To Iesu Oraanga e te Angaanga Orometua
Pikikaa Angaia e te Opu Angaia
KUA topa ki muri roa atu i te turuaipo ia Iuda i taki atu ei i tetai urupu maata no te vaeau, te kau taunga nunui, te au Pharisea ra, e etai aronga ke atu ki te kainga i Getesemane. Kua akatika te kau taunga kia tutaki ia Iuda e 30 moni ario nana kia pikikaa ia Iesu ra.
I mua akera, i to Iuda akaatea anga ia mei te oroa Pasa ra, i te akaraanga kua aere tika atu ra aia ki te kau taunga nunui ra. Kua akaputu viviki atura ratou i to ratou uaorai au tangata opita, e pera katoa tetai pupu vaeau. Penei kua taki atu a Iuda ia ratou na mua ki te ngai i akono ei a Iesu e tana au apotetoro i te Pasa. I te kiteanga e kua akaruke ratou i reira, kua aru atura te urupu maata ia Iuda ma te apaianga i ta ratou au taoonga tamaki e te raveanga i te au ramepa e te au mori, aere atura ki vao ia Ierusalema e kua tikoti atu ki te o i Kiderona ra.
Ia Iuda e taki atura i taua urupu ra ki runga i te Maunga i Oliveta, te papu ra tona manako e ka kiteaia a Iesu. I te epetoma i topa akera, i to Iesu aaere anga ma te au apotetoro i rotopu ia Betania e Ierusalema, e putuputu ana ratou i te tapu ki te kainga i Getesemane i te akaangaroi e te tuatua ua anga. Inara, i teianei, ia Iesu e noo ra i te ngai poiri i raro i te au pu rakau orive, ka akapeea te au vaeau i te akataka anga iaia? Penei kare ratou i kite ana iaia i mua ana. Kua oronga atura a Iuda i te akairo, i te na ko anga: “Ko te tangata taku e ongi atu, koia ïa; ka opu atu kotou.”
Kua taki atura a Iuda i taua urupu maata ra ki roto i te kainga, kua kite atura ia Iesu ma tana au apotetoro katoa, e kua aere tika atura kiaia. “Kia ora na koe, e Rabi” ko tana ia i karanga atu, e kua ongi atura iaia.
“E tama, i aere mai koe i te aa?” Ko ta Iesu ia i ui atu. Ei reira kua pau aia i tana uaorai uianga, i te na ko anga: “E Iuda, e pikikaa mai koe i te Tamaiti a te tangata nei i te ongi?” Kua rava ra i tei pikikaa iaia ra! Kua neke atura a Iesu ki mua ki roto i te marama o te au mori e te au ramepa ra e kua ui atura: “Koai ta kotou e kimi na?”
“Ko Iesu i Nazareta ra,” ko te pauanga ia.
“Ko au nei ïa,” ta Iesu i pau atu, iaia e tu mataku kore ua ra ki mua ia ratou katoatoa. Kua poitirere i tona tu mataku kore ra e kare i kite eaa te ka tupu, kotoe atura taua aronga tangata ra ki muri e inga iora ki raro i te one.
“Kua akakite atu au kia kotou e, ko au nei ïa,” kua tuatua maru atura a Iesu. “Te kimi nei kotou iaku ra, ka tuku atu ia ratou nei kia aere ana.” I mua poto akera i te pia i runga ra, kua akakite a Iesu ki tona Metua na roto i te pure e kua tiaki aia i tana au apotetoro tiratiratu ra e kare tetai io ratou i ngaro “mari ra ko te tamaiti o te mate ra.” No reira, kia tupu ei tana i tuatua, kua pati aia e tukuia tana au pipi kia aere.
I te rauka akaou anga te manako o te au vaeau ra, kua tu akera ki runga, e kua tamata i te tapeka ia Iesu, kite atura te au apotetoro i reira e eaa te vaitata ra i te tupu. Kua ui ratou: “E te Atu, e tapotu aina matou ki te koke?” I mua ake ka pau ei a Iesu, kua tapotu atura a Petero ia Malako no te mea iaia tetai o nga koke tei apaiia maira e te au apotetoro ra, e tavini a Malako no te taunga maata ra. Kua ipa te koke a Petero i te upoko o te tavini ra e motu atura ko tona taringa katau.
Kua tapu atura a Iesu ma te na ko anga e: “Oti ra ua.” Akatukia ua atura i tona taringa, kua akaora atura aia. I reira kua apii atura aia i te apiianga puapinga maata, ma te akauenga ia Petero: “Ka momono ana i taau koke ki roto i te vaî; ko tei rave i te koke ra, ka mate ia i te koke. Kare aina koe i manako e, e tika iaku kia pure ki taku Metua i teianei; e nana e oronga mai i te angela raungauru ma rua te manotini, e kia maata atu rai?”
Kua tuku ua a Iesu kia tapekaia aia. No te mea kua akataka maira aia: “Eaa iora ra e tupu ei te tuatua i tataia ra i reira e, kia pera e tikaʼi?” E kua kapiti katoa maira aia: “Auraka au e inu i te kapu ta taku Metua i o mai naku ra?” Kua akatika takiri aia i to te Atua anoano nona ra!
Kua tuatua atura a Iesu ki taua urupu ra. “E aere mai oki kotou ma te koke e te rakau, e opu iaku, mei te mea e e keia ra?” tana i ui atura. “I noo ua na oki au i rotopu ia kotou i te au rā katoa, i te apii anga i roto i te iero, e kare ua kotou i rave mai iaku; kia tika ra te tuatua a te au peroveta i tataia ra, i tupu ei teia au mea katoa nei.”
I reira kua opu atura te pupu vaeau e te rangatira vaeau e te aronga opita o te ngati Iuda ia Iesu e kua tapeka atura iaia. I te kiteanga i te reira, kua akaruke maira te au apotetoro ra ia Iesu e oro ke atura. Inara, e tangata ou ua tetai—penei ko te pipi ko Mareko—kua vai mai aia ki roto i te urupu ra. Penei no te ngutuare aia i reira ra a Iesu i akono ei i te Pasa e no muri ake i aru atu ei i taua urupu ra. Inara, i teianei, kua kiteia aia, e kua raveia te tamata anga e opu iaia. Kua akaruke iora ra aia i tona kakau oronga e kua aere mama ua atura. Mataio 26:47-56; Mareko 14:43-52; Luka 22:47-53; Ioane 17:12; 18:3-12.
◆ Eaa ra i papu ei to Iuda manako e ka kitea e ia a Iesu i te kainga i Getesemane ra?
◆ Akapeea ta Iesu akaari anga i te manako maata no tana au apotetoro?
◆ Eaa ta Petero i rave ei paruru ia Iesu ra, inara eaa ta Iesu i tuatua atu kia Petero no te reira?
◆ Akapeea ta Iesu akakite anga e te akatika takiri ra aia i to te Atua anoano nona ra?
◆ I te akaruke anga te au apotetoro ra ia Iesu, koai tei vai mai, e eaa tei tupu kiaia?