Te Manako Maira te Atua ia Koe

KO MARY, e vaine Kerititiano i te openga o tona 40 anga mataiti, e maata tikai tana i mamae i tona oraanga. Kua arataki atu te akaturi o tana tane ki te kopae anga e tere atu i te ngauru mataiti i topa. E i muri ake ra, kua putoto a Mary i te akatupu i tana tuanga angaanga ei metua takaua ki tana tamariki e a. Inara te vai nei rai ko ia anake ua, e i tetai au taime kua riro te maromaroa ei mea ngata i te akakoromaki. Kua manako a Mary e, ‘Ko te aiteanga ainei e kare te Atua e manako mai ana iaku me kore taku tamariki metua tane kore?’

Me kua kite koe i tetai mamae anga mei teia te tu e me kare, papu e ka tangi koe i te au manako ngakau o Mary. Kua akakoromaki pouroa ana tatou i te au turanga ngata, e penei kua manako ana tatou e aea e akapeea a Iehova i te rave anga atu no tatou nei. Ko etai o teia au kite anga ra e tupu anga titika mei ta tatou aru anga i te au ture a te Atua. (Mataio 10:16-18; Angaanga 5:29) Ko tetai pae e tupu anga ia o to tatou tu ara ua ei au tangata e noo nei i roto i tetai ao tei tutaraia e Satani. (1 Ioane 5:19) Kua tata te apotetoro Paulo e: “Te ngunguru anake nei te au mea katoa i angaia mei te mamae anau ra.”​—Roma 8:22.

Inara, ko te tika e te aro atura koe i tetai timata anga pakari kare te aite anga e kua akaruke a Iehova ia koe e kare e manako mai ana i toou turanga. Akapeea koe e papu ei i teia? Eaa te akaari maira e te manako maira te Atua ia koe?

Tetai Akaraanga Taito

Te oronga maira te Puka Tapu i te akakapu anga taka ua i to Iehova manako anga mai i te au tangata ei aronga tataki tai. Ka tamanako ana ia Davida. E manako anga uaorai to Iehova i teia tiaki mamoe mapu, te kiteanga iaia ei ‘tangata e tau ki tona uaorai ngakau.’ (1 Samuela 13:14) I muri mai, i to Davida tutara anga ei ariki, kua taputou a Iehova iaia: “E i vaitata katoao au ia koe i toou au aerenga katoa.”​—2 Samuela 7:9.

Ko te aite anga ainei e kua arataki a Davida i tetai oraanga “reka ua,” kare e tu ngata ra? Kare, kua aro atu a Davida i te au timata anga pakari i mua ake e i te tuatau o tona tutara anga. No tetai au mataiti roa i mua ake i te riro anga mai ei ariki, kua arumaki tukutuku koreia aia e te ariki ta tangata ko Saula. I teia tuatau o tona oraanga ra, kua tata a Davida e: “Te noo nei toku vaerua i rotopu i te au liona; . . . i rotopu i te au tangata . . . to ratou au nio, e korare ïa, e te kakao.”​—Salamo 57:4.

Noatu rai, na roto i teia mamae anga kua papu ia Davida to Iehova uaorai manako anga mai. “Kua tatauia e koe toku nei au aerenga,” i akakite ei aia i roto i tetai pure kia Iehova. Ae, kia Davida mei te mea atura e kua akapapa takere a Iehova i te tupu anga katoa ra. I reira kua tuatua akaou a Davida e: “Ka tuku ana koe i toku nei roi-mata ki roto i taau ra āriki: kare ainei i roto i taau ra tuatua?”a (Salamo 56:8) Ma teia akatutu anga, kua kite papu a Davida e kua kite a Iehova kare anake te turanga mari katoa ra te tupu anga manako ngakau ra.

