Kua Rave Ratou i to Iehova Anoano
Kua Rave te Tangata Maata Roa Atu i Tetai Angaanga Akaaka
KUA kite a Iesu e mea puapinga te au ora openga ma tana au apotetoro. Kare e roa atu, ka opuia aia, e ka timataia tona akarongo kare mei mua ana. Kua kite katoa a Iesu i te au akameitaki anga te vaira ki mua. Kare e roa atu ka akateiteiia aia ki te rima katau o te Atua e ka orongaia “i te ingoa i maata ua atu i te teitei i te au ingoa ravarai nei nona: kia tuku te au turi katoa ki raro, to te rangi, to runga i te enua, e to raro ake i te enua.”—Philipi 2:9, 10.
Inara, kare te taitaia no tona matenga ka tupu mai kare katoa te rapurapu no tana taputou tutakiia i akaariu ke ia Iesu mei te au anoano anga o tana au apotetoro. Kua “aroa ua atura aia ia ratou e tae ua atura ki te openga ra,” i rekoti ei a Ioane i muri maira i roto i tana Evangeria. (Ioane 13:1) I roto i teia au ora puapinga tikai o tona oraanga ei tangata apa kore, kua apii a Iesu ki tana au apotetoro i te au apiianga puapinga.
Tetai Apiianga no te Tu Akaaka
Tei roto te au apotetoro ma Iesu i tetai pia i runga i Ierusalema no te akono i te Pasa. I mua ana, kua rongo ana a Iesu ia ratou i te maro anga e koai tei maata roa atu i rotopu ia ratou. (Mataio 18:1; Mareko 9:33, 34) Kua uriuri ke ana aia i teia manako kia ratou e kua tauta aia i te akatikatika i to ratou manako. (Luka 9:46) Inara, i teianei, kua tuatua maata a Iesu i taua apiianga na te akono ke anga i teia. Kua iki aia kare e kia tuatua ua kia ratou no runga i te tu akaaka mari ra kia akatutu i te reira.
Kua ‘tu akera [a Iesu] ki runga i taua kaingakai ra, kopae atura i tona kakau,’ i tata ei a Ioane. “Tatua iora iaia i tetai kakau orei. Kua riringi iora aia i te vai ki roto i tetai kapu, kua orei atura i te vaevae o te au pipi ra, e tamarō atura oki ki te kakau i tatuaia e ia ra.”—Ioane 13:4, 5.
I roto i te reva maana o te Itinga Rotopu taito ra, e aao ua ana te tangata i te au tiripa ia ratou e aaere ra ki runga i te au mataara reporepo. Me tomo atu ki roto i te kainga o tetai tangata, ka aravei atu te tangata nona te kainga ia ratou, te ka oronga atu i tetai vairanga vai e raukai ia ratou i te orei i to ratou vaevae. I te au kainga puapinga, na tetai tavini e rave i te angaanga orei anga vaevae.—Akava 19:21; 1 Samuela 25:40-42.
I roto i te pia i runga, kare a Iesu e tana au apotetoro ei manuiri na tetai tangata. Kare e tangata i reira i oronga mai i te au vairanga, e kare katoa e au tavini kia rave i te orei anga i te vaevae. I te akamata anga a Iesu i te orei i to ratou vaevae, kua tupu te akama anga ki te au apotetoro. I konei kua rave Tei maata roa atu ia ratou i tetai angaanga akaaka tikai!
I te akamata anga, kua patoi a Petero ia Iesu kia orei i tona vaevae. Inara kua akakite atu a Iesu kiaia: “Kia kore au e orei ia koe ra, kare rava aau tuanga iaku nei.” I te akamutu anga a Iesu i te orei i te vaevae o te au apotetoro katoatoa, kua na ko mai aia: “Te kite na kotou i taku i rave nei ia kotou? Te karanga nei oki kotou e, ko au te Orometua, e te Atu: e tuatua tika oki ta kotou; koia tikai oki au nei. E kua orei na oki au, ko te Atu e te Orometua, i to kotou vaevae, kia orei katoa oki kotou i to kotou uaorai vaevae e tikaʼi. Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.”—Ioane 13:6-15.
Kare a Iesu e akanoo ana i tetai peu orei anga vaevae. Mari ra, te tauturu ra aia i tana au apotetoro kia akono i te manako ou—tetai e tu akaaka e te puareinga ua i te rave i te au angaanga akaaka roa atu no to ratou au taeake. I te akaraanga, kua marama ratou. E akamanako ana i tei tupu i te au mataiti i muri mai i te tupu anga te uianga no runga i te peritome. Noatu kua tupu ‘maata te tauetono anga,’ kua akono te aronga i reira i te akapapa anga meitaki e kua akarongo ngateitei ua ki to tetai manako. Pera katoa, i te akara anga e ko tei akaaere i te uipaanga ko te pipi ko Iakobo—kare e ko tetai o te au apotetoro, mei ta tatou i tapapa, i te mea tei reira ratou. Te akakite maira teia tataanga i roto i te puka Angaanga e kua tere ki mua te au apotetoro i te akaari anga i te tu akaaka.—Angaanga 15:6-29.
Ei Apiianga na Tatou
Na te orei anga i te vaevae o tana au pipi, kua oronga mai a Iesu i tetai apii anga ririnui no te tu akaaka. E tikai, ka tau te au Kerititiano auraka kia manako e puapinga ratou e kia tavini mai etai ia ratou, auraka katoa ratou e kimi i te au turanga teitei e te ngateitei. Kareka ra, ka tau ratou kia aru i ta Iesu akanoo anga, kare i “aere mai kia taviniia tona, ei tavini ra, e kia oronga i tona ora ei oko no te tangata e manganui.” (Mataio 20:28) Ae, ka tau te aronga te aru ra ia Iesu kia puareinga ua i te rave i te au angaanga akaaka roa atu no tetai ke.
No te au tumu meitaki kua tata a Petero: “Kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’” (1 Petero 5:5) Te tuatua Ereni “kakauia” no ko mai i te tuatua te aiteanga “e kakau arai no te tavini” i raro ake i te reira kua tatuaia tetai kakau i raro ake. Te taiku ra ainei a Petero no runga i ta Iesu i rave i te kakau anga iaia uaorai ma te tauera e te orei anga i te vaevae o tana au apotetoro? Kare teia e tuatuaia ma te papu tikai. Noatu rai, kua akaruke ta Iesu raveanga angaanga i te akaraanga mutu kore ki runga i te ngakau o Petero, e kia tau katoa ki runga i te au ngakau o te katoatoa te ka riro mai ei aronga aru ia Karaiti.—Kolosa 3:12-14.