“Ko te Akono i ta te Vaerua ra, ko te Ora ïa e te Au”

1, 2. No teaa ra te au Kerititiano akatainuia ka inangaro ei i te kite no runga ia Roma pene 8?

PENEI kua tatau ana koe ia Roma 8:15-17 i te tuatau o te Akamaaraanga i te mate o Iesu. Te akamārama ra teia irava akapeea te au Kerititiano akatainuia i kite ei e manakonakoanga to ratou kia noo e tuatau ua atu i te rangi. Te akataka ra a Roma 8:1 i te aronga akatainuia ko “te aronga i roto ia Iesu Mesia.” Inara ka tau anake ainei a Roma pene 8 ki te aronga akatainuia? Me ka tauturu katoa ainei te reira i te aronga e manakonakoanga to ratou kia noo i te enua nei e tuatau ua atu?

² Kua tataia a Roma pene 8 no te aronga akatainuia tikai. Rauka ia ratou “te Vaerua ra” ei aronga “te tatari anga i te akatamariki anga mai, koia oki te akaora anga i to [ratou] nei kopapa.” (Roma 8:23) I te tuatau ki mua, ka riro ratou ei tamariki na te Atua i te rangi. Kua akakore a Iehova i ta ratou ara na roto i te oko. Kua akariro aia ia ratou ei aronga tuatua tika e rauka ai kia riro ei tamariki nana.​—Roma 3:23-26; 4:25; 8:30.

3. No teaa ra te aronga tei manakonako kia ora e tuatau ua atu i te enua nei ka tau katoa kia apii ia Roma pene 8?

³ Inara, i te tuanga mua o te puka a Roma, kua tata a Paulo no runga i tetai tangata kare i akatainuia inara kua riro ei tangata tuatua tika i mua ia Iehova. Ko Aberahama ïa. I ora ana teia tangata tuatua tika i mua roa ake ka oronga ai a Iesu i tona oraanga ei oko. (E tatau ia Roma 4:20-22.) I teia rā, ka riro katoa te au Kerititiano tiratiratu e manakonakoanga to ratou kia ora e tuatau ua atu i te enua nei ei aronga tuatua tika i mua ia Iehova. Ka puapinga katoa ratou mei te ako i roto ia Roma pene 8.

4. Me tatau tatou ia Roma 8:21, eaa ta tatou ka ui kia tatou uaorai?

⁴ Ia Roma 8:21, ka kite tatou i te akapapuanga a Iehova e ka tae mai te ao ou e ka akamataraia te tangata mei te ara e te mate. Te na ko ra teia irava e ka rekareka ratou “kia rauka te rangatira meitaki o te tamariki a te Atua.” Te kite ra ainei koe ia koe uaorai i roto i te ao ou? Ka uriuri ana tatou i ta tatou ka rave kia tae ki reira.

“KO TE AKONO OKI I TA TE KOPAPA NEI”

5. Eaa te turanga ta Paulo i akataka mai ia Roma 8:4-13?

⁵ E tatau ia Roma 8:4-13. I te pene 8 o Roma, kua akataka a Paulo e rua tu tangata, “ko te akono oki i ta te kopapa nei” e “ko te akono i ta te Vaerua ra.” Penei ka manako tetai pae e te akataka ra a Paulo i te aronga kare i te Kerititiano e te aronga e Kerititiano ratou. Inara i konei te tata ra a Paulo ki te au Kerititiano, te aronga “i akonoia ei aronga tapu.” (Roma 1:7) No reira “ko te akono oki i ta te kopapa nei” e “ko te akono i ta te Vaerua ra,” e au Kerititiano ratou. Akapeea ratou i tuke ei mei tetai e tetai?

6, 7. (a) Eaa te aiteanga o te tuatua “ta te kopapa nei” i roto i te Pipiria? (e) Akapeea te tuatua “ta te kopapa nei” i taangaangaia ai ia Roma 8:4-13?

⁶ Me taangaanga te Pipiria i te tuatua “ta te kopapa nei,” te akataka ra te reira i te au mea tukeke. Tetai taime tona aiteanga ko to tatou kiko e te kopapa. (Roma 2:28; 1 Korinetia 15:39, 50) Te taiku katoa ra i te pirianga kopu tangata. Ei akaraanga, karanga te Pipiria e no roto mai a Iesu “i te uanga o Davida, i te akonoanga i te kopapa nei,” e kua kapiki a Paulo i te ngati Iuda ko tona “au taeake i te akonoanga i te kopapa nei.”​—Roma 1:3; 9:3.

⁷ No reira, eaa te aiteanga o ta Paulo tuatua ia Roma 8:4-13 e “ko te akono oki i ta te kopapa nei”? Kia kite i te pauanga, ka akara tatou ia Roma 7:5. Kua tata a Paulo: “Tei runga tatou i ta te kopapa ra, te maroiroi ra te anoano kikino i raro ake i te ture ra ki roto i to tatou kopapa.” I konei kua akamārama a Paulo e “ko te akono oki i ta te kopapa nei,” ko te aronga te akamou ra e te aru i to ratou uaorai anoano kikino, te rave i ta ratou i inangaro.