I te openga o tona oraanga, kua rauka ia Davida i te tata i tana uaorai i kite: “Kua akatinamouia e Iehova te rua-tapuae o te tangata meitaki, e te mareka ra aia i tona aerenga. Inga uaorai aia, kare e topa takiri roa ki raro, no te mea te mou mairā Iehova i tona rima.” (Salamo 37:23, 24) Ka papu katoa ia koe e noatu e e roa e te tupu ua ra toou au timata anga, te kite maira Iehova e te mareka maira i toou tu akakoromaki. Kua tata a Paulo e: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.”​—Ebera 6:10.

Pera katoa, ka rauka ia Iehova i te rave atu noou ra na te orongaanga i te maroiroi kia koe no te akakoromaki i tetai ua atu manamanata tei tukuia i toou ra aerenga. “Manganui to te tangata tuatua-tika ra mate,” i tata ei a Davida, “e akaoraia ra aia e Iehova i taua au mea katoa ra.” (Salamo 34:19) E tikai, te akakite maira te Puka Tapu kia tatou “te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”​—2 Paraleipomeno 16:9.

Kua Akatae a Iehova ia Koe

Tetai atu akapapu anga o ta Iehova manako anga uaorai ka kitea i roto i te au tuatua a Iesu. “Kare te tangata e tae mai kiaku nei,” i nana ei, “mari ra kia akatae mai te Metua ko tei tono mai iaku nei iaia.” (Ioane 6:44) Ae, te tauturu ra a Iehova i te au tangata tataki tai kia rave i te au puapinga o te atinga o Karaiti. Akapeea? I te maata anga, na roto te reira i te angaanga tutu anga Patireia. E tika, te riro ra teia angaanga ei “kite no te pa enua ravarai,” inara te itae ra te reira i te au tangata tataki tai. Ko te tika e te akarongo ra koe e te ariu atura ki te tuatua o te tuatua meitaki e akapapu anga ia o to Iehova manako anga uaorai ia koe.​—Mataio 24:14.

Na roto i te vaerua tapu, te akatae ra a Iehova i te aronga tataki tai ki tana Tamaiti e te manakonakoanga o te oraanga mutu kore. Na teia e rauka tataki tai ei i tetai i te mou e te taangaanga i te au tuatua mou pae vaerua noatu tetai ua atu au kotinga e te au tu ara tei iri maira. E tikai, kare tetai e marama i te au akakoro anga o te Atua me kare te tauturu o te vaerua o te Atua. (1 Korinetia 2:11, 12) Mei ta Paulo i tata ki te au Tesalonia, “kare oki i ope katoatoa te tangata i te akarongo.” (2 Tesalonia 3:2) Te oronga ra a Iehova i tona vaerua ki te aronga anake tei akaari i tetai tu puareinga kia akataeia kiaia.

Te akatae ra a Iehova i tona au tangata no te mea te aroa ra aia ia ratou ei aronga tataki tai e te inangaro ra ia ratou kia rauka te ora. Mei teaa atura i te akapapu anga ngaueue kore o ta Iehova manako anga uaorai! Kua karanga a Iesu e: “Koia katoa to kotou Metua i te ao ra, kare ïa i inangaro e kia mate tetai o teianei au tangata rikiriki.” (Mataio 18:14) Ae, i to te Atua nga mata e mea puapinga te tangata ravarai ei tu tangata tataki tai. Te tumu te reira i raukaʼi ia Paulo i te tata: “Ko te akautunga mai i te tangata katoa, i tei tau i tana au angaanga.” (Roma 2:6) E kua karanga te apotetoro ko Petero e: “Kare te Atua e akono i te tu o te tangata [te tangata tataki tai]: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:34, 35.

Te Au Temeio a Iesu

To te Atua manako anga uaorai i te au tangata kua akaari akakeuia i roto i te au temeio tei raveia e tana Tamaiti, ko Iesu. Kua raveia teia au rapakau anga ma te manako anga oonu. (Mareko 1:40, 41) Mei te mea a Iesu ‘kare e tika kia rave anake uaorai, ko tana ra i kite i te Metua i te rave anga,’ kua riro tona tu tangi ei akaari i tetai akatutu anga akakeu ra o ta Iehova manako anga mai i tona au tavini tataki tai ra.​—Ioane 5:19.

