E Oko Maata Koe i Roto i Nga Mata o te Atua!

“Kua inangaroia oki koe e au i te inangaro mutu kore ra; i akatae mai ei au ia koe i te aroa takinga-meitaki.”​—IEREMIA 31:3.

1. Akapeea te tuke o to Iesu tu akono i te aronga tangata noa ua o tona tuatau mei ta te au Pharisea ra?

KUA kite ratou i te reira i roto i tona nga mata. Kare teia tangata, ko Iesu, i aite atu ki to ratou au arataki akonoanga; kua utuutu atu aia. Kua aroa atura aia i te reira au tangata no te mea “kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Kua manako uaia to ratou au arataki akonoanga ei au tiaki aroa na tetai Atua aroa, ma te aroa ua. Kareka ra, kua akara akavaavaa ratou i te au tangata noa ua ra ei aronga oripu ua​—e kua taumaaia!a (Ioane 7:47-49; akaaite ia Ezekiela 34:4.) Te taka meitaki ra, ko taua manako mingi ra, e te tau kore i te tuatua tapu e tuke roa ia mei to Iehova manako no tona au tangata ra. Kua akakite atu aia ki tona iti tangata, o Iseraela: “Kua inangaroia oki koe e au i te inangaro mutu kore ra.”​—Ieremia 31:3.

2. Akapeea nga oa e toru o Iobu i te tauta anga kia akatika aia e e puapinga kore aia i roto i nga mata o te Atua ra?

² Inara, kare ko te au Pharisea te aronga mua i tauta ana kia akatika te aronga mamoe akaperepereia a Iehova e e puapinga kore ratou. E akamanako ana i te akatauanga o Iobu. I to Iehova manako e tuatua tika aia e te tiama, inara kua manako nga tangata “akapumaana” e toru ra e ko tetai tangata rave tau kore a Iobu, e patoi kino i te akonoanga tika, te ka mate atu ma te kore e vai mai tetai apinga no tona oraanga. Kua taiku mai ratou e kare te Atua e manako puapinga mai i tetai ua atu tu tuatua tika no to Iobu tuanga, i te mea kare te Atua i irinaki i tana uaorai au angera e kua manako e kua viivii te rangi uaorai!​—Iobu 1:8; 4:18; 15:15, 16; 18:17-19; 22:3.

3. Eaa te au apinga ta Satani e taangaanga nei i teia tuatau ei timata kia akatika te au tangata e e puapinga kore ratou e te inangaro koreia?

³ I teia tuatau, te rave nei a Satani i teia ‘ravenga kikite’ i te tautaanga kia akatika te au tangata e kare ratou e inangaroia e e puapinga kore ua oki. (Ephesia 6:11, NW, tataanga i raro ake) E tika, e putuputu aia i te akavare i te au tangata na te tamanakoanga i to ratou tu akameamea ua e te akaparau. (2 Korinetia 11:3) Inara te mareka katoa ra aia i te akavianga i te akangateitei anga ia ratou uaorai te aronga rauka ua ra te o i te tumatetenga. Te maata nei teia i teia tuatau kino o “te openga nei.” E manganui te tupu akera i teia tuatau i roto i te au ngutuare kare ra e “aroa ngakau”; e manganui te akono ra i te au ra tataki tai ma te aronga riririri, noinoi, e te marokiakia. (2 Timoteo 3:1-5, akaaite ia NW.) E au mataiti ua atu te takinga kino anga, te manako iriiri iti tangata, te makitakita, me kare te akono tau kore tei akapapu atu i taua aronga ra e e puapinga kore ua e te aroa koreia mai ratou. Kua tata tetai tangata e: “Kare oku aroa no etai ke ra, e kare oki e aroaia mai e ratou. Te kite nei au i te tu ngata kia irinaki e te manako mai ra te Atua i tetai apinga noku nei.”

4, 5. (a) Eaa ra te manako e e puapinga kore ua tetai peretana i tau kore ei ki te au Tuatua Tapu ra? (e) Eaa ra tetai tupuanga kino no to tatou irinakianga e kare e puapinga o etai ua atu tauta anga na tatou?