8. No teaa ra a Paulo i anoanoia ai kia akamatakite i te au Kerititiano akatainuia auraka e akono “i ta te kopapa nei”?

⁸ No teaa ra a Paulo i akamatakite ei i te au Kerititiano akatainuia auraka e akono i “ta te kopapa nei”? E no teaa ra te au Kerititiano pouroa i teia tuatau i anoano ei i teia akamatakiteanga? No te mea penei ka akamata tetai ua atu tavini tiratiratu o te Atua i te akariro i tona uaorai au anoano ei mea puapinga i roto i tona oraanga. Ei akaraanga, kua tata a Paulo e kua riro tetai pae taeake i Roma ei tuikaa “no to ratou uaorai kopu ra.” Penei te aiteanga i tana tuatua koia oki, kua riro te ainga, te kai, me kore te au navenave o teianei ao ei mea puapinga roa atu i roto i to ratou oraanga. (Roma 16:17, 18; Philipi 3:18, 19; Iuda 4, 8, 12) E no tetai tuatau, kua tupu tetai turanga i roto i te putuputuanga i Korinetia te rave ra tetai taeake i te pirianga ainga ki “te vaine a tona uaorai metua tane.” (1 Korinetia 5:1) Te taka meitaki ua ra, kua anoano teia au Kerititiano mua i te akamatakiteanga a Paulo no te “akono oki i ta te kopapa nei.”​—Roma 8:5, 6.

9. Eaa ta Roma 8:6 kare e akataka maira?

⁹ Ka tau katoa teia akamatakiteanga no teia tuatau. Noatu e kua roa tetai tangata i te tavini ia Iehova, penei ka akamata aia i te akono i “ta te kopapa nei.” No reira, ko te aiteanga ainei o ta Paulo tuatua e kare rava tatou e akamanako i te au mea mei te kai, te ngai angaanga, te tarekareka, me kore te akainangaro? Kare rava. E mea noa ua teia no te oraanga. Kua rekareka katoa a Iesu i te kai e kua angai i tetai ke. Kua kite katoa aia e ka anoanoia aia kia akangaroi. E kua tata a Paulo no te oraanga akaipoipo, ka riro te pirianga ainga ei tuanga puapinga.

10. Eaa te aiteanga o te tuatua “ko te akono oki”?

¹⁰ Eaa te aiteanga i ta Paulo i tuatua “ko te akono oki”? Te tuatua Ereni ta Paulo i taangaanga tona aiteanga koia oki kia akamou i to tetai manako pouroa e te au akakoroanga ki runga i tetai apinga. Akamārama tetai tangata kite e te tuatuaia ra teia tuatua no te aronga “te manako maata ra no runga i tetai mea, e mea matau i te tuatuaia,” e te akamou maata ki runga i to ratou uaorai anoano noinoi. Ka tuku ua ratou i taua au anoano kia akatere i to ratou oraanga.

11. Eaa tetai au mea te ka riro ei mea puapinga maata roa atu kia tatou?

¹¹ Kua anoanoia te au Kerititiano i Roma kia akara matatio ia ratou uaorai e kia kimi eaa ta ratou e akono ra. Ko “te akono ra [ainei] i ta te kopapa”? I teia rā, ka anoano katoaia tatou kia akamanako eaa te mea puapinga rava atu kia tatou. Eaa ta tatou mea reka roa atu i te tuatua? Eaa tikai ta tatou e reka ana i te rave? Penei ka kite mai tetai pae e te akamanako putuputu ra ratou i te tamata i te au uaina tukeke, te akamanea i to ratou are, te oko i te kakau ou, te akaputu i te moni, me kore te parani i te orote. Kare teia au apinga i te mea tarevake. Penei e mea noa ua teia i roto i to tatou oraanga. Ei akaraanga, kua oronga rai a Iesu i te uaina i ko i te akaipoipoanga, e kua ako a Paulo ia Timoteo “ei manga wina iti ra” no tona oraanga kopapa. (1 Timoteo 5:23; Ioane 2:3-11) Kare ra te uaina i te mea puapinga roa atu i roto i to ratou oraanga. Akapeea ra tatou? Eaa te mea puapinga roa atu i roto i to tatou oraanga?

12, 13 No teaa ra tatou ka matakite ei i ta tatou e akamou ra ki runga?

¹² Akamatakite a Paulo: “Ko te akono oki i ta te kopapa nei, ko te mate ïa.” (Roma 8:6) Eaa te aiteanga o tana tuatua? Me “akono oki [tatou] i ta te kopapa nei,” penei ka ngere tatou i to tatou pirianga kia Iehova i teianei e ka ngere i te ora i te tuatau ki mua. Inara kare teia e anoanoia kia tupu. Ka rauka rai i tetai tangata i te taui. Maara ainei ia koe te tangata ainga tau kore i Korinetia tei akaateaia ki vao? Kua taui tona tu e kua akamutu i te aru i tona au anoano tau kore. Kua tavini akaou aia ia Iehova ma te tu mā.​—2 Korinetia 2:6-8.

