Te Tuatau no te Kimi i te Atua
TE AKATUTU anga i runga i teia kapi ko te Akoroporiti Atene te reira, e ngai akamori anga maata teia i te au atua e te au atua vaine e manganui i te taime mua. I raro ake ia Akoroporiti ko Areopako, tei karangaia e i vai ana ei ngai akava anga tika i te au tuatau taito. I konei, e vaitata i te 2,000 au mataiti i topa akenei, te tu anga te apotetoro ko Paulo e kua oronga i tetai tuatua anga umere tikai. I te ka aru mai, ko teia etai au mea tana i tuatua:
“[Na te Atua] i anga i te tangata o te pa enua katoa nei no roto mai i te tangata okotai ra, kia noo ki runga i te tua katoa o te enua nei, e kua akanoo aia i te tuatau e te kotinga o te nooanga o te tangata nei, kia kimi ratou i te Atua, penei ko te aa atu ratou iaia e ka kitea tikai aia, noatu rai, e ko te tika, kare aia i mamao atu ia tatou tataki tai. Nana oki tatou i orai e i aaere ei e i vai ei.”—Angaanga 17:26-28, NW.
Mei teaa atura te tuke i te tuatua enua naringa te au tangata noa ua nei i akarongo i ta Paulo au tuatua! Eaa te maata o te au tamaki anga, e eaa te maata o te mamaeanga, te ka rauka i te paruruia naringa te au tangata i kite i to ratou inangaro tei matauia ei uanga na te tangata okotai ra tei angaia e te Atu Ngateitei, ko Iehova.
I teia tuatau, kua akatakakeia te au tangata e te ke anga pa enua, te akapupu anga ke ke, te au makitakita anga kara ke, e te tu aiteite kore o te au tangata. Inara, te vaira rai te au tuatua a Paulo ei apiianga. E uanga tatou katoatoa mei te reira tangata tei angaia e te Atua. I te reira tu ra, e au taeake tane e te au taeake vaine tatou katoatoa. E kare i tureiti roa no te kimi i te Atua koi vai ei aia kia kitea.
Te riro ra ta Paulo au tuatua ei mea pakari maata me tamanako tatou i te au tuatua openga i tana tuatua. Kua karanga aia: “Kua tuku [te Atua] i tetai ra koia oki kua akakoro aia i te akava i te au tangata i te enua nei i te tuatua tika na roto i tetai tangata tana i akataoonga ra, e kua oronga mai aia i tetai akapapu anga ki te au tangata ravarai i te mea kua akatu mai aia iaia mei te mate ra.”
Kua tika te tuakaou anga o Iesu i tau ki te tuatua enua, e mei ta Paulo i akaari mai, e akapapu anga te reira e te vaira tetai ra akava anga no te au tangata nei. Aea? Kua kite tatou e e 2,000 au mataiti vaitata atu mei te tu anga a Paulo ki runga ia Areopako e kua tuatua i teia au tuatua. E tikai, te akakite maira te tupuanga o te totou Puka Tapu e te vaitata maira tikai te reira. Mei teaa te reka i teia manako! Mei teaa i reira te ngakoikoi e kia kimi tatou i te Atua ma te ngakau tae tikai, i te mea e mei ta Paulo i akakite ki te au Atene, “i teianei te akakite ra aia ki te au tangata e e tau ratou katoatoa kia tataraara i te au mea ravarai”!—Angaanga 17:30, 31, NW.