Pene 123
“Ka Akara Mai Ana i Taua Tangata Nei!”
NO TE manako anga i to Iesu tu akono e te kiteanga e apa kore aia, kua kimi a Pilato i tetai atu ravenga e tukuiaʼi aia. Kua tuatua atura aia ki taua aronga tini ra: “E peu ra ta kotou, kia tuku au i tetai tangata kia kotou i te pasa ra.”
Ko Baraba, e kino e te ta, tangata te vai katoa ra aia ei mou auri, no reira kua ui atura a Pilato: “Koai taku e tuku atu ia kotou? ko Baraba aina? e ko Iesu aina, ko tei karangaia i te Mesia?”
Na te raurau anga a te kau taunga nunui ra tei akakeu ra ia ratou, kua pati atura taua urupu tangata ra ia Baraba e tuku mai mari ra ko Iesu e tamateia atu. No tona kore i tuku ua, kua ui akaou atura a Pilato: “Ko teea i aua nga tangata toko rua nei taku e tuku ia kotou na?”
Kua kapiki atura ratou: “Ko Baraba.”
Kua ui maira a Pilato ma te poitirere: “Akapeea atu au ia Iesu, ko tei karangaia i te Mesia nei?”
Kua pau atura ratou ma te okotai kapiki anga maata: “E patiti atu iaia!” “E patiti atu! E patiti atu iaia!”—NW.
No tona kiteanga e te akaue ra ratou i te mate no tetai tangata ara kore, kua pati akatenga atura a Pilato: “Eaa oki tana ara i rave? kare oki ana ara i kitea e au, e tau ei iaia te mate: e pāpā ua atu au iaia, ka tuku atu ei.”
Noatu rai tana tauta anga, no te akariri angaia e to ratou au arataki akonoanga atua ra, kua kapikipiki ua atura taua aronga tini i te manako tau kore ra: “E patiti atu iaia!” (NW) No te akaoripu ua anga a te kau taunga ra kua inangaro taua aronga tini ra i te toto. E kia manakoia oki, e rima ua ra i mua akera, ko tetai papaki o ratou i roto i te aronga tei turou ra ia Iesu ki Ierusalema ei Ariki! I tera tuatau katoa, mei te reira te au pipi a Iesu ra, kua muteki ua ratou e kua pipini aere.
E kite akera a Pilato, kare e tupu tana, i te mea kua maata ua maira to ratou maro, kua rave iora i te vai, e kua orei iora i tona rima ki muao i taua aronga maata ra, kua na ko maira: “Kare aku ara i te toto o teianei tangata tuatua-tika: ei ia kotou te reira.” Kua karanga atura te tangata ravarai: “Ei rungao ia matou tona toto, e ei rungao i ta matou tamariki.”
No reira kia tau ki to ratou patianga—e no te manakoanga kia mareka mai taua aronga tini ra, e kare ko tana i manako e ko te tika—kua tuku maira a Pilato ia Baraba kia ratou. Kua rave maira aia ia Iesu kua kiritiia tona kakau e kua papaia iora iaia. Kare te reira i te papa ua nei. Kua akataka maira The Journal of the American Medical Association i te ravenga a to Roma no te papaanga:
“Ko te apinga matauia no te papa e mea poto ua (e flagrum me kare flagellum) e rai te au potonga kiri manu tatakitai me kare kua iriia e tuke tuke te roroa, kua tauruia etai auri rikiriki punupunu ki roto ra me kare ko etai ivi mamoe rikiriki kokoi tei tapeka aereia ki roto aere i te reira. . . . Me papa putuputu te vaeau Roma ra i te mokotua o tei papaia ra ma te ririnui katoa, ka akatupu te au auri punupunu ra i te au vaarua, e ka mutumutu tona pakiri e te au uaua i te kiri manu ma te au ivi mamoe kokoi ra. Ei reira, na te rave ua atu i te papaanga ka ngae oonu atu ki roto i te kiko e te au uaua e tae roa ki te ivi e ka akariro kia veruveru roa te kiko e taʼe roa mai te toto.”
I muri ake i te reira papaanga tamamaeanga, kua aratakiia atura a Iesu ki te are o te kavana ra, e kua akaputu katoaia mai te nuku vaeau ra. I reira kua rave maata atura te vaeau i te takinga kinoanga iaia na te atuanga i te korona rakau taratara e kua opara iora ki runga i tona upoko. Kua tuku ratou i te kakao ki tona rima katau, akakakau atura iaia i te kakau vareau, te tu kakau tei aaoia ra e te ui ariki. Ei reira kua tuatua aviri atura ratou kiaia: “Kia ora na, e te Ariki o te ngati Iuda e!” E kua tutua maira i te uavare ki rungao iaia e papaki atura i tona mata. Kua rave atura ratou i te kakao ketaketa i tona rima ra, e kua papa atura i tona upoko i te reira, e kua opara atu kia oonu te tomoanga o te “pare” rakau taratara te taakaaka ra ki roto i tona upoko.
No to Iesu tu tapunui e te maroiroi i teia takinga kinoanga kua akatupuia e te manako tangi kia Pilato e kua akakeu iaia kia tauta akaou e akaora iaia. Kua tuatua maira a Pilato ki taua urupu tangata ra: “I na, i arataki mai nei au iaia kia kotou nei, kia kite kotou e, kare ua ona e kino i kitea e au.” Penei kua manako aia e na te akara anga i to Iesu tu e tamamaeia ra e akaparuparu mai i to ratou ngakau. I to Iesu tu anga ki mua i te reira pupu ngakau kore ra, ma te pare rakau taratara e te kakau purapura e te taʼe ra te toto i tona mata ma te mamae kino, kua tuatua maira a Pilato: “Ka akara mai ana i taua tangata nei!”
Noatu rai e kua kerekere e kua papa kinoia, kua tu ua i konei taua tangata rongo maata ravaia ra i te tuatua enua katoa, e tika tikai ko te tangata meitaki rava ia tei ora ra! Ae, kua akaari mai a Iesu i te tu ngakau maru e te tapunui tei akakite maira i te tu meitaki maata e noatu ko Pilato kua akatika, no tana tuatua te akakite maira i te kairo anga te akangateitei e te manako tangi. Ioane 18:39–19:5; Mataio 27:15-17, 20-30; Mareko 15:6-19; Luka 23:18-25.
▪ Na teea mataara ta Pilato tauta anga kia tuku uaia a Iesu?
▪ Akapeea ta Pilato tamata anga i te akakore i te apai anga i rungao iaia uaorai?
▪ Eaa te o atura ki te papa angaia?
▪ Akapeea te aviri anga ia Iesu i muri ake i tona papa angaia?
▪ Eaa tetai atu tauta anga ta Pilato i rave kia tuku uaia a Iesu?