Vaine Anere Tuma Mataiti ma te Akakoroanga i Roto i te Oraanga
KO ELIN tetai o te 60 tangata i Tuitene tei oti ua akenei i te tareia e kua 105 mataiti me kore i runga atu. E 105 ona uaorai mataiti. Noatu te noo ra aia i te kainga no te aronga pakari, kua tau i tona turanga pae kopapa kia tavini atu rai aia ei Kite maroiroi no Iehova, te oraanga tana i iki tere atu i te 60 mataiti i topa.
Me tutu aere ki etai ke, e aru ana a Elin i te akaraanga tei akanooia e te apotetoro ko Paulo iaia e mouauri ra i te kainga ua. E tutu aere ana a Paulo ki te aronga ravarai e atoro mai ana iaia. (Angaanga 28:16, 30, 31) Mei te reira rai a Elin i te taangaanga anga i te au atianga ravarai i te tuatua ki te aronga tama, te au taote nio, au taote, aronga pakoti rouru, au neti, e etai atu aronga e aravei ana aia i roto i te kainga, i te akakite kia ratou i te tuatua meitaki i roto i te Pipiria. Mei tera taime ki tera taime, e pati katoa ana te au taeake irinaki i roto ta Elin putuputuanga i ta ratou aronga apiipii Pipiria kia atoro iaia, kia puapingaia ratou mei tona kite e te au mea tei tupu kiaia.
E mea rekareka roa na te au mema o to Elin putuputuanga, tona tu mataora e te manako inangaro kia maata atu tana ka kite. Kua karanga tetai taeake Kite e: “E mea umere tikai tona tu kite e te maroiroi i te piri ki te au angaanga a te putuputuanga. Maara iaia te ingoa o te au tamariki katoatoa e te aronga koi aere ua maira ki roto i te putuputuanga.” Kua kite meitaki uaia a Elin no tona tu maoraora, te kangakanga, e te papu tikai i tona manako no runga i te oraanga.
Eaa tei tauturu ia Elin kia vai rekareka ua e kia akatinamou ki runga i tona akakoroanga i roto i te oraanga? E tatau ana aia e tai irava Tuatua Tapu i te au ra ravarai mei roto i te puka Examining the Scriptures Daily, tei neneiia e te Au Kite o Iehova. Na te taangaanga anga i te titia akamaata maata mai i te au reta, e tatau katoa ana aia e tai tuanga o te Pipiria i te au ra ravarai. E akapapa ana a Elin no te au uipaanga epetoma a te Au Kite o Iehova, noatu kare aia e tae ana ki reira i te pae kopapa, e akarongorongo ua ana aia i te au rekoti no teia au uipaanga nei. Na te tatau putuputu anga i te Pipiria e te au puka tei akatumuia ki runga i te Pipiria, e te kore e akaruke i te au uipaanga Kerititiano, e tauturu ia tatou kia noo i tetai oraanga mareka ua ma te akakoroanga noatu eaa to tatou mataiti.—Salamo 1:2; Ebera 10:24, 25.