“I Pera te Atua i te Aroa Anga Mai ia Tatou Nei”
“I pera te Atua i te aroa anga mai ia tatou nei, kia aroa katoa tatou ia tatou uaorai e tikaʼi.”—1 IOANE 4:11.
1. Ia Mati 23 i muri ake i te opunga te ra, eaa etai au mirioni tangata ka akaputu ei ki roto i te au Are Uipaanga Patireia e etai atu au ngai uipaanga takapini i teianei ao?
A TE Tapati, ia Mati 23, 1997, i muri ake i te opunga te ra, kare e ekoko anga e ka tere atu i te 13,000,000 au tangata te ka akaputu atu ki roto i te au Are Uipaanga Patireia e etai atu au ngai uipaanga i te ao katoa te taangaangaia ra e te Au Kite o Iehova. No teaa ra? No te mea kua akatukiia atu to ratou ngakau e ta te Atua ra akakiteanga i te aroa maata ki te au tangata nei. Kua akakite mai a Iesu Karaiti i te manako anga ki runga i taua akapapu anga meitaki rava ra i to te Atua aroa, i te na ko anga: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16.
2. Eaa te au uianga te ka rauka ia tatou kia ui ia tatou uaorai ma te puapinga no ta tatou tu akono ki to te Atua aroa?
2 Ia tatou ka akamanako i te aroa ta te Atua i akaari mai, ka tau tatou kia ui ia tatou uaorai, ‘Te ariki tikaʼi nei ainei au i ta te Atua i rave ra? Te akakite papu ra ainei te tu o taku akonoanga i toku oraanga i taua ariki anga ra?’
“Ko te Atua Oki te Aroa”
3. (a) Eaa ra te akakiteanga i te aroa i kore ei i te mea matau koreia no te Atua? (e) Akapeea te mana e te pakari i te akakitea anga i tana au angaanga no te anga mai anga?
3 Ko te akakiteanga i te aroa kare ia i tetai apinga maata roa i ta te Atua ra tuanga no te mea “ko te Atua oki te aroa.” (1 Ioane 4:8) Ko te aroa tona tu maata. I tona teateamamao anga i te enua ei nooanga no te tangata, tona akatuanga i te au maunga e te akaputuanga i te vai ki te au roto e te au moana ko tetai akakite anga ia i te mana akakore anga i te ao. (Genese 1:9, 10) I ta te Atua ra akamata anga i te aerenga vai e te aerenga okitene i tana akapapa anga i te au apinga mea ngiti roa kia akaraia e te au rakau rikiriki tuke tuke kia taui i te au apinga kemikara o te enua nei ki roto i tetai tu te ka rauka i te au tangata i te kai ei akatamou i to ratou oraanga, i tana akanoo anga i te uati o to tatou kopapa kia tau ma te au ra e te au marama ki runga i te Enua paraneta nei, kua akakite mai teia i te pakari maata. (Salamo 104:24; Ieremia 10:12) Inara, ko te mea maata roa i roto i te au mea kopapa angaia nei ko te akapapu anga i to te Atua ra aroa.
4. I te au mea kopapa tei angaia maira, eaa te akapapu anga i to te Atua ra aroa te tau ra tatou katoa kia kite e kia ariki oki?
4 Te akakite maira kia tatou i to te Atua aroa i te tongi anga i te kakati anga i tetai ua rakau reka, kua para kare ra i maaniia ei tamou anake i to tatou oraanga mari ra kia apai katoa mai i te mareka anga no tatou. Te kite ra to tatou mata i te akapapu anga i te reira kare e tarevake i te au opunga ra apai ke ra i te ao, te au rangi ki ra i te au etu i tetai po manea ra, te au tu tuke tuke e te au kara meitaki o te au tiare, te au kangakanga a te au manu ou ra, e te au katakata anga maanaana o te au oa ra. Te akakite maira to tatou iu i te reira ia tatou e uti ra te ao i te kakara reka o te au tiare i te tuatau tupuanga rau. Te kite ra to tatou taringa i te reira ia tatou e akarongorongo ra i te aruru o te topa anga kauvai, te imene anga a te au manu, e te au reo o ta tatou au akaperepere ra. Ka manako ngakau tatou i te reira i te takave anga pumaana mai a tetai ta tatou e akaperepere ra. Kua tukuia ki roto i etai au manu te tika kia kite, kia akarongo, me kare kia ongi i te au apinga kare e rauka i te au tangata. Inara ko te au tangata, kua angaia mai i to te Atua ra tu, ka rauka ia ratou kia kite i to te Atua ra aroa na roto i tetai tu kare ra e rauka i te manu kia kite.—Genese 1:27.
