Te Tika no Runga i te Au Angera

I tetai taime na te kite anga i tetai tangata ka kapiti mai ia i te kiteanga i tetai mea no runga i te ngutuare tangata o te reira tangata. Te aiteite katoa ra ki te kite aere anga mai i te Atua ko Iehova. E maata atu te ka o mai i te kite ngoie ua anga i tona ingoa. E tau katoa tatou kia kite aere mai i tetai mea no runga i tona “kopu-tangata” i te rangi. (Akaaite ia Ephesia 3:14, 15.) Te kapiki ra te Puka Tapu i te au angera e e “au tamariki” na te Atua. (Iobu 1:6) Te akamanako anga i ta ratou tuanga puapinga i roto i te Puka Tapu, e tau tatou kia inangaro i te kite maata atu no runga ia ratou te marama anga i to ratou ngai i roto i ta te Atua akakoroanga.

TE TUPU maira tetai peu ke. Kare e te maata anake ua maira te au tangata te karanga ra e te irinaki ra ratou i te au angera; te karanga ra tetai numero e tupu maira e kua amiriia ana ratou na tetai atu tu. I te uiangaia e 500 au Marike, “Kua kite ana ainei koe uaorai i tetai vai ua anga o te angera i toou oraanga?” vaitata rai e tai toru tei pau ae. Ma te poitirere rai ko te numero o te au mapu ou te akatutu ra e te irinaki ra i te au angera​—kia tau ki tetai tare anga i te Unaite Teite, e 76 patene tikai! Te taka ua ra, e te manakonako ra te au tangata i te au angera. Inara akapeea te manakoanga i teianei no runga i te au angera me akaaiteia ki te tuatua mou Puka Tapu?

Uunaanga i ta Satani Tuanga

Me tuatuaia te au angera, auraka tatou e akangaropoina i te au angera kikino, te au mea ora i te rangi te karanga ra te Puka Tapu e kua meameaau i te Atua. Tei maata rava atu i teia ko Satani. Te akakite ra tetai puka matauia Ask Your Angels no runga ia Satani ua nei e ko “tetai tu o te Atua” te tauturu ra i te au tangata kia akamaroiroi i to ratou “au ririnui pae vaerua” na roto i te timata anga putuputu. Noatu to Satani “au inangaro aroa” ra, i na te aronga tata ei, i te au anere mataiti i aereia mai kua akataka tarevakeia aia ki te kino. Kua tuatua katoa ratou ia Satani raua ko Iesu, “koi tuke ei mei tetai e tetai, inara te aiteite ra to raua tua, e nga tuanga puapinga o taua mea katoa ra.” E au akakite anga umere teia, inara eaa ta te Puka Tapu e tuatua ra?

Te akakite meitaki maira te Puka Tapu e kare a Satani i “tetai tu o te Atua” mari ra e enemi no te Atua. (Luka 10:18, 19; Roma 16:20) Te patoi ra aia i to Iehova tu ngateitei, e kare rava tona au inangaro no te au tangata i te mea “aroa.” Te akaari ra aia i tona riri ma te ngakau kore ra ki rungao i te au tavini o te Atua i te enua nei. Te akaapa ra aia ia ratou i mua i te Atua i te ao e te po!a (Apokalupo 12:10, 12, 15-17) Te anoano ra a Satani i te akakino ia ratou noatu eaa te ka tupu. Ko tana takinga kino anga aroa kore i te tangata tuatua tika ko Iobu kua riro ia ei akamaeu i tona tu tangi kore no te mamaeanga tangata ra.​—Iobu 1:13-19; 2:7, 8.

Kare rava e ‘aiteite ana to raua tua,’ e kare takiri a Satani raua ko Iesu e au ana tetai e tetai. Ma te ekoko koreia na Satani i akakeu ia Heroda kia akaue i tetai tamate anga pepe​—te tauta katoatoa anga i te takore i te pepe meangiti ra ko Iesu! (Mataio 2:16-18) E kua tupu ta Satani au tamaki anga pakari e tae ua atu ki to Iesu matenga. (Luka 4:1-13; Ioane 13:27) No reira, i te mea ka riro mai “ei nga tuanga puapinga o taua mea katoa ra,” e nga mea tuke takiri a Iesu raua ko Satani. Te akaari maira te totou Puka Tapu i to raua ke anga ei mea kare e rauka i te kopaeia. (Genese 3:15) Ma te tau i reira, na Iesu tei akatuia maira e takore ia Satani i to te Atua tuatau tau ra.​—Apokalupo 1:18; 20:1, 10.

E Au Pure Kiaai?

