Pene 18

Meangiti ta Ioane, Tupu Maata ta Iesu

I MURI ake i te Pasa i te tuatau tupu anga rau o te 30 T.N., kua akaruke atura a Iesu e tana au pipi ia Ierusalema. Inara, kare ratou i oki atu ki to ratou au kainga i Galilea mari ra kua aere atu ki te enua o Iudea, kua rave ratou i te papetitoanga i reira. Kua rave a Ioane Papetito i te reira angaanga e vaitata i te mataiti i teianei, e te vaira tana au pipi te piri atura kiaia.

Kare ra a Iesu uaorai i rave i te papetitoanga, ko tana au pipi ra tei rave i te reira i raro ake i tana arataki anga. Aiteite te tikaanga o ta ratou papetitoanga mei ta Ioane i rave ra, e akatutu anga te reira no te tataraara o te ngati Iuda i te apa i te Ture koreromotu a te Atua ra. Inara, i muri ake i tona tuakaouanga, kua akaue atura a Iesu i tana au pipi kia rave i te papetitoanga tei tuke tona aiteanga. Ko te papetitoanga i teia tuatau e akatutu anga no te akatapuanga te tangata kia tavini i te Atua ko Iehova ra.

I teia tuatau akamata anga ta Iesu angaanga orometua, noatu rai e te angaanga tatakake ra raua ko Ioane, te apii ra raua e te papetito ra i te aronga tei tataraara. Inara kua vareae ta Ioane au pipi e kua tuatua akaapa atura kiaia no Iesu: “E rabi, . . . i na, te bapetizo ua ra aia, e te aere ua maira te au tangata katoatoa kiaia.”

Kare a Ioane i vareae, kua rekareka ra aia i te puapinga anga ta Iesu, e te inangaro katoa ra kia rekareka tana au pipi. Kua akamaara atura aia kia ratou: “Ko kotou uaorai tei kite iaku, e kua tuatua au e, Kare au i te Mesia, i tonokia mai au e na mua iaia.” I reira kua taiku maira aia i te akatutu anga manea: “Ko te tane ou ra, te tangata ïa nana te vaine; ko te oa ra o taua tane ou ra, ko te noo ua i te pae i te akarongo anga kiaia ra, e rekareka maata tona i te reo o te tane ou ra: e teianei kua tika rava toku rekareka anga.”

Ko Ioane, koia te oa o te Tane Ou ra, kua rekareka aia i etai ono marama i mua akera i tana akakite atu anga i tana au pipi kia Iesu. Kua riro tetai papaki i o ratou ra ei au mema tapaoia no te pupu vaine ou na te Mesia ki te rangi te ka akakiia ki te au Kerititiano tei akatainuia i te vaerua. Kua anoano katoa oki a Ioane i tana au pipi i reira kia aru ia Iesu, i te mea ko tana akakoroanga e teateamamao i te mataara no ta te Mesia angaanga orometua kia puapingaia. Mei ta Ioane Papetito i akataka maira: “Ka tupu aia i te maata anga, ka oki ra au i te mea ngiti anga.”

Ta Iesu pipi ou ko Ioane, e pipi katoa oki aia na Ioane Papetito i mua ana, kua tata aia no to Iesu akamata anga mai e Tona taoonga puapinga maata no te ora o te tangata nei, kua na ko maira: “Ko to runga mai i te rangi ra, ko tei maata ïa. . . . Te akaperepere nei te Metua i te Tamaiti ra, e kua oronga ua mai i te au mea katoa ki tona rima. Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.”

Kare i roa i muri ake i ta Ioane Papetito uriuri manako anga i te meangiti anga mai tana angaanga, kua tapekaia atura aia e te Ariki ko Heroda. Kua rave oki a Heroda ia Herodia, koia te vaine a tona taeake ko Philipa, nana uaorai, e i ta Ioane akakite anga atea ki te ngai tangata e e tarevake tana i rave ra, kua tuku atura a Heroda iaia ki te tapekaanga. I to Iesu rongo anga e kua tapekaia a Ioane, kua akaruke atura ratou ko tana au pipi i Iudea e kua aere atu ki Galilea. Ioane 3:​22–​4:3; Angaanga 19:4; Mataio 28:19; 2 Korinetia 11:2; Mareko 1:14; 6:​17-20.

▪ Eaa te aiteanga o te au papetitoanga i raveia i raro i ta Iesu arataki anga i mua ake i tona tuakaouanga? E i muri ake i tona tuakaouanga?

▪ Akapeea ta Ioane akaari anga e e tau kore ua te akaapa anga a tana au pipi?

▪ Eaa a Ioane i tuku­iaʼi ki roto i te tapekaanga?