⁴ Te ko ra te manako puapinga kore ua no tetai i te ngakau o te tuatua mou o te Tuatua a te Atua, koia te apiianga no te atinga oko. (Ioane 3:16) Me ka tutaki te Atua i tetai tutaki teitei​—i te oraanga oko maata o tana uaorai Tamaiti—​ei oko i te tika no tatou kia ora e tuatau ua atu, e mea tika e aroa Tona ia tatou; e tika e puapinga to tatou i roto i Tona nga mata!

⁵ Pera katoa, mei teaa ra te akamaroiroi kore no te reira kia manako e e mareka koreanga tatou ki te Atua, e kare tetai ua atu tauta anga na tatou e riro ei puapinga! (Akaaite ia Maseli 24:10.) I roto i teia manako e puapinga kore ua, noatu te akamaroiroi anga tau, tei akapapaia ei tauturu ia tatou kia akatere atu i ta tatou tavini i te Atua i te ngai ka rauka, penei ka riro te tu ki tetai papaki mei te mea rai e akaapa anga ia. Penei ka akariro te reira i te akara anga e te akaoki maira i te reo o to tatou uaorai irinaki anga e noatu eaa ta tatou ka rave kare ia e rava.

6. Eaa te vairakau meitaki ei rapakau i te au manako akamaroiroi kore no tatou uaorai?

⁶ Me ka kite tatou i taua au manako tau kore ra i roto ia tatou uaorai, auraka e manakonako kore. E manganui i o tatou nei te manako tau kore ra ia tatou uaorai i etai au taime. Kia maara e, kua akapapaia te Tuatua a te Atua no te “akakiteanga apa” e no te “uri anga i te au punanga ketaketa ki raro.” (2 Timoteo 3:16; 2 Korinetia 10:4) Kua tata te apotetoro ko Ioane e: “Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia. Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.” (1 Ioane 3:19, 20) E akamanako tatou, i reira, e toru mataara ta te Puka Tapu e apii maira ia tatou e e oko maata tatou kia Iehova.

Te Manako ra Iehova e Meitaki Maata Koe

7. Akapeea ta Iesu apii anga i te au Kerititiano ravarai no to ratou meitaki maata i roto i nga mata o te Atua ra?

⁷ Te mea mua, te apii tika maira te Puka Tapu e e maata to tatou tataki tai meitaki i roto i nga mata o te Atua ra. Kua karanga a Iesu: “Kare aina taki rima manu rikiriki i okoia i nga asario e rua nei? e kare rai tetai i ngaro i te Atua. E kua ope oki te rauru o to kotou mimiti na i te tatauia. Auraka mari kotou e mataku: e maata to kotou meitaki i to te au manu rikiriki e ­manganui.” (Luka 12:6, 7) I taua tuatau ra, ko te manu rikiriki te mea oko mama katoa ia o te au manu tei okoia ra ei kai, inara kare tetai o ratou i ngaro i Tei Anga maira iaia. No reira kua akanooia mai te akatumu anga no tetai tuke anga umere: Me ka manakoia te au tangata nei​—tei maata rava atu ra, e e maata rava atu to ratou meitaki—​kua kite te Atua i te au tu ravarai. Mei te mea rai e kua oti te tatau tataki taiia te au rauru o to tatou mimiti!

8. Eaa ra i tikai kia manako e ka rauka ia Iehova i te tatau i te au rauru o to tatou au upoko?

⁸ Tatauia te rauru? Me te manako ekoko ra koe i teia tu no ta Iesu akatutu anga ei tika kore, e akamanako ana: Te maara takiri ra te Atua i tona au tavini tiratiratu e ka rauka iaia i te akatuakaou mai ia ratou​—ma te anga akaouanga ia ratou i te au tu ravarai, e kapiti katoa to ratou au tuanga akamata anga mai e te au maaraanga e te au kite o to ratou au mataiti ravarai. Ko te tatauanga i to tatou au rauru (e vaitata ra i te 100,000 te katoa ei mea matauia) ka riro ia ei mea ngoie ua te akaaiteite anga!​—Luka 20:37, 38.

Eaa ta Iehova e Kite nei ia Tatou?

9. (a) Eaa etai au tu ta Iehova e manako meitaki maira? (e) Eaa ra koe i manako ei e oko maata te reira au tu kiaia?