5. Akapeea ta Iehova ra akaari anga i te aroa maata kia Adamu raua ko Eva?
5 I ta te Atua ko Iehova ra anga maianga i nga tangata mua ko Adamu raua ko Eva, kua koropiniia raua e ia ma te akapapu anga i tona aroa. Kua tatanuia e ia tetai kainga, e parataito, e kua akatupu i te au tu rakau ravarai kia tupu ki reira. Kua oronga aia i tetai kauvai ei tamauu i te reira e kua akaki katoa i reira ma te au manu o te reva e te au animara. Kua oronga atu aia i te reira katoa kia Adamu raua ko Eva ei kainga no raua. (Genese 2:8-10, 19) Kua akono a Iehova ia raua ei tamariki nana, ei tuanga no tana pamiri i te ao katoa e pini ua ake. (Luka 3:38) I te oronga anga ia Edene ei tetai akaraanga, kua akanoo te Metua i te rangi ra ki mua i teia nga tangata mua ra i te angaanga akamerengoanga kia akatotoa ia Parataito kia tapoki i te ao katoa nei. Ka akakiia te enua katoa ma ta raua anaunga.—Genese 1:28.
6. (a) Eaa toou manako ngakau no te raveanga meameaau ta Adamu raua ko Eva i rave ana? (e) Penei eaa te ka akakite mai e kua kite tatou mei tei tupu ra i Edene e kua puapingaia tatou mei taua kite anga ra?
6 Inara, i muri poto akera, kua aro atu a Adamu raua ko Eva i tetai timataanga i te akarongo, e timata anga i te tiratiratu. Kua topa tetai i mua e i muri akera kua topa katoa tetai i te akaari i te arikianga no te aroa tei orongaia ki runga ia raua. E mea poitirere ta raua i rave. Kare e kotoe anga no te reira! Ei tetai tupu anga, kua ngere raua i to raua pirianga ma te Atua ra, kua akaateaia mai tona pamiri, e kua tuaruia mai i Edene. Te vai nei ia tatou i teia tuatau te au mamae anga no ta raua ara. (Genese 2:16, 17; 3:1-6, 16-19, 24; Roma 5:12) Inara kua kite ainei tatou mei taua tupu anga ra? Akapeea tatou i te akonoanga i to te Atua ra aroa? Te akaari ra ainei ta tatou ikianga i te au ra tataki tai e te ariki ra tatou i tona aroa?—1 Ioane 5:3.
7. Noatu rai ta Adamu raua ko Eva i rave ra, i akapeea ta Iehova akaari anga aroa no to raua anaunga?
7 Noatu rai te ngere takiri anga i te arikianga to tatou nga metua tangata mua ra i akaari no te au mea ravarai ta te Atua i rave na raua kare i akakore i to te Atua uaorai aroa. No tona inangaro i te au tangata kare ra i anauia ake i reira—kapiti katoa ia tatou te ora nei i teia tuatau—kua akatika te Atua ia Adamu raua ko Eva kia akatupu mai i tetai pamiri i mua ake i to raua matenga. (Genese 5:1-5; Mataio 5:44, 45) Naringa kare aia i pera, kare tetai i o tatou nei i anauia mai. Na te akakite marie anga i tona anoano, kua oronga katoa maira Iehova i tetai tumu anga no te manakonako anga no te au anaunga katoatoa o Adamu te ka akono i te akarongo. (Genese 3:15; 22:18; Isaia 9:5, 6) Kua kapiti katoa tana akanoonoo anga i te au tika kia rauka i to te pa enua ravarai tei ngaro ia Adamu ra, koia oki, te oraanga apa kore ua, ei au mema marekaia no ta te Atua ra pamari i te ao katoa e pini ua ake. Kua rave aia i teia na te oronga maianga i tetai oko.
