6. E oronga mai i tetai akaraanga e akapeea ta Iesu taiku anga i te au tuatua mama ua ra inara tei apinganui ra i te aiteanga.

⁶ E putuputu a Iesu i te taikuanga i te au takiota tuatua poto ua e te taka meitaki, tei mama ua ra mari ra tei ki i te aiteanga tau. I te tuatau i mua ake i te nenei anga i te au puka ra, kua tauru aia i tana tuatua ki runga i te au manako e te au ngakau o te aronga tei akarongo maira kiaia. E akamanako ana i etai akatauanga: “Kare e tika i te tangata kia akono i nga pu e toko rua: . . . kare e tika kia akono atu i te Atua e te Mamona.” “Auraka e akakino atu; kia kore kotou e akakinoia mai.” “Ka kite kotou ia ratou i ta ratou e ua maira.” “Kare no te aronga ora te taunga, no te aronga maki ra.” “Ko tei rave i te koke ra, ka mate ïa i te koke.” “Ka apai mari i ta Kaisara ra kia Kaisara; e ta te Atua ra, e apai ïa ki te Atua.” “E mea meitaki i te oronga atu i te rave mai.”c (Mataio 6:24; 7:1, 20; 9:12; 26:52; Mareko 12:17; Angaanga 20:35) Tae roa mai ki teia tuatau, e vaitata i te 2,000 mataiti i muri ake i te tuatua anga ia te reira e Iesu, e ngoie ua te maara anga i taua au tuatuaanga ririnui ra.