Ko etai aronga akamaata i te rave anga angera kua akakite e na roto i te manakonako anga e tetai atu au ravenga e raukaʼi i te komunikeiti ki te au angera. “Tetai pati anga ngakau tae no te aravei i tetai mema o te kopu i te rangi kare ia e aere ua atu ma te kore e akarongoia,” i na tetai puka ei. “E pati i reira koe e pauia mai ei.” Ko Mikaela, ko Gaberiela, ko Uriel, e Raphael tetai o te au angera ta te puka e akakite ra no te aravei atu.b

Inara, kua apii a Iesu i tana au pipi kia pure ki te Atua, kare ki te au angera. (Mataio 6:9, 10) Ma te aiteite rai, kua tata a Paulo e: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” (Philipi 4:6) I roto ra i ta ratou au pure, kare te au Kerititiano e pure ana ki tetai ua atu mari ra kia Iehova, e te pera ra ratou na roto i te ingoa o Iesu Karaiti.c​—Ioane 14:6, 13, 14.

E Au Angera Ainei Kare e Akonoanga?

Kia tau kia Eileen Elias Freeman, tei akaaere ra i te Akatere Anga Tiaki Anga Angera, “tei roto te au angera i te au akonoanga ravarai, te au apiianga kimi kite ravarai, e te au kaveinga ravarai. Ko te tika, kare a te au angera akonoanga mei ta tatou i kite ra.”

Inara, te akataka meitaki ra te Puka Tapu e e akonoanga ta te au angera tiratiratu; e akamori ana ratou i te Atua mou, ko Iehova, tei kore ra e tuku ua atu i tetai atu au atua kia tu mai. (Deuteronomi 5:6, 7; Apokalupo 7:11) No reira, kua akatutu taua angera ra iaia uaorai ki te apotetoro Ioane e “e taeake tavini” o te aronga tei akarongo ra i ta te Atua au akauenga. (Apokalupo 19:10) Kare e ngai i roto i te Puka Tapu ta tatou ka tatau no runga i te au angera tiratiratu te turu ra i tetai atu tu akamori anga. Te oronga ra ratou i te akono anake ua ia Iehova.​—Exodo 20:4, 5.

“E Metua Oki no te Pikikaa”

E manganui te au aravei anga angera te o maira te komunikeiti anga ma te aronga mate. “Kua kite au e kua kitea e taku angakara tetai ravenga no te itae mai iaku no te akakite mai kiaku e kua kite aia i te mataora i teianei,” i na tetai vaine ei ko Elise tona ingoa i muri ake i te rauka anga tana i manako e e akairo. Pera katoa a Terri kua maara iaia tetai taeake akaperepere tei mate ra. “Okotai epetoma i muri ake i te tanumanga,” i nana ei, “kua aere mai aia kiaku na roto i taku i manako e e moemoea. Kua akakite mai aia kiaku e auraka au e mii i tona takake anga, no te mea te mataora ra aia e te noo au ua ra.”

Inara te akakite ra te Puka Tapu no runga i te aronga mate e ‘kare e tuatua i kitea.’ (Koheleta 9:5) Te tuatua katoa ra e me mate tetai tangata, “kore rava atura tana i akakoro i taua rā ra.” (Salamo 146:4) Inara, “e metua oki [a Satani] no te pikikaa.” (Ioane 8:44) Nana oki i akamata i te pikikaa e ka ora atu te meta tangata i te mate anga. (Akaaite ia Ezekiela 18:4.) E manganui te au tangata i teia tuatau te irinaki ra i teia, tei tano ra ki ta Satani akakoroanga, no te mea te akakore ra te reira i te akarongo ki roto i te tuakaouanga​—e apiianga puapinga i roto i te akonoanga Kerititiano. (Ioane 5:28, 29) No reira, na te tuatuaanga ki te aronga mate me kore te manako anga kia rauka mai te au tuatua mei ia ratou ko tetai tu ia o te rave anga angera kare e tau ana ki te Atua.

Te Aere ra Ainei ki te Au Angera me ki te Au Temoni?

E maata te rave anga angera i teianei te kangakanga ra i te au mea muna e te kitea koreia. Ka akara ana i te kite anga a Marcia. “Mei ia Tepetema kia Titema 1986,” i nana ei, “kua akamata te au tuatua i te tae mai kiaku mei ‘te ngai mana ririnui.’ Kua kite au i te au tupapaku e kua kite i te au moemoea umere no te ‘oraanga i topa.’ Kua aravei au i te au taeake tei mate ra e e manganui taku au kite anga mana i rauka e i kite ei au i te au mea no runga i te au tangata taku i aravei ua ake ra. Kua akameitaki katoaia au ma te apinga aroa o te tata ua anga e te au tuatua tei tukuia maira mei te au mea kopapa kore ra. Ko etai pae, kare rava au i aravei ana, ia ratou e ora ra i te enua nei, ka tuku mai i te au tuatua na etai ke ra na roto mai iaku.”