Eaa ra i Tau ei Tetai Oko?
8. Eaa ra i kore ei e rauka ua i te Atua kia akatika e noatu ra ka tika kia mate a Adamu raua ko Eva ra, kare tetai o to raua anaunga akarongo ra e tau kia mate?
8 Kua tau tikai ainei no tetai oko tutaki i te tu o tetai oraanga tangata kia tutakiia? Kare ainei e rauka ua i te Atua kia akatika e noatu ka tika kia mate a Adamu raua ko Eva no ta raua meameaau, pouroa ta raua anaunga te ka akarongo i te Atua ra ka rauka kia ora e tuatau ua atu? Mei tetai turanga akaraanga poto ua a te tangata nei, penei ka tangi anga tau te reira. Inara, ko Iehova e “inangaro aia i te tuatua-tika e te tuatua-tau.” (Salamo 33:5) No muri io anake i to Adamu raua ko Eva ra riro anga ei nga tangata ara i anau tamariki ei raua; no reira kare tetai o taua au tamariki ra i anau apa kore ia mai. (Salamo 51:5) Kua akatuangaia ratou pouroa i te ara, e ko te utunga o te ara ko te mate ia. Naringa i manako kore a Iehova i teia, eaa te tu akaraanga ta te reira te ka akanoo no te au mema o tona pamiri i te ao katoa e pini ua ake? Kare e rauka iaia kia manako kore i tana uaorai au turanga tuatua tika. Kua akangateitei aia i te au umuumu anga no te tuatua tika. Kare e rauka i tetai kia kite tarevake tei tau ma te tu ta te Atua i akono ra i te au maro anga tei kapitiia maira.—Roma 3:21-23.
9. Kia tau ki te turanga tu-Atua no te tuatua-tau, eaa te tu oko tei umuumuia ra?
9 Akapeea, i reira, ka raukaʼi tetai tumu anga tau kia orongaia no te akaoraanga i te aronga o ta Adamu anaunga tei akakite ra i te akarongo aroa kia Iehova? Me ko tetai tangata apa kore ua te ka mate ei atinga, ka rauka i te tuatua tau kia akatika i te puapinga o taua oraanga apa kore ua ra kia oronga i tetai tapokianga no te au ara o te aronga te ka ariki ma te akarongo i taua oko ra. I te mea no te ara a te tangata okotai, koia Adamu, nana ra i akariro i te pamiri tangata katoatoa ei aronga ara, ko te toto akamaringiia ra o tetai atu tangata apa kore ua ra, e aiteite te puapinga, ka akatau i te arite no te tuatua tau. (1 Timoteo 2:5, 6) Inara ka kiteia mai ki ea taua tu peretana ra?
Eaa te Maata o te Tutaki Ra?
10. Eaa ra i kore ei e rauka i to Adamu ra au anaunga i te oronga i te oko umuumuia ra?
10 I roto i te au anaunga o Adamu ara ra, kare e okotai tei tau kia oronga i tei umuumuia kia raukaʼi te oko akaou mai i te au manakonako oraanga ta Adamu i akakore atura. “Kare rava e tika i te tangata kia akaora i tona taeake, e kare ana tutaki kia apai ki te Atua e rauka mai ei aia ra; ko te oko oki o te vaerua, e maata ua atu ïa, e ko te kore rai ïa e tuatau ua atu; kia ora ua mairai aia e tuatau ua atu, e auraka roa kia tae ki te pe.” (Salamo 49:7-9) I te ngai o te akarukeanga i te au tangata nei ma te kore e manakonako anga, kua oronga aroa ua maira a Iehova uaorai.
