Au Uianga a te Aronga Tatau
Kua uriuri “Te Punanga Tiaki” o Noema 1, 1995, no runga i ta Iesu i tuatua no runga i “teianei uki,” ia tatou e tatau ra ia Mataio 24:34. Ko te aiteanga ainei o teia kua papu kore e me kua akanooia to te Atua Patireia i te rangi i te 1914?
Kare te reira uriuri anga o Te Punanga Tiaki i taui i ta tatou apiianga puapinga no runga i te 1914. Kua akakite a Iesu i te akairo te ka akaari mai i tona parutia ma te mana Patireia. E aka akakite anga tika ta tatou e kua tupu teia akairo mei te 1914. Te akapapu maira te au tika no runga i te au tamaki, te au onge, te au mate, te au ngaruerue enua, e tetai atu au akakite anga tika e mei te 1914 mai, kua angaanga maroiroi ana a Iesu ei Ariki i to te Atua Patireia. Te akakite maira teia e mei te reira taime mai tei roto tatou i te openga o te akatereanga o te au mea nei.
Eaa, i reira, ta Te Punanga Tiaki e akataka meitaki ra? Tei roto te manako i te aiteanga o ta Iesu tuatua “uki” i roto ia Mataio 24:34. Te tatau ra te reira irava: “Koia mou taku e karanga atu kia kotou na, kare e ope teianei uki, e ope ei teianei au tuatua ravarai i te tupu.” Eaa te aiteanga o ta Iesu tuatua “uki,” i tona tuatau e to tatou katoa?
E manganui te au irava tei akapapu e kare a Iesu i tuatua te “uki” no runga i etai pupu meangiti e te takake, no runga i te au arataki ngati Iuda anake ua me kore tana au pipi tiratiratu anake ua. Mari ra, kua tuatua aia i te “uki” i te akaapaanga i te urupu ngati Iuda tei patoi iaia. Ma te mataora ra, ka rauka i te au tangata tataki tai i te rave i ta te apotetoro ko Petero i raurau i te ra Penetekote, e tataraara e ‘oraʼi i teianei uki māro.’—Angaanga 2:40.
I roto i te reira akakite anga, kare a Petero i akakite tikai i tetai ua atu mataiti me kore tuatau roa tei akatinamouia, e kare katoa aia i akapiri i te “uki” ki tetai ua atu ra. Kare aia i karanga e ka tau te au tangata kia akaoraia mei te uki tei anauia i taua mataiti ia Iesu me kore te uki tei anauia i te 29 T.N. Te tuatua ra a Petero no runga i te au ngati Iuda irinaki kore o te reira tuatau—penei etai pae e mapu ou, tetai atu e manga pakarikari—tei kite i ta Iesu apiianga, tei kite me kore tei rongo i tana au temeio, e kare i ariki iaia ei Mesia.
Na reira oki a Petero te marama anga i ta Iesu tuatua anga i te “uki” iaia e te tokotoru atu au apotetoro i te pae ia Iesu i te Maunga o Oliveta. Kia tau ki ta Iesu akakite anga totou, ko te au ngati Iuda o te reira tuatau—tei matauia, te aronga aiteite te mataiti kia Iesu—te aere ra ratou ka kite me kore ka rongo i te au tamaki, te au ngaruerue enua, te au onge, e tetai atu au akakite anga tika e te vaitata maira te openga o te akatereanga ngati Iuda. Te tika, kare te reira uki i topa ana i mua ake ka tae mai ei te openga i te 70 T.N.—Mataio 24:3-14, 34.
Ka tau kia arikiia e kare tatou i marama ua rai i ta Iesu au tuatua na te reira tu. Te vaira tetai inangaro o te au tangata apa ua i te kite i te ra tikai e tae mai ei te openga. Ka akamaara e kua kimi maata katoa te au apotetoro i te au akataka anga tikai, i te uianga: “E te Atu, ei teianei aina koe e akaoki mai ei i te au kia Iseraela?”—Angaanga 1:6.
Ma te au akakoro anga tae tikai tei aiteite, kua tauta te au tavini o te Atua i teia tuatau i te marama i ta Iesu i tuatua no runga i te “uki” no te akataka i etai tuatau taka tikai tei tareia mei te 1914. Ei akaraanga, tetai akamarama anga i mua ana koia oki ka riro tetai uki mei te 70 me kore 80 mataiti, e au tangata kua rava te pakari no te marama i te aite anga o te tamaki mua o teianei ao e tetai atu au tupu anga; no reira ka rauka ia tatou i te tare e mei teaa te vaitata o te openga.
Inara noatu te meitaki o taua au manako anga, kua aru ainei te reira ki te ako anga ta Iesu i oronga i muri mai? Kua karanga a Iesu: “Kareka te reira rā e te reira ora, kare rava [“te Tamaiti,” NW] e kite, kare oki te au angela o te rangi, ko toku Metua anake ra. . . . Kia matakite oki, kare kotou i kite i te ora e tae mai ei to kotou Atu.”—Mataio 24:36-42.
No reira kare te akakite anga i ou ake nei i roto i Te Punanga Tiaki no runga i “teianei uki” i taui i to tatou marama anga i tei tupu i te 1914. Inara kua oronga mai te reira i tetai marama anga taka meitaki atu i ta Iesu tuatua anga i te tuatua “uki,” te tauturuanga ia tatou kia kite e kare tana tuatua anga i te tumu no tatou kia tare—te tareanga mei te 1914 mai—e mei teaa te vaitata ia tatou ki te openga.