Au Uianga a te Aronga Tatau

Koai te akava ngati Iuda i ko i te iero? Eaa ta ratou angaanga?

Ko tetai angaanga e rave ana te ngati Levi kare i te taunga, ko te angaanga a te akava. Tei raro ratou i te akaaere anga a te rangatira o te iero. Kua tata te ngati Iuda ko Philo i te au angaanga a teia au akava: “Tetai pae o teia [ngati Levi] e tiaki ana ratou i te au pa i te ngai tomo anga, tetai i roto i te [ngai o te iero] i mua i te paruru kia kore tetai tangata e tomo ki roto. Tetai ka tutaka ratou takapini i te iero e tae ua atu to ratou tuatau ka taui i te po e te ao, e ka tiaki maroiroi ratou.”

Ka tauturu teia au akava i te Sunederi i ko i te iero. Ko teia pupu aronga anake ta te au Roma i akatika kia apai i te au apinga tamaki.

Kia tau ki te tangata apii ko Joachim Jeremias, “I to Iesu tuatua anga ki te aronga tei opu iaia, i te au rā i te Iero e apii ra e kare i opu iaia (Mata. 26.55), taka meitaki i reira e ko te au akava o te Iero tei aere mai i te tapeka iaia.” Kua irinaki katoa teia tangata tata e ko te aronga tei tonoia kia opu ia Iesu i tetai mai rā, ko te akava o te iero. (Ioa. 7:32, 45, 46) Kua tonoia te au akava e to ratou rangatira kia arataki mai i te au pipi a Iesu ki mua i te Sunederi e kua kika katoa ratou ia Paulo ki vao i te iero.—Anga. 4:1-3; 5:17-27; 21:27-30.