Pene 80

Nga Koro Mamoe e te Tiaki Mamoe

TEI Ierusalema a Iesu i te tuatau o te Oroa o te Akatapuanga, me kare Hanuka, e oroa no te akatapu akaou anga i te iero ra kia Iehova. I te 168 M.T.N., vaitata i te 200 mataiti i mua akera, kua peke a Ierusalema ia Antiochus IV Epiphanes e kua taviiviiia te iero e tona atarau. Inara, e toru mataiti i muri mai kua rauka akaou maira Ierusalema e kua akatapu akaouia te iero. I muri mai, kua akonoia te oroa o te akatapu akaou anga i te au mataiti tatakitai.

Kua akonoia te reira Oroa o te akatapu anga i te ra 25 ia Kitireu, te marama ngati Iuda te tau ra ki te tuanga openga o Noema e te tuanga mua o Titema o ta tatou karena nei. No reira, e manga tere atu i te tai anere ra e ka tae ei ki taua Pasa maata o te 33 T.N. No te mea ko te tuatau anu ia, kua karanga te apotetoro ko Ioane i te reira “e paroro.”

Kua tuatua mai a Iesu i reira i tetai akatutu anga tei taiku maira aia e toru nga koro mamoe e tona taoonga ko te Tiaki Mamoe Meitaki. Te koro mamoe mua tana i tuatua ana kua akatakaia no te akanoonoo anga o te Ture koreromotu a Mose ra. Kua akanooia te Ture mei te aua rai ei akatakake i te ngati Iuda mei te au ravenga viivii a te aronga kare i roto i te reira koreromotu takake ma te Atua katoa ra. Kua akataka maira Iesu: “Ko te kore e na te ngutupa te tomo ki roto i te koro o te mamoe ra, ko te kake na runga i tetai ara ke ra, e keia ïa, e te noni. Na te ngutupa rai te tiaki mamoe i te tomo.”

Kua aere mai ana etai ma te karanga anga e ko te Mesia ratou, me kare Keriti, inara kare ratou i te tiaki mamoe mou ra ta Iesu i karanga maira: “E kiriti mai ïa te tiaki pa ra iaia; e ka akarongo mai te mamoe i tona reo: e karanga atu aia ki tana uaorai mamoe ma te taiku atu i te ingoa; e e arataki aia ia ratou ki vao. . . . Kare ratou e aru i te tangata ke, ka oro ke ratou i reira: kare oki ratou e kite i te reo o te tangata ke.”

Ko Ioane Papetito te “tiaki pa” o te koro mamoe mua ra. Ei tiaki pa, kua ‘kiriti mai’ a Ioane i te pa kia Iesu na te akatakaanga ia Iesu ki te aronga e mamoe akatutuia maira tana ka taki atu aia ki te ngai ngangaere ruperupe. Ko teia au mamoe ta Iesu i karanga atu na te taiku i to ratou ingoa e ka arataki atu ki vao i te openga ka raveia mai ki roto i tetai atu koro mamoe, mei tana e akataka maira: “Tika, tika tikai taku e karanga atu kia kotou, Ko au te ngutupa o te mamoe,” koia oki, te ngutupa no te koro mamoe ou ra. I ta Iesu oronga anga i te koreromotu ou ra ma tana au pipi e te riringi anga mai i te vaerua tapu ki rungao ia ratou i te Penetekote i muri maira, kua aratakiia atu ratou ki roto i te reira koro mamoe ou.

I te akamarama anga i tona taoonga, kua karanga akaou atura Iesu: “Ko au te ngutupa; ko te na ko nei mai iaku nei te tomo ra, ka ora ïa, ka aere ua ratou ki roto e ki vao, ka rauka oki te kai. . . . I aere mai nei ra au kia rauka to ratou ora, e kia maata ua atu te ora. . . . Ko au te tiaki mamoe meitaki ra: kua kite au i taku uaorai, e kua kitea au e ratou. Mei te Metua i kite iaku nei ra, e ko au i kite i te Metua: e e oronga oki au i toku ora [meta, NW] no te mamoe.”

I mua poto ua ake kua akapumaana a Iesu i tana au pipi, i te na ko anga: “Auraka e mataku, e taku anana iti; e mea anoano na to kotou Metua, i te oronga mai i te basileia no kotou.” Ko teia anana iti, ka tae to ratou numero ki te 144,000, ka aere mai ki roto i teia koro ou, me kare te rua, o te koro mamoe. Inara kua rave ua atu a Iesu i te akakite e: “E mamoe ke atu rai taku, kare no teianei koro: e arataki katoa mai au ia ratou e tikaʼi, e akarongo mai oki ratou i toku nei reo: kia okotai oki anana, okotai oki tiaki.”

I te mea ko te “mamoe ke atu” “kare no teianei koro,” ka tau ratou e no tetai atu koro, koia te toru. Teia nga koro openga e rua, me kare aua mamoe, e ngai ke to ratou i akakoroia. Ko te “anana iti” i roto i tetai koro ka tutara kapiti ratou ma te Mesia katoa ki te rangi, e ko te “mamoe ke atu” i roto i tetai atu koro ra ka noo ki runga i te Parataito i te enua nei. Inara, noatu e ie rua koro to ratou, kare e vareae ia ratou ra, kare katoa oki o ratou manako no te takake anga, no ta Iesu i tuatua ra, “ka riro ratou ei anana okotai” i raro i te “tiaki mamoe okotai ra.”

Kua rekareka a Iesu i te oronga anga i tona ora no nga koro mamoe e rua ­katoa. “Naku uaorai e oronga ua atu,” ko tana ia i tuatua. “Ka tika oki iaku kia oronga, ka tika oki kia rave akaou. Ko ta toku Metua ïa i akaue mai iaku nei.” I ta Iesu tuatua anga i te reira, kua tupu tetai akatakake anga i rotopu i te ngati Iuda ra.

E manganui to te reira urupu i karanga e: “E demoni tona, e kua neneva; eaa kotou i akarongo atu ei iaia?” Inara ko tetai papaki kua karanga e: “Kare teia tuatua i ta te tangata demoni.” E i reira, kua taiku maira i tei tupu i nga marama e rua i topa i tana akaora anga i tetai tangata tei anau matapoia maira, kua na ko maira ratou: “Ka puera ainei te mata o te matapo i te demoni?” Ioane 10:​1-22; 9:​1-7; Luka 12:32; Apokalupo 14:​1, 3; 21:​3, 4; Salamo 37:29.

▪ Eaa te Oroa o te Akatapuanga, e i naea i akonoiaʼi?

▪ Eaa te koro mamoe mua ra, e koai te tiaki pa o te reira ra?

▪ Akapeea ta te tiaki pa kiriti anga ki te tiaki mamoe, e kua aratakiia atu te au mamoe ki ea i muri akera?

▪ Koai ma to roto i nga koro e rua a te Tiaki Mamoe Meitaki ra, e riro akera ratou eia katoa anana?