⁹ Te rua, te apii maira te Puka Tapu ia tatou i ta Iehova apinga meitaki ia tatou nei. Ei akataka anga mama ua, te mareka ra aia i to tatou au tu papu e ta tatou au tauta anga. Kua tuatua te Ariki ko Davida ki tana tamaiti kia Solomona: “E kimi oki a Iehova i te ngakau katoa ra, e te kite ra aia i te akakoroanga o te au manako katoa.” (1 Paraleipomeno 28:9) I ta te Atua ra kimikimi anga i te au ngakau tangata e pirioni ua atu i roto i teianei ao ta ua, e te ki i te makitakita, mei teaa ra tona mareka anga me kiteia e ia tetai ngakau te inangaro ra i te au, te tuatua mou, e te tuatua tika! (Akaaite ia Ioane 1:47; 1 Petero 3:4.) Eaa te ka tupu me kitea e te Atua tetai ngakau tei akamaata ra ma te inangaro nona, tei kimi ra kia kite iaia e kia tua i taua kite ra ki etai atu ra? Ia Malaki 3:16, te akakite maira Iehova e te akarongo ra aia i te aronga tei tuatua ra nona ma etai atu e kua tata “i tetai buka manakoanga” no “te aronga e mataku ia Iehova, e tei manako i tona ra ingoa.” E oko maata te reira au tu ki aia!

10, 11. (a) Penei eaa tetai papaki ka kore ei e akatika e ka manako meitaki mai a Iehova i to ratou au tu meitaki ra? (e) Akapeea te akatauanga a Abiia i te akaari mai anga e te manako meitaki maira a Iehova i te au tu memeitaki ravarai?

¹⁰ Inara, ko te ngakau akaapa iaia uaorai, penei ka kopae i taua akakite anga papu ra i to tatou uaorai meitaki maata i roto i nga mata o te Atua ra. Penei ka koumuumu tamou mai te reira, ‘Inara e manganui etai ke atu e maata atu te meitaki i taua au tu ra i toku nei. Mei teaa ra te reka kore o Iehova me akaaite atu iaku kia ratou ra!’ Kare ra a Iehova e akaaite ana, kare katoa aia i tei manako ketaketa, e ei te katoa me kore kare ua. (Galatia 6:4) Ma te tu karape maata tana tatau anga i te au ngakau, e te akameitaki maata ra aia i te au tu meitaki ravarai.

¹¹ Ei akatauanga, i ta Iehova ra akaue anga kia akapouia, e kia takoreia atu te au uanga katoatoa o te kopu akarongo kore o te Ariki ko Ieroboama mei te “teita” rai, kua ikuiku Aia e okotai ua o te au tamaroa a te ariki ra, koia a Abiia, ka tika tetai tanumanga tau nona. No teaa ra? “Te vai ra tetai mea meitaki i roto iaia i te Atua o Iseraela ia Iehova.” (1 Ariki 14:10, 13) Ko te aite anga ainei o teia e e tangata akamori tiratiratu ia Iehova a Abiia? Kare i te tika, no te mea kua mate aia mei tona ngutuare rave kino ra. (Deuteronomi 24:16) Inara, kua manako akameitaki a Iehova i “tetai mea meitaki” tana i kite i roto i te ngakau o Abiia e kua rave aia kia tau ki te reira. Kua tata te puka Mat­thew Henry’s Commentary on the Whole Bible: “Me te vaira tetai apinga meitaki o taua tu ra, ka kitea ia: ko te Atua te kimi ra i te reira, ka kite i te reira, noatu rai e meangiti ua, e te mareka ra i te reira.” Auraka e ngaropoina e me ka kitea e te Atua noatu ko tetai tuanga meangiti o tetai tu meitaki i roto ia koe, ka rauka iaia i te akatupu i te reira me ka tauta koe i te tavini tiratiratu iaia.

12, 13. (a) Akapeea ta Salamo 139:3 akaari mai e te manako meitaki ra a Iehova i ta tatou au tauta anga? (e) Na roto i teea tu e tuatuaiaʼi e te akataka ra a Iehova i ta tatou au angaanga?