¹³ E akaraanga kino tikai teia tangata no te “akono oki i ta te kopapa nei,” noatu ra kua rauka iaia i te taui. No reira me kua akamata tetai Kerititiano i teia tuatau i te aru i tona au anoano kino kare i to Iehova au turanga, ka rauka katoa iaia i te taui. Me akamaara tatou i ta Paulo akamatakiteanga, ka akakeuia tatou kia rave i tetai ua atu tauianga tei anoanoia tatou.

“KAREKA KO TE AKONO I TA TE VAERUA RA”

14, 15 (a) Eaa ta Paulo i akakite kia akamou i to tatou manako ki runga? (e) “Ko te akono i ta te Vaerua ra” kare tona aiteanga i teaa?

¹⁴ I muri ake te tuatua anga a Paulo no runga i te au kino o te “akono oki i ta te kopapa nei,” akamārama aia: “Kareka ko te akono i ta te Vaerua ra, ko te ora ïa e te au.” Mei teaa tikai te tutaki umere ka rauka ia tatou!

¹⁵ Inara “ko te akono i ta te Vaerua ra” kare te aiteanga e kare te reira tangata e kite ana eaa te tupu ra. Kare te aiteanga e ka manako e ka tuatua ua rai tetai tangata no runga ia Iehova e te Pipiria. Ei akaraanga, e oraanga noa ua nei to te au tavini o te Atua i te anere mataiti mua. Kua rekareka ratou i te kai e te inu, kua akaipoipo, kua utuutu i te ngutuare tangata e kua rave i te angaanga.​—Mareko 6:3; 1 Tesalonia 2:9.

16. Eaa te mea puapinga roa atu i roto i to Paulo oraanga?

¹⁶ Inara kare a Paulo e te au Kerititiano mua i akariro i teia au angaanga noa ua nei ei mea puapinga roa atu i roto i to ratou oraanga. Ei akaraanga, kua kite tatou e kua akono a Paulo iaia uaorai na te maanianga i te puakapa. Inara kare tana angaanga i riro ana ei mea puapinga roa atu i roto i tona oraanga. Te mea puapinga roa atu i roto i to Paulo oraanga ko te tavini i te Atua. Kua akamou a Paulo ki runga i te angaanga tutu aere e te apii. (E tatau ia Angaanga 18:2-4; 20:20, 21, 34, 35) Kua anoanoia te au taeake e te au tuaine i Roma kia aru ia Paulo, e pera katoa tatou.​—Roma 15:15, 16

17. Eaa te au puapinga no “te akono i ta te Vaerua ra”?

¹⁷ Mei teaa rai to tatou oraanga me akamou ki runga i te tavini anga ia Iehova? Akakite a Roma 8:6 e: “Ko te akono i ta te Vaerua ra, ko te ora ïa e te au.” Me rave i te reira, ka ō mai te tukuanga i to tatou manako kia aratakiia e te vaerua o Iehova e kia apii i te akamanako mei iaia rai. Te taputou maira a Iehova i te oraanga mataora e te merengo no tatou i teianei e te ora mutukore i te tuatau ki mua.

18. Akapeea e rauka ai ia tatou te au me “akono i ta te Vaerua ra”?

¹⁸ Eaa te aiteanga te karanga anga a Paulo “ko te akono i ta te Vaerua ra” ka apai mai i te au kia tatou? Ka inangaro te katoatoa i te au, te ngakau au tikai, inara e iti ua tei kite mai i te reira. Ka akameitaki ia Iehova no te mea ka rauka ia tatou te ngakau au tika tikai. Ka rauka katoa te au i rotopu ia tatou e te ngutuare tangata pera katoa te au taeake i roto i te putuputuanga. I te mea e aronga apa ua tatou, tetai taime ka tupu te manamanata i rotopu ia tatou e te au taeake e te au tuaine. Me tupu te reira, ka aru tatou i te akoanga a Iesu: “E akamata i te aere e ongi i to taeake.” (Mataio 5:24) E akamaara e te tavini katoa ra toou taeake me kore tuaine ia Iehova, “te Atua au.”​—Roma 15:33; 16:20.

19. Eaa te tu au takake ta tatou e mataora nei?

¹⁹ Me akamou tatou i “te akono i ta te Vaerua ra” ka rauka katoa ia tatou te au ma te Atua. Kua tata te peroveta ko Isaia: “Ko tei ngaueue kore te manako ra, taau ïa [e Iehova] e tiaki, e ei au nuingangare tona, koia i irinaki ia koe.”​—Isaia 26:3; e tatau ia Roma 5:1.

20. Eaa ra koe i rekareka ai i te akoanga i roto ia Roma pene 8?

²⁰ Me e manakonakoanga to tatou kia ora e tuatau ua atu i te rangi me kore i te enua nei, ka puapinga tatou pouroa mei te akoanga pakari i roto ia Roma pene 8. Te mataora nei tatou e te akamaroiroi ra te Pipiria ia tatou kia akamou ki runga i te tavini anga ia Iehova kare ki runga i to tatou au anoano. Kua kite tatou “ko te akono i ta te Vaerua ra,” ka rauka te tutaki manea. Tata a Paulo: “Te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”​—Roma 6:23.