Pene 69

Te Uianga o te Metua Anga

I TE tuatau o te oroa ra, kua tupu ketaketa rava atu ta Iesu uriuri anga manako ma te au arataki ngati Iuda ra. Kua akatika atura Iesu e: “Kua kite au e, e tamariki kotou na Aberahama: te umuumu mai nei ra kotou iaku e ta, no te mea kare o taku tuatua e vairanga i roto ia kotou na. Te tuatua nei au i te tuatua taku i kite i toku Metua; e te akono na oki kotou i ta kotou i kite i to kotou metua.”

Inara noatu e kare i akataka atu i to ratou metua, kua akamarama meitaki atura Iesu e e metua ke to ratou i tona ra. I te kite kore e koai ta Iesu i manako ra, kua karanga maira te au arataki ngati Iuda: “Ko Aberahama to matou metua.” Kua manako ratou e aiteite to ratou akarongo mei to Aberahama rai, koia ra te oa o te Atua.

Inara, kua akapoitirere atura Iesu ia ratou i tana pau anga: “Naringa kotou ei tamariki na Aberahama ra, e akono ïa kotou i ta Aberahama ra tuatua.” E tika oki, ka aru ra te tamaiti tikai i tona metua. Kua karanga atura Iesu: “I tenana ra, te umuumu mai nei kotou iaku e ta, i te tangata i akakite atu kia kotou i te tuatua-mou, i taku i kite i te Atua ra: Kare uā Aberahama i akapera.” No reira kua tuatua akaou maira Iesu: “Te akono na kotou i te tuatua a to kotou metua.”

Tera ra kare ratou i kite e koai ta Iesu i tuatua ra. Kua tamou i to ratou manako e e tamariki tikai ratou na Aberahama, ma te na ko anga: “Kare matou i ta te akaturi i anau.” No reira i te tuatua anga e e aronga akamori mou ratou mei ia Aberahama rai, kua taiku maira ratou: “Okotai rai o matou metua, ko te Atua.”

Inara ko te Atua tikai ainei to ratou Metua? Kua karanga atura Iesu: “Naringa ko te Atua to kotou Metua ra, kua anoano mai kotou iaku: No reira oki au nei, mei reira mai au i te Atua ra; kare oki au i aere ua mai, nana oki au i tono mai. Eaa kotou i kore ei i kite i taku tuatua?”

I tauta ana a Iesu i te akakite ki te reira au arataki ngati Iuda ra i te kino ka tupu no to ratou kopae anga iaia ra. Inara ei reira kua tuatua tika tika atura aia: “Ko te Diabolo to kotou metua, i akatikaʼi kotou i te anoano o to kotou metua ra.” Eaa to te Tiaporo tu ei metua? Kua akataka maira Iesu iaia e ei ta tangata e kua karanga katoa oki: “E pikikaa aia, e e metua oki no te pikikaa.” Kua taopenga maira Iesu: “No te Atua aia ra, ka akono ïa i ta te Atua tuatua: Kare kotou i akono, no te mea kare kotou i to te Atua.”

No te riri i ta Iesu ra akaapaanga, kua karanga maira te ngati Iuda kiaia: “Kare ainei te tuatua-tika ta matou i karanga nei e, no Samaria koe, e e demoni toou?” Ko te reira tuatua e “no Samaria” e taiku aviri anga e te akakino, no te mea e aronga makitakita na te ngati Iuda to Samaria ra.

I te akakore ua anga i te reira akakino anga e no Samaria aia, kua karanga atura Iesu: “Kare oku e demoni; te akangateitei nei ra au i taku Metua, e te akakino nei oki kotou iaku.” I te rave ua atu anga, kua akakite atura Iesu i te taputou umere roa: “Ko te akono i taku ra tuatua, kare rava aia e kite i te mate.” Inara, kare te aiteanga o ta Iesu tuatua e te aronga katoatoa e aru iaia ra kare rava e mate tikai. Mari ra, ko te aiteanga o tana tuatua e kare ratou e kite i te akapouanga mutukore, koia te “rua o te mate,” ko te reira ngai kare e tuakaouanga.

Tera ra, kua manako te ngati Iuda i ta Iesu au tuatua ei apinga tikaʼi. No reira, kua karanga maira ratou: “Kua kite atura matou e, e demoni tikaʼi toou. Kua mate oki a Aberahama, e te au peroveta katoa; e te tuatua mai na koe e, ko te akono i taku ra tuatua, kare rava aia e kite i te mate. E maata ua aina koe ia Aberahama i to matou metua i mate ra e te au peroveta katoa oki kua mate: Koai koe na i toou maara anga?”

I te uriurianga katoa, te kitea meitaki ra e te akakite atura Iesu i te tika ki teia aronga e ko ia te Mesia tei totouia maira. Inara kare aia i pau tika tika atu i ta ratou uianga no te akataka atu anga iaia uaorai, kua karanga atura Iesu: “Kia akameitaki au iaku uaorai, e akameitaki anga marikonga kore taku: ko toku Metua tei akameitaki mai iaku; ko ta kotou i tuatua na e, e Atua no kotou: Kare kotou i kite iaia; kua kite ra au iaia: naringa au i na ko ana e, kare au i kite iaia, kua riro au ei pikikaa mei ia kotou katoa na.”

I te tuatua ua atu anga kua taiku akaou atura Iesu ia Aberahama tiratiratu ra, i te na ko anga: “I rekareka ana oki to kotou metua ko Aberahama i toku nei tuatau kia kite aia: E kite atura, e mareka atura oki.” Ae, na ona mata o te akarongo ra, kua akara maira a Aberahama ki te taenga mai o te Mesia tei totouia ra. No te akarongo kore, kua karanga maira te ngati Iuda: “Kare akera i tae i te rima o te ngauru anga i toou mataiti, e kua kite oki koe ia Aberahama?”

Kua karanga atura Iesu: “Tika, tika tikai taku e karanga atu kia kotou, kare a Aberahama i anau ra, te noo nei au.” Inara, te taiku ra a Iesu no tona oraanga ei peretana vaerua mana i te rangi i mua ake i te anau mai anga ei tangata.

Te maata o te riri no ta Iesu tuatua e i vai ana aia i mua ake ia Aberahama ra, kua rave iora te ngati Iuda ra i te au toka e pei iaia. Inara kua pipini aia e aere atura ki vao mai i te iero ra kare i kino. Ioane 8:​37-59; Apokalupo 3:14; 21:8.

▪ Akapeea ta Iesu akaari anga e e metua tuke to tona au enemi ra, ki tona?

▪ Eaa te aiteanga o ta te ngati Iuda ­karanga anga ia Iesu e no Samaria?

▪ I teea tu te aiteanga o ta Iesu tuatua e kare rava tana au pipi e kite i te mate?