¹² Te manako meitaki maira Iehova i ta tatou au tauta anga na roto i tetai tu aiteite ki te reira. Ia Salamo 139:1-3, ka tatau tatou: “E Iehova, kua unuunumouia au e koe, e kua kitea oki au. Kua kite koe i toku noo anga ki raro, e toku tu anga ki runga; kua kite koe i toku nei manako i te atea ke. Kua unuunumou tikai koe i toku aerenga e toku moe anga ki raro, e kua kite koe i toku au aerenga katoa nei.” No reira kua kite a Iehova i ta tatou au angaanga katoatoa. Inara e maata tona i te kite ua. I te reo Epera ko te takiota tuatua e “kua kite koe i toku au aerenga katoa nei” penei ka apai katoa i te aiteanga e “kua akaputu koe i toku au aerenga katoa nei” me kare “kua akaperepere koe i toku au aerenga katoa nei.” (Akaaite ia Mataio 6:19, 20.) Inara, akapeea e tau ei kia akaperepere a Iehova i to tatou au aerenga i te mea e apa ua tatou e te ki i te ara?

¹³ E mea tau kia tamanakoia, kia tau i etai aronga apii, i ta Davida tata anga e “kua unuunumou” a Iehova i tona au aerenga e tona au tuatau akaangaroi anga, te aite anga tikai o te reo Epera kia “akatakake” me kare e “tama.” Ko tetai angaanga taikuia ra: “Tona aite anga . . . kia tama i te ota katoa, e kia akaruke mai i te titona anake​—kia akatakake i te au apinga puapinga anake kia toe mai. No reira i konei ko tona aite anga mei te mea rai, kua akatakake te Atua iaia. . . . Kua akapueurikiriki ke atu aia i te ota katoa, me kare te au apinga puapinga kore katoatoa, e kua kite eaa te vaira ei apinga meitaki tikai.” Penei ka akatakake te ngakau akaapa ia tatou uaorai i ta tatou au raveanga na te mataara tuke, na te akaapaanga ia tatou ma te aroa kore no ta tatou au apa kua topa e te akakoreanga i ta tatou au angaanga meitaki ei kore ua. Inara te akakore ra a Iehova i ta tatou ara me ka tataraara tatou ma te ngakau tae e ka tauta pakari ei kia kore e rave akaou i ta tatou au tarevake. (Salamo 103:10-14; Angaanga 3:19) Ka akataka aia e ka maara oki i ta tatou au angaanga memeitaki. Ko te tika, ka maara aia i te reira e tuatau ua atu me ka vai tamou marie to tatou tiratiratu ki aia. Ka manako aia i te reira ei tuatua tika kore kia akangaropoina i te reira au tu, e kare rava aia i te tuatua tika kore!​—Ebera 6:10.

14. Eaa te akaari maira e te manako meitaki maira a Iehova i ta tatou angaanga orometua Kerititiano?

¹⁴ Eaa etai au angaanga meitaki ta te Atua e manako ra e meitaki ia? Ko te au apinga ravarai ta tatou e rave i te aru anga i tana Tamaiti, ia Iesu Karaiti. (1 Petero 2:21) E mea papu e ko tetai angaanga puapinga maata rava, i reira, ko te tua anga i te tuatua meitaki o te Patireia o te Atua. Ia Roma 10:15, ka tatau tatou: “Ko te manea o te vaevae o te aronga i apai mai i te tuatua reka o te au, ko te apai mai i te evangelia o te meitaki ra e!” Noatu rai penei kare tatou e manako ana i to tatou nga vaevae akaaka ua nei ei apinga “manea,” ko te tuatua ta Paulo i taiku i konei ko te tuatua ia i te urianga Septuagint Ereni ei akataka ia Rebeka, ia Rahela, e ia Iosepha​—ko ratou tokotoru katoa kua manakoia no to ratou manea. (Genese 26:7; 29:17; 39:6) No reira ko to tatou aaereanga i te angaanga a to tatou Atua, ko Iehova, e manea maata ia e te oko maata i roto i tona nga mata.​—Mataio 24:14; 28:19, 20.