Ka tamanako ana i te papaanga o tetai temeio tei raveia e Iesu, tei papaia ia Mareko 7:31-37. I konei kua rapakau a Iesu i tetai tangata taringa turi e te murare ra. Kua “arataki ke atura aia [i te tangata] i taua urupu tangata ra,” i akakite ei te Puka Tapu. I reira, “kua nānā akera ki runga i te rangi, ngunguru iora, e kua na ko atura kiaia, Ephata, koia oki, Kua puata.”

Eaa ra a Iesu i arataki ke atu ei i teia tangata mei te urupu tangata ra? Te akara anga e ka manako emiemi rai tetai tangata taringa turi kare e rauka i te tuatua i mua i tetai au tangata akarakara ra. Penei kua kite rai a Iesu i to te tangata ra tu reka kore, e ko te tumu te reira i iki ei aia i te rapakau iaia i te ngai ke. “Te katoa anga o te tua,” i na tetai tangata apiipii Puka Tapu ei, “te akaari va ua maira kia tatou e kare a Iesu i manako ua i te reira tangata e ko tetai ua atu tu rave anga; kua manako aia iaia ei tangata tataki tai. E anoano takake e te manamanata takake to te tangata ra, e ma te tu manako anga maru tikai kua akono atu a Iesu iaia na roto i tetai tu tei akono ra i tona au manako ngakau e na tetai tu tei maramaia ra e ia.”

Te akaari maira teia papaanga e e manako anga uaorai to Iesu no te au tangata. Te vaira te akapapu anga noou e te manako katoa maira aia ia koe. E tika, kua riro tona mate anga akaatinga ei akaari anga aroa no teianei ao katoa o te au tangata tei tutakiia ra. Inara, ka rauka ia koe i te akamanako uaorai i te reira rave anga, mei ia Paulo, tei tata ra: “Te Tamaiti a te Atua, ko tei aroa mai iaku, e kua oronga mai iaia uaorai noku.” (Galatia 2:20) E mei te mea kua kite a Iesu e ‘ko te akara mai iaia nei: kua akara ïa i te Metua,’ te papu ra ia tatou e te pera ra rai to Iehova manako anga mai i tona au tavini tataki tai.​—Ioane 14:9.

Ko Iehova Tei Tutaki Ra

Te apiianga i te kite i te Atua te o maira te kite anga i te au tu tataki tai o tona tu mei tei akakiteia i roto i te Puka Tapu. Te ingoa tikai Iehova tona aite anga “Nana e Akariro Kia Tupu,” te akakite maira e ka rauka ia Iehova i te riro mai ei tetai ua atu tana i iki ra e raukaʼi i te rave i tona anoano. I te tuatua enua tei aereia mai, kua rave aia i te au tuanga angaanga tukeke, kapiti mai Tei Anga ra, te Metua, te Atu Ngateitei, te Tiaki, ko Iehova tapaota, Tei Akarongo i te pure, te Akava, te Puapii Maata, e te Akaora.b

E ariki ei i te aite anga katoa tikai o te ingoa o te Atua, ka tau tatou kia kite ia Iehova i roto i te tuanga o Tei Tutaki ra. Kua tata a Paulo e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”​—Ebera 11:6.

Kua taputou a Iehova i te oraanga mutu kore i runga i tetai enua parataito ki te aronga tei iki i teia ra no te tavini iaia ma te ngakau katoa. Kare i te tu noinoi no te akara atu ki mua ki te tupuanga o te reira taputou maata, e kare katoa i te mea tamanako ua i te akamanako ia tetai uaorai e noo ra i reira. Kua ‘akono marie a Mose i te tutaki ra ei oko.’ (Ebera 11:26) Kua tapapa aruaru katoa atu a Paulo i te tupu anga o ta te Atua taputou no te au Kerititiano tiratiratu tei akatainuia. Kua tata aia: “Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.”​—Philipi 3:14.

