“Kua Kite oki Ratou i Tona Reo”

“KO IEHOVA toku tiaki.” Ko teia te au tuatua akamataanga o Salamo 23. Te akaaite akaou ra te au Tuatua Tapu i te Atua ko Iehova ki tetai tiaki i roto i te totou a Isaia, te tuatua ra e: “E angai aia i tana anana mei te tiaki mamoe ra: e akaputu aia i te au punua i tona rima, e ei runga ratou i tona umauma kia apai, e e arataki marie aia i te au tinana akangote punua ra.”​—Isaia 40:11.

Ma te aiteite ra, te akaaiteia ra a Iesu Karaiti ki tetai tiaki. Kua tuatua aia e: “Ko au te tiaki mamoe meitaki ra: ka oronga te tiaki mamoe meitaki i tona uaorai ora no te mamoe.” (Ioane 10:11) Kua tuatua a Iesu e “ka akarongo mai te mamoe i [to te tiaki] reo: e karanga atu aia ki tana uaorai mamoe ma te taiku atu i te ingoa; e e arataki aia ia ratou ki vao.” Kua kapiti mai aia e “ka aru mai te au mamoe [i te tiaki], kua kite oki ratou i tona reo. Kare ratou e aru i te tangata ke, ka oro ke ratou i reira: kare oki ratou e kite i te reo o te tangata ke.”​—Ioane 10:2-5.

Kua akono te Atua ko Iehova e tana Tamaiti, ko Iesu Karaiti, ki te akara anga tau te akatakaia ra i roto i te au tuatua tapu i runga ake nei. Te akono ra raua i ta raua mamoe akatutuia ma te maru e te akonoanga aroa. Ko tei tupu, te kite ra te aronga tu mamoe i te aroa, te tinamou, e te paruru anga.

Kua akaaite tau ia teia piri anga vaitata ki tetai mamoe tika tikai ma to ratou tiaki. I te 1831, kua tata a John Hartley no runga i tana au akara anga no teia tu. Kua akakite mai aia e i Ereni e mea matauia no te au tiaki i te oronga i te au ingoa ki ta ratou mamoe. Me kapikiia atu ma te ingoa, ka akarongo mai te mamoe ki te reo o te tiaki. I etai 51 au mataiti i muri mai, i te 1882, kua akakite a J. L. Porter i tetai akara anga aiteite ra. Kua kite aia uaorai i te au tiaki i te “tuatuaanga . . . i te aoa tuke ua ake rai” ki te reira ka akarongo mai te mamoe na te aruanga ma te akarongo tikai i te au tiaki. I taua mataiti rai kua tata a William M. Thomson no runga i tetai au raveanga tamatamata ripiti ua tei akatumu e ka rauka rai kia apiiia te mamoe kia aru i to ratou tiaki e kia kite i tona reo.

Kua akaraia ana ainei teia piri anga vaitata umere tikai i rotopu i te au tiaki e ta ratou mamoe i te tuatau ou ua ake nei ra? Ae. I roto i te Tepetema 1993 itiu o te National Geographic, kua tata tetai tutaka aere Otereria ko Robyn Davidson i teia no runga i te Rabari e aronga akono i te au animara i te apatokerau opunga i Initia e: “E kapiki anga tukeke ta te tiaki tataki tai, e taui anga tuke ki rungaʼo i tetai tumu tuatua. Te vaira te au kapiki anga popongi kia akaruke, tetai kapiki anga kia akainu i te mamoe ki te vai, e tere atu. Kua kite te tangata tataki tai i tana uaorai mamoe e pera katoa te mamoe, e tana anana tikai ka akamatara mai iaia uaorai mei te anana maatamaata e ka aere atu na muri iaia i te popongi.”

Kare e ekoko anga, kua akara ana a Iesu e eaa tei akatakaia mai e te aronga teretere e a tei taikuia ra. Kua kapitiia atu te tu tika tikai o tana uaorai au akara anga ki tana akatutu anga o te mamoe i te kiteanga i tona reo. Ko koe ainei tetai i te mamoe a Iesu ra? Kua kite ainei koe i tona reo e te akarongo ra ki te reira? Me kua kite koe e te akakite ra i tana au apiianga e ko te tuatua mou ia e me te akarongo ra koe i tana au akauenga e te aru ra i tana arataki anga i te akamorianga ia Iehova, i reira ka rauka ia koe i te kite i te tiakianga aroa tikai e te maru a te Atua ko Iehova ra e tana Tamaiti, ko Iesu Karaiti.​—Ioane 15:10.