11. Na teea rave anga ta Iehova ra oronga anga i te oraanga tangata apa kore ua tei umuumuia ra no tetai oko tau?
11 Kare a Iehova i tono mai i tetai angera ki te enua nei kia akameamea ua e te mate atura aia na te akatakotoanga i tetai kopapa akatutu ua iaia e ora ua atura ei tetai vaerua. Kareka ra, na te raveanga i tetai temeio te ka rauka anake i te Atua, i Tei Anga ra, kia rave, kua akataka ke maira aia i te mana oraanga e te tu peretana o tetai tamaiti no te rangi maira ki te vairanga tamariki o tetai vaine, ko Maria te tamaine a Eli, no te kopu o Iuda. Na to te Atua mana angaanga, koia tona vaerua tapu, i paruru i te tupu anga o taua tamaiti ra i roto i te kopu o tona metua vaine, e kua anauia mai aia ei tetai tangata apa kore ua. (Luka 1:35; 1 Petero 2:22) Kua rauka iaia i reira i te oronga i te tutaki umuumuia ei oronga anga i tetai oko te ka akamerengo tikai i te au umuumu anga o te tuatua tau tu-Atua ra.—Ebera 10:5.
12. (a) No teea tu a Iesu i riro ei ei “Tamaiti anau-tai” na te Atua? (e) Akapeea ta te Atua ra tonoanga mai iaia ei oko i te akaketaketa anga i Tona aroa no tatou?
12 Kua oronga a Iehova ki teea o tana au tamariki e mano tini ua atura, i teia angaanga? Ki tei akatakaia ra i te au Tuatua Tapu ei tana “Tamaiti anau-tai.” (1 Ioane 4:9) Kua taikuia teianei tuatua ei akataka, kare ei tona tu i riro mai ra aia ei tangata, mari ra i tona tu mua i te au rangi ra. Koia anake ua ta Iehova i anga tika maira kare tetai ke atu i kapitiia atu. Koia tei Anau Muaia o te au mea katoa tei angaia maira. Koia ta te Atua i taangaanga kia anga mai i te au mea ora katoa atura. E au tamariki te au angera na te Atua, mei ia Adamu ra e tamaiti na te Atua. Inara kua akatakaia a Iesu ei “te kakā e tau i te Tamaiti anau tai a te Metua ra.” Kua tuatuaia aia i noo ana “i runga i te umauma o te Metua ra.” (Ioane 1:14, 18) Ko tona pirianga ma te Metua ra e mea vaitata, e mea muna, e te maru oki. Te akono kapiti ra aia i te aroa o tona Metua no te tangata nei. Te akakite maira Maseli 8:30, 31 i te manako ngakau o tona Metua no teia Tamaiti e akapeea oki te manako ngakau o te Tamaiti no te au tangata nei: “E te mataora ua ra au i te au rā katoa ra, i te rekareka tamou marie anga ki mua i to [Iehova] aroaro . . . e tei te au tamariki a te tangata ra [to Iesu, koia ta Iehova Pu Angaanga, te tu tikai o te pakari tona] mataora anga.” Ko teia ta te Atua ra Tamaiti oko maata i tonokia mai ki te enua kia oronga i te oko. Inara, mei teaa ra te puapinga maata ta Iesu tuatua: “I aroa mai te Atua i to te ao nei, kua tae rava ki te oronga anga mai i tana Tamaiti anau tai”!—Ioane 3:16.