Ka rauka katoa ia koe i te akara atu ki mua ki te tutaki ta Iehova i taputou maira no te aronga tei akakoromaki ra. Na te tapapa anga atu i te reira tutaki e tuanga puapinga ia i toou kite i te Atua e toou akakoromaki anga i te tavini iaia. No reira e manakonako i te au ra te au akameitakianga ta Iehova e akono ra noou. Ko Mary, tei taikuia atu i te akamata anga, kua rave aia i tetai tauta anga takake no te rave i teia. “No te taime mua i toku oraanga,” i nana ei, “I ou ua ake nei au i ariki ei e te tau ra to Iesu atinga oko noku. Te akamata nei au i te manako e te manako maira a Iehova iaku ei tangata. I riro ana au ei Kerititiano e tere atu i te 20 mataiti, inara i ou ua ake nei rai toku irinaki anga i teia.”

Na roto i te apii e te manakonako anga i te Puka Tapu ma te ngakau tae, ko Mary, pera katoa e au mirioni ua atu, te akamata ra i te kite e te manako maira Iehova i tona au tangata kare anake ei pupu mari katoa ra ei aronga tataki tai. Kua papu tikai i te apotetoro Petero i teia kua tata aia e: “E uri i to kotou tumatetenga katoa ki runga [i te Atua]; koia oki te tiaki mai ia kotou.” (1 Petero 5:7) Ae, te manako maira te Atua ia koe!

[Au Tataanga Rikiriki i Raro]

[Pia i te kapi 6]

Te Tuakaouanga​—E Akapapu Anga e te Manako Maira te Atua

EI AKAPAPU anga tikai i to te Atua manako anga mai i te tangata tataki tai te kitea ra i roto i te Puka Tapu ia Ioane 5:28, 29: “Te aere mai nei te ora ka rongo te aronga katoa i roto i te au menema akamaara anga i [to Iesu] reo e ka aere mai ki vao.”​—NW.

Ma te tau, te taangaangaia ra i konei te tuatua Ereni mne·meiʹon (menema akamaara anga) kare te taʹphos (vaarua). Te tuatua taʹphos te tuatua ua ra i te manako o tetai tanumanga. Ko te mne·meiʹon ra te akakite ra e te maaraia ra te papaanga o te tangata tei mate ra.

I teia tu, ka akamanako ua ana i ta te tuakaou anga ka umuumu i te Atua ko Iehova ra. Ei akaoki mai i tetai ki te ora, ka anoanoia aia kia kite i te au mea ravarai no runga i te reira ra​—kapiti mai tona au tu tei akatuangaia e te manako anga katoa ra. I reira e raukaʼi i te reira tangata i te akaokiia mai ma taua akataka anga rai.

E tikai, e aka angaanga teia mei te akaraanga a te tangata ua nei, inara “kare rav[a] e mea e kore ei e tika i te Atua.” (Mareko 10:27) Ka kite katoa aia e eaa to roto i te ngakau o tetai tangata. Noatu e kua mate ana tetai tangata no tetai au anere mataiti roa, kare to te Atua manako anga iaia e autu kore; kare te reira e ngaro. (Iobu 14:13-15) No reira, i te taiku anga ia Aberahama, ia Isaaka, e Iakoba, kua rauka ia Iesu i te tuatua no Iehova e au anere mataiti roa i muri ake i to ratou mate anga e “kare oki aia i te Atua no tei mate, no tei ora ra; te ora katoatoa ra iaia.”​—Luka 20:38.

No reira, ko te au pirioni ua atu tei mate ra tei roto i to te Atua ko Iehova manako ma te akapapa anga katoa ra. Mei teaa atura i te akapapu anga meitaki e te manako maira te Atua i te au tangata tataki tai!

[Tutu i te kapi 7]

Kua manako uaorai a Iesu i te aronga tana i rapakau ra