E mea matauia te angaanga tauraatua ei ravenga no te “komunikeiti” ki te au angera. Kua akamaroiroi pu ua tetai tumu i tana aronga tatau kia rave i te au toka manamana, te au kati kimi manuia, te au moni I Ching, te akara rima, e te akara etu. “E tuku i toou tu kite uaorai i roto kia arataki ia koe ki te taunga mana tano,” e tata ra te aronga tata, “e e irinaki e ka aravei mai tetai angera ia koe ki reira.”

Inara, kia tau ki te Puka Tapu noatu eaa ‘taau ka aravei ki reira’ kare tikai ia i tetai o ta te Atua ra au angera. No teaa ra? No te mea kare te rave anga tauraatua e au ana ki te Atua, e te aronga akamori mou​—i te rangi e te enua nei—​auraka rava e piri atu ki roto i te reira au mea. I Iseraela kua karangaia te rave anga tauraatua e e apa maata rava! “Ko te aronga katoa oki i rave i te reira au peu e aronga viivii ïa na Iehova,” i akakite ei te Ture.​—Deuteronomi 13:1-5; 18:10-12.

‘E Angela no te Mārama’

Kare i te mea poitirere kia tatou e ka rauka i te Tiaporo i te maani i te rave anga tauraatua ei mea puapinga, e ei ravenga angera katoa. Te karanga ra te Puka Tapu no Satani e ko ‘tei akatutu angela iaia uaorai no te mārama.’ (2 Korinetia 11:14) Ka rauka katoa iaia i te rave i te au ravenga pikikaa tuke ra e oti te akatupu ia ratou kia tika, te akapikikaa anga i te aronga akarakara kia manako e no ko mai te akairo i te Atua. (Akaaite ia Mataio 7:21-23; 2 Tesalonia 2:9-12.) Inara pouroa ta Satani au angaanga​—noatu e e akara anga meitaki me kore e akara anga kino—​te akatupu ra e rua nga akakoroanga: no te akaanga ke i te au tangata mei ia Iehova me kore no te akamatapo ngoie ua i to ratou au manako ‘kia kore te mārama o te evangelia kakā o te Mesia e kakā mai i roto ia ratou.’ (2 Korinetia 4:3, 4) Teia tu akavare anga i te maata anga o te taime ka angaanga rava atu ia.

Ka tamanako ana i te papaanga Puka Tapu no runga i tetai tamaine tavini i te anere mataiti mua. Kua riro tana totou anga purepure ei akapuapinga i tona au pu. No tetai au ra kua aru aere ua aia i te au pipi, i te na ko anga e: “E tavini anake teianei au tangata no te Atua Teitei, ko tei akakite mai ïa kia kotou i te ara ora.” Kua tika tana au tuatua. Inara, te akakite maira te papaanga e kua uruia aia, kare e te angera, mari ra e te “demoni purepure” ra. I muri mai, ‘ariu atura Paulo, na ko atura ki taua vaerua ra, Te akaue atu nei au ia koe e aere koe ki vao i tenana vaine i te ingoa o Iesu Mesia ra. Aere atura aia ki vao i taua ora ra.’​—Angaanga 16:16-18.

Eaa ra a Paulo i tuaru ei i teia vaerua? Mei te mea, e kua apai mai te reira i te puapinga ki te au pu o te tamaine tei uruia e te temoni. Ma te au mana ririnui ra, penei kua akakite te tamaine tavini ki te aronga tanutanu e aea e tanu ei, e aea te au tamaine paretenia e akaipoipo ei, e iea ngai te aronga keri i te kimi anga i te auro. Kua akakeu katoa teia vaerua i te tamaine kia tuatua i etai au tuatua mou, te akapaapaa anga i te au pipi i te ngai tangata!

Noatu rai, e “demoni purepure” te reira. No te reira, kare ona tika anga kia rave i te au akakite anga no runga ia Iehova e tana oronga anga mai i te ora. Na tana tuatua akameitaki, penei tei tuatuaia ei turu i te au totou a te tamaine tavini ra, kua riro ei akaanga ke i te aronga akarakara mei te au pipi mou a Karaiti ra. Ma te tumu meitaki, kua akamatakite a Paulo i te au Kerititiano e: “Kare e tika ia kotou kia kai i te kaingakai a te Atu ra, e te kaingakai a te au demoni.” (1 Korinetia 10:21) No reira kare i te mea poitirere, kua takore te au Kerititiano anere mataiti mua i ta ratou au puka katoatoa no runga i te angaanga tauraatua.​—Angaanga 19:19.