13, 14. Eaa ta te tataanga Pipiria no ta Aberahama tamata anga kia tuku atinga ia Isaaka te ka tau kia tauturu ia tatou kia ariki i ta Iehova i rave ra? (1 Ioane 4:10)
13 Ei tauturu ia tatou kia kite mou i te aite anga o te reira, i mua roa atu i to Iesu aere anga mai ki te enua nei, kua akaue atura te Atua ia Aberahama, i etai 3,890 mataiti kua topa: “Ka rave i taau Tamaiti i tenana, i taau tamaiti okotai ra ko Isaaka, taau e akaperepere na, ka aere ki te enua ra kia Moria, ka apai mai ei iaia i reira, ei atinga karakaratio ki runga i tetai maunga taku e akakite atu kia koe.” (Genese 22:1, 2) No te akarongo, kua rave a Aberahama. E tuku ia koe uaorai ki roto i to Aberahama turanga. Ka peea me naau taua tamaiti ra, taau tamaiti okotai ua ra taau i akaperepere? Eaa toou manako ngakau ia koe e vaira i te vaie no te atinga karakaratio, te aere anga no etai ra ki te enua kia Moria ra, e te tuku anga i taau tamaiti ki runga i te atarau ra?
14 Eaa ra tetai metua inangaro ra i tu ei i taua manako ngakau ra? Te tuatua ra ia Genese 1:27 e kua anga iora te Atua i te tangata i Tona uaorai tu. Te akaata maira to tatou au manako ngakau aroa e te inangaro i tetai tu kotingaia i to Iehova uaorai aroa e te inangaro. I to Aberahama turanga, kua tapuia e te Atua, kia kore a Isaaka e tuku atinga ia. (Genese 22:12, 13; Ebera 11:17-19) Inara, i tona uaorai turanga, kare a Iehova i tapu poto ua i te orongaanga i te oko, noatu rai e kua raveia te reira ma te tutaki anga maata nana uaorai e tana Tamaiti oki. Ko tei raveia ra, kare no tetai apainga i ta te Atua ra tuanga, mari ra, ei tetai akakite anga i te tu takinga meitaki aroa maata ua. Te ariki maata ra ainei tatou i te reira?—Ebera 2:9.
Eaa te ka Rauka na te Reira
15. Eaa te akatupu anga a te oko ki te au oraanga noatu rai i teianei akatereanga o te au mea nei?
15 E tupu anga meitaki to taua apinga aroa orongaia maira e te Atua, ki runga i te au oraanga o te aronga ariki i te reira ma te akarongo. Kua taka ke ratou mei te Atua ra i mua ana ei tetai tupu anga no te ara. Kua riro ratou, mei ta te Tuatua nana i akakite maira, ‘e au enemi no to ratou manako i runga i te au angaanga kikino ra.’ (Kolosa 1:21-23) Inara kua “akaongiia oki [ratou] i te Atua, i to ratou vai enemi anga, i te mate o tana Tamaiti.” (Roma 5:8-10) I te taui anga i to ratou tu oraanga e te ariki anga i te akakore anga ara ta te Atua i oronga ki te aronga tei akono ra i te akarongo i to Karaiti atinga, kua akaperepereia ratou ma tetai akava ngakau ma.—Ebera 9:14; 1 Petero 3:21.
16. Eaa te au akameitakianga te orongaia ra ki te anana iti no to ratou akarongo i te oko ra?
16 Kua akatotoa atu a Iehova ki tetai numero kotingaia o teia aronga, e anana iti, i te akaperepere aroa ua kia taokotaiia atu ma tana Tamaiti i te Patireia o te rangi, ma te manako anga kia rave i ta te Atua akakoro anga mua no te enua. (Luka 12:32) Kua raveia mai teia aronga “no roto i te au kopu ravarai, e te au reo katoa, e te au iti-tangata katoa, e te pa enua katoa . . . ei ui ariki e ei kau taunga na to matou Atua: e e riro ia matou te au i teianei ao.” (Apokalupo 5:9, 10) Kua tata te apotetoro ko Paulo, ki teia aronga: “Ko te vaerua akatamariki ra tei rauka ia kotou, i karangaʼi oki tatou e, E aba, e taku Metua. Ko te Vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua: E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia.” (Roma 8:15-17) I te akatamariki angaia e te Atua ra, kua orongaia kia ratou te pirianga akaperepereia tei ngaro ra ia Adamu; inara ki teia au tamariki ka orongaia etai atu au angaanga tavini anga i te rangi ra—tetai apinga kare ra ia Adamu. No reira rai te apotetoro ko Ioane i tuatuaʼi: “Ka akara na i te tu o to te Metua aroa ia tatou nei, ko tatou i tapaia mai e e tamariki na te Atua”! (1 Ioane 3:1) Ki taua aronga ra kua akakite te Atua kare i te aroa taeake (a·gaʹpe) anake mari katoa ra ko te inangaro maru (phi·liʹa), ko te tu ia o te tatua te vaira i rotopu i te au oa tikaʼi.—Ioane 16:27.