15, 16. Eaa a Iehova i manako meitaki maata mai ei i to tatou akakoromaki marie anga, e i akapeea te au tuatua a te Ariki ko Davida ia Salamo 56:8 i te akaketaketa mai anga i te reira tika?

¹⁵ Ko tetai atu tu te manako meitakiia maira e te Atua ko to tatou akakoromaki marie ia. (Mataio 24:13) Kia maara, te anoano ra a Satani kia uri atu koe i toou mokotua kia Iehova. Te au ra tataki tai katoa i vai tiratiratu ana koe kia Iehova ko tetai atu ra ia i tauturu ana koe i te oronga atu i tetai pauanga patoi atu ki te au akakino mai a Satani. (Maseli 27:11) I etai taime kare te akakoromaki marie i te apinga ngoie ua. Te maki kopapa, te manamanata i te moni, te taomi anga te manako ngakau, e etai atu au tu taitaia te ka akariro i te au ra tataki tai ei timataanga. Ko te akakoromaki marieanga i te aro atu i taua au timataanga ra e apinga oko maata katoa ia kia Iehova. No reira te Ariki ko Davida i pati ei kia Iehova kia tuku i tona roi mata ki roto i tetai “āriki pakiri manu,” ma te uianga papu e, “Kare ainei i roto i taau ra tuatua?” (Salamo 56:8, akaaite ia NW.) Ae, te tuku ra a Iehova ki roto i te vairanga e te maara ra i te au roi mata e te mamaeanga katoa ta tatou i akakoromaki marie i te tamouanga i to tatou tiratiratu kiaia. E apinga oko maata raua i roto i tona nga mata.

¹⁶ I te manako anga i to tatou au tu meitaki atu e ta tatou au tauta anga, mei teaa ra te taka meitaki e te kite ra a Iehova e maata te meitaki i roto ia tatou tataki tai! Noatu rai i akapeea te akono a te ao o Satani ia tatou nei, te manako maira a Iehova ia tatou ei au apinga oko maata e ei tuanga no “tei inangaroia e te au enua katoa ra.”​—Hagai 2:7.

Ta Iehova i Rave ei Akakite i Tona Aroa

17. Eaa ra i tau ei te atinga oko o Karaiti kia akariro ia tatou kia akatika e te aroa ra a Iehova raua ko Iesu ia tatou tataki tai?

¹⁷ Te toru, e maata ta Iehova e rave ana ei akakite i tona aroa no tatou. E tika rava, ko te atinga oko o Karaiti te pauanga ririnui rava atu i te pikikaa a Satani e e puapinga kore tatou me kare e aroa kore. Auraka rava e ngaropoina ia tatou e ko te mate kino tei mamaeia e Iesu ki runga i te rakau tamamae e te mamae maata rava oki ta Iehova i akakoromaki marie i tona akaraanga i te matenga o tana Tamaiti akaperepere e akapapu anga anake i to raua aroa no tatou. Pera katoa oki, te piri maira taua aroa ra kia tatou tataki tai. Ko ta te apotetoro ko Paulo ia akara anga i te reira, no te mea kua tata aia: “Te Tamaiti a te Atua . . . tei aroa mai iaku, e kua oronga mai iaia uaorai noku.”​—Galatia 2:20.

18. Na teea tu ta Iehova ra akatae anga ia tatou kia Karaiti?

¹⁸ Kua akakite papu mai a Iehova i tona aroa no tatou na te tauturuanga ia tatou tataki tai kia akono i te au puapinga no te atinga o Karaiti. Kua tuatua a Iesu ia Ioane 6:44 e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” Na te angaanga tutuanga, te itae maira kia tatou tataki tai, e na tona vaerua tapu, ta Iehova e taangaanga ra ei tauturu ia tatou kia kite e kia akono i te au tuatua mou noatu rai to tatou kotinga anga e te au tu apa ua, te akatae ra a Iehova uaorai ia tatou ki tana Tamaiti e ki te manakonako anga no te ora mutu kore. No reira ka rauka ia Iehova i te tuatua kia tatou mei tana i tuatua no to Iseraela ra e: “Kua inangaroia oki koe e au i te inangaro mutu kore ra; i akatae mai ei au ia koe i te aroa takinga-meitaki.”​—Ieremia 31:3.

