatau te oronga ra i te akamori anga ki te Atua ka akakite mai i ta Iehova akameitaki anga ki rungao ia ratou, mei ia Ana katoa i te akameitaki takakeia anga i te au anere mataiti i topa. Kare aia i ruaine roa no te tavini ia Iehova e te akapaapaa i tona ingoa tapu​—e kare katoa oki ratou.