E ‘Angela te Rere ra na Rotopu i te Mareva’

Mei ta tatou i kite ana, te akamaeu ra te Puka Tapu i te maata anga o te rave anga angera i teianei e te piri vaitata atura ki te Enemi o te Atua, ko Satani te Tiaporo ra. Ko te aiteanga ainei e kare te au angera tapu e o atu ki roto i te au angaanga a te tangata nei? Tei tuke ra, te rave ra ratou i teianei i tetai angaanga ririnui i te enua nei. Eaa te reira? Ei pau anga, e tau kia akara tatou i te puka Puka Tapu o Apokalupo. E maata atu te taime e taikuia ra te au angera i roto i teia puka i tetai atu puka o te Puka Tapu.

Ia Apokalupo 14:6, 7, ka tatau tatou i te papaanga a te apotetoro ko Ioane no tetai orama totou tana i rauka ra: “Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata, I te na ko anga ma te reo maata, Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.”

Te akaari maira teia irava i te angaanga puapinga rava a te au angera i teia tuatau. Te o ra ratou ki roto i tetai tuku anga angaanga rapurapu rava​—koia oki te akakiteanga i te tuatua meitaki o te Patireia o te Atua. No teia angaanga oki i taputou ei a Iesu ki tana au pipi e: “Tei vaitata ua ra au ia kotou, e tae ua atu ki te openga o teianei ao.” (Mataio 28:18-20) Akapeea a Iesu i te noo vaitata ua anga ma tana au pipi? Tetai tu na te orongaanga i te tauturu o te au angera kia ratou i reira teia angaanga puapinga maata e akatupuiaʼi.

E maata atu i te pirioni au ora ta te Au Kite o Iehova e akapou ra i te tutu aere anga i te tuatua meitaki o te Patireia o te Atua. I teia angaanga e raveia ra, te kite ra ratou i te tika o ta te au angera arataki anga. I ta ratou tutu aere anga i tera ngutupa e i tera ngutupa, i te maata anga o te taime kua tupu te reira na to ratou aravei anga i te au tangata tei pure ua ake ra no tetai tangata kia tauturu ia ratou kia marama i ta te Atua au akakoroanga. Na te arataki anga a te au angera, i te pae i te tu kite ua o te Au Kite, i tupu mai ei te au anere e te au tauatini ua atu i te kite ia Iehova i te au mataiti tataki tai!

Te akarongo ra ainei koe ki te angera e rere ra na rotopu i te mareva? Me atoro mai te Au Kite o Iehova, eaa e kore ei e uriuri maata atu i teia tuatua na te angera kia ratou?

[Au Tataanga Rikiriki i Raro]

[Pia i te kapi 8]

KOAI MA TE AU ANGERA?

TEI tuke mei ta te manganui e irinaki ra, kare te au angera i te au meta tei aere ke atu mei te au tangata tei mate ra. Te akakite ngoie ua ra te Puka Tapu no te aronga mate e ‘kare e tuatua i kitea.’ (Koheleta 9:5) Noea, i reira, te au angera te ngai i aere mai ei? Te akakite maira te Puka Tapu e kua anga tataki taiia ratou e te Atua i mua ake i te angaia anga te enua nei. (Iobu 38:4-7) Te maata o te kopu o te Atua i te rangi penei e au anere e te au mirioni, penei e au pirioni me kore e maata atu! Kua piri atu etai au angera kia Satani i roto i tana meameaau anga.​—Daniela 7:10; Apokalupo 5:11; 12:7-9.

Mei te mea e e Atua mako a Iehova, kare i reira i te mea poitirere e te akaaereia ra tona kopu angera maata.​—1 Korinetia 14:33.

• Te angera maata rava, i te pae o te ririnui e te mana, ko te angera maata, ko Iesu Karaiti, tei kapiki katoaia ko Mikaela. (1 Tesalonia 4:16; Iuda 9) I raro ake i tona mana taoonga ko te au terapi, te au kerupi, e te au angera.

• Te tu ra te au terapi i mua i te terono o te Atua. Ta ratou angaanga tikai ko te akakiteanga i to te Atua tu tapu e te akonoanga i tona iti tangata kia vai ma ua.​—Isaia 6:1-3, 6, 7.

• Te kitea katoaia ra te au kerupi i mua i to Iehova aroaro. Ei aronga tiaki me kore aronga akono i te terono o te Atua, te turu ra ratou i to Iehova taoonga ariki.​—Salamo 80:1; 99:1; Ezekiela 10:1, 2.

• Te au angera (te aiteanga “au karere”) e au komono e te au tauturu ratou no Iehova. Na ratou e apai ana i te anoano tu-Atua, me ko te akaora anga te reira i te iti tangata o te Atua me kare ra te takore anga i te aronga kino.​—Genese 19:1-26.

[Au Tutu i te kapi 7]

Te akarongo ra ainei koe ki te angera e rere ra na rotopu i te mareva?