Pene 90

Manakonako no te Tuakaouanga

KUA tae atura a Iesu ki te kotinga o Betania, e oire vaitata i te 3 kiro mita mei Ierusalema. No nga ra tokoiti ua mei te matenga o Lazaro e tona tanumanga ra. Te vaira te tu aue ua o tona nga tuaine, koia a Maria raua ko Mareta, e e manganui te aronga tei aere mai ki to raua ngutuare e akapumaana ia raua.

Ia raua e noo aue ua ra, kua akakite atura tetai tangata kia Mareta e te aere maira a Iesu ki reira. Kua aere viviki atura a Mareta e aravei iaia, penei kare i akakite atu ki tona teina. I te aravei anga ia Iesu, kua tuatua akaou atura aia i ta raua ko tona teina i taiku ana e manganui te au taime i nga ra e a koi topa ua akera: “Naringa koe i ko nei, kare e mate toku tungane.”

Inara, kua akakite atura a Mareta i te manakonako anga, kua tuatua e penei ka rauka ia Iesu i te rave tetai apinga no tona tungane. “Kua kite ra au e, ko taau e pati i te Atua ra, na te Atua ïa e o mai naau,” tana ia i tuatua atu.

“Ka tu akaou mai ïa to tungane.” Ta Iesu ia i taputou atu.

Kua kite ra a Mareta e te tuatua ra a Iesu no te tuakaouanga ki te enua nei a te tuatau ki mua, ta Aberahama e etai atu tavini o te Atua ia i tapapa maira. Kua karanga atura aia: “Kua kite au e, ka tu akaou maira aia i te tuakaouanga i te rā openga ra.”

Inara, kua oronga atu a Iesu i te manakonako anga no te pumaana viviki mai, i te na ko anga: “Ko au te tuakaouanga, e te ora.” E kua akamaara atura ia Mareta e kua oronga te Atua i te mana kiaia no rungao i te mate, e kua na ko atura: “Ko te akarongo mai iaku ra, mate ua atu rai, ka ora ra ïa: E te tangata ora katoa nei e akarongo mai iaku ra, kare rava atu ïa e mate.”

Kare a Iesu i akakite atu ana kia Mareta e ko te aronga tiratiratu te ora ra i reira kare ratou e mate. Kare, inara tana tumu i akakite atura e ko tei akono i te akarongo iaia ra ka taki atu ki te ora mutu kore. Ko te reira oraanga ka rekarekaia e te maata anga o te au tangata na te akatuakaouia i te ra openga ra. Inara ko tetai papaki tei tiratiratu ra ka ora atu i te openga o teia akatereanga o te au mea i te enua nei, no te mea ka mou rai teia au tuatua na Iesu ra na roto i te tu tika tikai. Kare rava atu ïa ratou e mate! I muri ake i te reira tuatua anga umere tikai, kua ui atura Iesu kia Mareta e, “Kua akarongo ainei koe i te reira?”

“Ae, e te Atu,” (NW) ko tana pauanga ia. “Kua akarongo au e, ko koe te Mesia, te Tamaiti a te Atua, ko te aere mai ki te ao nei.”

Kua aere viviki atura Mareta e pati i tona teina, ma te akakite muna atu kiaia ra: “Tera ake te Orometua, e te [kapiki, NW] maira ia koe.” Akaruke maira a Maria i te are i reira tikai. I te kite anga etai i tona aere anga, kua aru atura ratou, ma te manako anga e te aere ra aia ki te tanumanga.

I te aravei atu anga ia Iesu, kua topa iora Maria ki tona pae vaevae ma te aue. “E te Atu, naringa koe i ko nei kare e mate toku tungane,” ko tana ia i tuatua. Kua tangi oonu ra a Iesu i tona kite anga ia Maria e te urupu i aru atu iaia ra e te aue ra. Kua karanga atura aia: “Teiea aia te vaio angaia e kotou?”

“E te Atu ka aere mai ka akara,” ko ta ratou ia i pau atu.

Kua aue katoa oki a Iesu, e kua karanga te ngati Iuda ra: “Ka akara na i tona akaperepere iaia!”

Kua manako tetai papaki ia Iesu, i te tuatau o te Oroa Puakapa i etai marama tokoiti ua tei topa, kua akaora aia i tetai tangata ou tei anau matapoia mai, e kua ui ratou: “Kare ainei e tika iaia kia akakore mai i te mate o teianei tangata, ko tei akapuera i te mata o te tangata matapo ra?” Ioane 5:21; 6:40; 9:​1-7; 11:​17-37.

▪ I to Iesu vaitata atu anga ki Betania, eaa te turanga i reira ra?

▪ Eaa te tumuanga no Mareta i akarongo ei e e tuakaouanga tetai?

▪ Eaa tei tupu kia Iesu i to Lazaro matenga ra?