APII 30
Ka Ora Akaou te Aronga Taau i Akaperepere!
E akatupu ana te mate i te mamae e te maromaroa. No reira te Pipiria i kapiki ei i te mate, ko te enemi. (1 Korinetia 15:26) I te Apii 27, apii mai tatou e ka takore a Iehova i teia enemi. Eaa te ka tupu ki te tangata tei mate takere? I teia apii, ka apii maata atu koe i tetai akaou taputou na Iesu—ka akatuakaou mai aia e pirioni ua atu tangata ma te oraanga mataora e tuatau ua atu. Ka akatuakaou mai aia ia ratou mei te mate! Ka tupu ainei te reira? Ka akatuakaouia mai ainei ratou kia noo i te rangi me ki te enua?
1. Eaa ta Iehova ka inangaro i te rave no te aronga mate taau i akaperepere?
Te anoano nei a Iehova i te akatuakaou mai i te tangata kia ora akaou. Papu i te tangata akarongo ko Iobu e kare te Atua e akangaropoina iaia. Karanga aia ki te Atua: “Naau e kapiki mai, e naku e io atu kia koe [mei te Vaarua].”—E tatau ia Iobu 14:13-15.
2. Akapeea tatou e kite ei e ka tuakaou mai tei mate?
Ia Iesu i te enua nei, kua oronga te Atua i te mana ririnui kia rauka iaia i te akatu mai i te tangata. Kua akatu mai a Iesu i tetai tamaine e 12 ona mataiti e te tamaiti a tetai vaine takaua. (Mareko 5:41, 42; Luka 7:12-15) I muri mai, kua mate to Iesu oa, ko Lazaro. Noatu kua mate ke ana a Lazaro e kua tanuia e a rā, kua akatu mai a Iesu iaia. I muri ake i te pure anga ki te Atua, kua kapiki a Iesu i te ngai tanumanga: “E Lazaro, ka aere mai ki vao!” E “kua aere maira taua tangata i mate ra ki vao”—kua ora aia! (Ioane 11:43, 44) Akamanako ana te mataora o te kopu tangata e te au oa o Lazaro!
3. Eaa te manakonakoanga no te aronga tei mate taau i akaperepere?
Taputou mai te Pipiria: “E tuakaouanga to tei mate.” (Angaanga 24:15) Kare te aronga ta Iesu i akatu mai i aere ana ki te rangi. (Ioane 3:13) Mataora ratou e kua akatuia mai ratou ki te enua nei. E pera te pirioni ua atu ta Iesu ka akatuakaou mai ma te oraanga mataora e tuatau ua atu i te enua parataito. Karanga aia “te aronga katoa i roto i te rua”—e te aronga tei akangaropoinaia inara te vaira i roto i te manako o te Atua—ka akatuia mai ratou.—Ioane 5:28, 29.
KIMI OONU
Akara matatio i te tuatua mou a te Pipiria e ka rauka ia Iesu i te akatuakaou mai i tei mate. Apii akapeea te tuakaouanga te akapumaana anga ia koe ma te manakonakoanga meitaki.
4. Akapapu mai a Iesu e ka rauka iaia i te akatuakaou mai i tei mate
Apii maata atu i ta Iesu i rave no tona oa ko Lazaro. E tatau ia Ioane 11:14, 38-44, e oti uriuri i teia au uianga:
Akapeea tatou e kite ei e kua mate rai a Lazaro?—Akara i te irava 39.
Naringa a Lazaro i aere ki te rangi, i toou manako kua akatu mai ainei a Iesu iaia ki te enua nei?
5. E manganui te ka akatuakaouia mai!
E tatau ia Salamo 37:29, e oti uriuri i teia uianga:
Ka noo te pirioni ua atu tangata te ka akatuakaouia mai kiea?
E maata atu ta Iesu tangata ka akatuakaou mai, kare ko te aronga ua tei akamori ia Iehova. E tatau ia Angaanga 24:15, e oti uriuri i teia uianga:
Koai taau ka inangaro i te kite me akatuia mai mei te mate?
Akamanako i teia: Ka rauka ia Iesu i te akatuakaou mai i tetai tangata, mei te metua tane tei akaara i tana tama mei te moe
6. Ka akapumaana te tuakaouanga ia koe ma te manakonakoanga meitaki
Kua riro te tua Pipiria o te tamaine a Iairo ei akapumaana e te akamaroiroi i te manganui tei mamae ngakau. E tatau i teia tua tika tikai ia Luka 8:40-42, 49-56.
I mua ake i te akatu anga mai i te tamaine a Iairo, akakite a Iesu ki tona metua tane: “Auraka e ngarangara, e akarongo ua mai.” (Akara i te irava 50.) Akapeea te manakonakoanga o te tuakaouanga te tauturu anga ia koe . . .
me mate tetai taau i akaperepere?
me rokoia koe e te tumatetenga?
Akatangi i te VITIO, e oti uriuri i te uianga ka aru mai.
Akapeea te manakonakoanga o te tuakaouanga te akapumaana anga e te akamaroiroi anga i te nga metua o Phelicity?
KARANGA TE TANGATA: “E ngata i te irinaki e ka akatuakaouia mai tei mate.”
Eaa toou manako?
Eaa taau irava ka taangaanga ei akaari e e tuakaouanga tetai?
APIIANGA
Taputou mai te Pipiria e e pirioni ua atu tangata tei mate ka akatuakaouia mai. Inangaro a Iehova ia ratou kia ora akaou, e kua oronga aia i te mana kia Iesu kia akatuakaou mai ia ratou.
Uriurianga
Eaa to Iehova e to Iesu manako no te akatuakaou mai i tei mate?
Ka noo te pirioni ua atu tangata te ka akatuakaouia mai kiea—i te rangi me i te enua nei? Eaa koe i tuatua akapera ai?
Eaa te akakeu ra ia koe kia irinaki e ka tuakaou mai te aronga taau i akaperepere?
KIMI KIMI
Apii kia kite i te au ravenga kia akakoromaki i te mamae ngakau.
Ka tauturu ainei te au kaveinga Pipiria i tetai tangata tei mamae ngakau?
Akapeea te tamariki te akakoromaki anga i te mate o tetai tei akaperepereia?
Ka akatuakaouia ainei tetai ki te rangi? Koai ma te kare e akatuakaouia mai?