17. (a) Ki te katoatoa tei akono ra i te akarongo i te oko, eaa te mea orongaia atura kia ratou? (e) Eaa ra te aite anga no ratou i “te rauka anga te rangatira o te tamariki a te Atua ra”?
17 Kia etai ke oki—pouroa te aronga te akono ra i te akarongo i ta te Atua apinga oronga maoraoraia maira no te oraanga na roto ia Iesu Karaiti—te akatuera maira Iehova i te tika kia rauka te pirianga oko maata tei ngaro ra ia Adamu. Kua akataka maira te apotetoro ko Paulo: “Te anoano maata o te au mea angaia nei ma te arōrō [koia te au tangata angaia mai ia Adamu ra], te tatari nei ïa i te akakite angaia mai i te tamariki a te Atua [koia oki, te tatari nei ratou i te tuatau e riro ei kia taka meitaki e ko te tamariki a te Atua tei akatuangaia ra ma Karaiti i te Patireia o te rangi te akono ra i te raveanga angaanga papu no te au tangata nei]. Kua akariroia oki te au mea angaia nei ei puapinga kore ua [kua anauia mai ratou i roto i te ara ma te manakonako no te mate, e kare e mataara e raukaʼi ia ratou kia tatara ia ratou uaorai], kare ra i te mea anoano, nana ra, na tei akariro ra; Ma te tatarianga [tei orongaia mai e te Atua] e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.” (Roma 8:19-21) Eaa te aite anga o taua tu rangatira ra? E kua tataraia mai ratou mei te tapeka anga ki te ara e te mate. Ka rauka ia ratou te tu apa kore ua te manako e te kopapa, ko Parataito to ratou kainga, e te oraanga mutu kore ei rekareka anga i to ratou tu apa kore ua e kia akakite i to ratou ariki anga kia Iehova, koia te Atua mou ra. E ka akapeea e raukaʼi teia au mea katoa? Na roto mai i te atinga oko o te Tamaiti anau tai a te Atua ra.
18. Ia Mati 23 i muri ake i te opunga te ra, eaa ta tatou ka rave, e no teaa ra?
18 Ia Nisana 14, 33 T.N., i roto i tetai pia o runga i Ierusalema ra kua akonoia e Iesu te Akamaara Anga i tona matenga. Kua riro te akamaara anga mataiti i tona matenga ei tetai tupu anga puapinga maata i te oraanga o te au Kerititiano mou ravarai. Na Iesu uaorai i akaue: “E akapera kotou ei manako anga iaku.” (Luka 22:19) Ia 1997 ka akonoia te Akamaara Anga i muri ake i te opunga ra ia Mati 23 (koia te akamata anga o Nisana 14). I taua ra ra, kare atu e apinga i maata atu te puapinga i to te aere anga ki teia atianga Akamaara Anga.
Akapeea Koe me Pau?
◻ I teea au mataara ta te Atua akaari anga i te aroa maata no te tangata nei?
◻ Eaa ra i umuumuiaʼi tetai oraanga apa kore ua ei oko no ta Adamu anaunga ra?
◻ Eaa te tutaki maata ta Iehova i rave no te oronga anga i te oko?
◻ Eaa ta te oko i rave kia rauka mai?
[Tutu i te kapi 10]
Kua oronga mai te Atua i tana Tamaiti anau tai