19. Eaa i tau ei te tika no te pure kia akariro ia tatou kia akatika i to Iehova uaorai aroa no tatou?

¹⁹ Inara, penei na roto i te rave pure, i kite ei tatou i te aroa o Iehova i roto i te tu piri vaitata roa. Te pati maira aia ia tatou tataki tai e “auraka e tukutuku i te pure” kiaia. (1 Tesalonia 5:17) Te akarongo maira aia! Kua tapaia oki aia e ko “tei akarongo i te pure ra.” (Salamo 65:2) Kare aia i oronga i teia taoonga ki tetai ua atu peretana, kare noatu ki tana uaorai Tamaiti. E tamanako ana: te raurau maira Tei Anga i te ao katoa e pini ua ake ia tatou kia akavaitata atu kiaia ma te pure, ma te tuatua anga mataku kore. Penei ka akakeu taau au patianga ia Iehova kia rave i te apinga penei kare aia e rave ua.​—Ebera 4:16; Iakobo 5:16; akara ia Isaia 38:1-16.

20. Eaa ra te aroa o te Atua no tatou i kore ei e tau ei kotoe anga no tatou kia manako e puapinga maata tatou uaorai me kare kia manako taemoemo no ta tatou tuanga?

²⁰ Kare te Kerititiano tau tona tu akono e manako i te aroa e te manako meitakiia mai e te Atua ra ei kotoe anga kia akara iaia uaorai e e maata atu tona puapinga i tona tu tikai. Kua tata a Paulo: “Teia taku tuatua kia kotou katoatoa e ope rava ake, i te meitaki i orongaia mai kiaku nei, eiaa e maata te manako iaia uaorai, i tei tau iaia kia manako ra; ka akono tikai ra te manako kia arite i te tu o te akarongo i tuaia e te Atua i te tangata katoatoa.” (Roma 12:3) No reira ia tatou e akamaanaana ra i roto i te pumaana o te aroa o to tatou Metua i te rangi ra, kia tau meitaki to tatou manako e kia maara e ko te aroa takinga meitaki o te Atua ra e mea oronga uaia mai ia.​—Akaaite ia Luka 17:10.

21. Eaa te pikikaa a Satani te ka tau tatou kia arai tamou marie, e eaa te tuatua mou tu Atua ka tau tatou kia tamanako?

²¹ E rave tatou tataki tai i te au mea ravarai te ka rauka ia tatou kia arai atu i te au manako ta Satani e akatupu maira i roto i teianei ao taito te mate atura. Te kapiti katoa ra te reira i te kopaeanga i te manako e e puapinga kore tatou me kore kare e aroaia mai. Me kua apii mai te oraanga i roto i teia akatereanga nei ia koe kia kite ia koe uaorai ei tetai arai anga e maata te akameangiti mai i te maroiroi kia kore e rauka i te aroa maata o te Atua i te na rungao, me kare e meangiti roa taau au angaanga noatu no tona nga mata kite meitaki kia kore e kite mai, me kare e maata rava taau ara kia kore e rauka i te matenga o tana Tamaiti oko maata i te tapoki, kua apiiia mai koe i tetai pikikaa. E kopae ke i taua au pikikaa ra ma te tu tau kore katoa te tika ra no ratou! E tamou ua rai tatou ki roto i te manako i te au tuatua akauruia a te apotetoro ko Paulo ia Roma 8:38, 39: “Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.”

[Au Tataanga Rikiriki i Raro]

Eaa Toou Manako?

◻ Eaa ra a Satani i tautaʼi kia akatika tatou e e puapinga kore ua tatou e te inangaro koreia?

◻ Akapeea ta Iesu apii mai e te manako meitaki maira a Iehova ia tatou tataki tai?

◻ Akapeea tatou i kite ei e te manako meitaki maata maira a Iehova i to tatou au tu memeitaki?

◻ Akapeea e papu ei ia tatou e te akaperepere maira a Iehova i ta tatou au tauta anga?

◻ Akapeea ta Iehova akapapu anga i tona aroa no tatou ei aronga tataki tai?

[Tutu i te kapi 13]

Te kite maira Iehova e te maaraara maira i te aronga katoatoa tei manako i tona ra ingoa