Akapeea Tatou me Akono Noinoi Kore i to te Atua Aroa?
“I pera te Atua i te aroa anga mai ia tatou nei, kia aroa katoa tatou ia tatou uaorai e tikaʼi.”—1 IOANE 4:11.
1, 2. Eaa te umuumuia ra no tatou kia akono noinoi kore i te akakite anga i to te Atua aroa?
KO IEHOVA te akara anga tika tikai o te aroa. E tika, i te tumu tuatua i mua akenei, kua kite tatou i te maata o te au akakitekite anga i tona aroa. Kua akara katoa tatou i akapeea a Mose, Davida, e Iesu Mesia i te akono anga noinoi kore i taua au akakite anga aroa ra. Kare ainei e tau te au Kite tatakitai o Iehova kia inangaro i te rave mei te reira rai? E mea tika ia!
2 Eaa te umuumuia ra no tatou kia akono noinoi kore i te akakite anga i to te Atua ra aroa? Okotai apinga te ka tau tatou kia oronga kiaia i te tuanga mua o to tatou oraanga, e inangaro tatou iaia ma to tatou ngakau katoa, te meta katoa, te manako katoa, e te ririnui katoa oki. (Mareko 12:29, 30) Tera te aite anga, kia kite meitaki i te Atua, kia noo ma te pirianga maanaana ma Iehova katoa ra. Te anoano ra ainei tatou kia tuatua ki to tatou Metua i te rangi ra na roto i te pure? Te rave ra ainei tatou i te pureanga kia tamou marie tikai ma te kore e tukutuku i te pure? Me kare te rave viviki ra ainei tatou i te pure, e i etai tuatau e maata roa te manamanata no te rave i te pure? (Roma 12:12; 1 Tesalonia 5:17) Te taki atura ainei tatou i te manako kia Iehova, ma te orongaanga i te akameitaki anga kiaia i tana akaaerenga no te angaanga tei oti ia tatou? (1 Korinetia 3:7; 4:7) Te manako ra ainei tatou mei te tata salamo ra? Tana i tuatua no te Atua e: “Taki itu aku akameitaki anga ia koe i te rā okotai.”—Salamo 119:164.
3. Kia akaputuputu tatou no tetai tuatau tamataora anga, akapeea te akakite mai anga me te akono noinoi kore ra tatou i to te Atua aroa?
3 Te akono ra ainei tatou i to te Atua ra aroa ma te noinoi kore me kare ua ainei ka kitea puia te reira kia akaputuputu tatou no tetai tuatau tamataora anga. Te aere ra ainei ta tatou tuatua anga takapini i te au apinga kopapa ua nei kare i te au apinga i te pae vaerua? Kare mei te mea e ka anoanoia tatou kia apii tikai i te Puka Tapu i te au tuatau ravarai e akaputuputu ei ma to tatou au taeake Kerititiano. E mea papu rai e ka kitea e tatou etai apinga meitaki no te pae vaerua kia tauruia ki roto i ta tatou ka tuatua. Akapeea me akakitekite i tei tupu i te tutu aere anga, te uriuri manako anga i ta tatou irava reka ra, akakite anga e i akapeea tatou i kite ei i te tuatua mou, me kare te taiku anga i te akapapu anga i ta te Atua ra utuutu anga aroa e te akameitakianga?
4. Eaa te manako tau no tatou me te reka kore ra tatou no runga i tetai taoonga angaanga?
4 Ko tetai atu turanga te ka akakite i te maata i to tatou manako ariki i to te Atua ra aroa, me ka kore tatou e akamanakoia mai no tetai angaanga i roto i ta Iehova akaaerenga. Akapeea to tatou manako? Me ko te akangateiteianga ia Iehova to tatou manako maata, ka akatika tatou e penei ka akangateiteiia te Atua noatu e koai te ka akataoongaia no te angaanga. (Akaaiteia atu kia Luka 9:48) Inara me te manako ua ra tatou i to tatou uaorai meitaki me kare ingoa, ka manamanata ia tatou no tei kore i manakoia mai, mei ta tatou i manako ra. Ka tau tatou kia maara e te aroa maira a Iehova ia tatou e penei te kite ra aia e kare e rauka ia tatou te apai i te tuanga no tetai apainga no ko mai i te Atua ra. Penei te akameitaki maira aia ia tatou na etai mataara ke atu, e na te reira akakite anga i tona aroa e tauturu ia tatou kia tamou i to tatou turanga tau i te pae vaerua.—Maseli 10:22.
Inangaroanga i te Tuatua Tika e te Makitakitaanga i te Kino
5. Eaa te tupu anga tau i to tatou tu akono no te au akakitekite anga mai i to te Atua aroa?
5 Na te au akakitekite anga mai i to te Atua ra aroa kia tatou e akakeu ia tatou kia aru i te Mesia i te inangaroanga i te tuatua tika e te makitakitaanga i te kino. (Ebera 1:9) E tika, kare e rauka ia tatou i te rave i teia kia kore e apa, mei ta Iesu i rave ra. Inara, ka rauka ia tatou te akakoro kia tapu tatou, e kia tiratiratu, e kia mou i te ture i te ngai e rauka ia tatou i to tatou tu tau kore nei. E raukai i te rave i teia, ka tau tatou kare kia akatupu anake ua i te aroa no te tuatua tika e te au mea memeitaki mari katoa ra kia tatanu i te makitakita, te reka kore, e rikarika, i te rave i te kino ra. Mei ta te apotetoro ko Paulo i akataka maira: “Kia rikarika i te kino; kia kapiti atu ki te meitaki.” (Roma 12:9) Ko te “rikarika” e tuatua ketaketa roa ia, tona aiteanga “kia manakoia ma te reka kore kino roa.”—Webster’s New Collegiate Dictionary.
6. Eaa te ka tauturu ei paruru no tatou i te au timataanga ta teianei ao ka tuku ki mua ia tatou, ta to tatou kopapa ara nei, e pera katoa ta te Tiaporo?
6 Eaa te ka tauturu i te paruru ia tatou i te au timataanga te ka veroia mai ki mua ia tatou e to teianei ao, to tatou uaorai kopapa ara nei, e pera katoa te Tiaporo ra? Ko te tiratiratu ki te Atua kia Iehova. Te tuatua maira aia kia tatou: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Maseli 27:11) Ae, ka akakeu te tiratiratu kia Iehova kia aere tatou na te mataara pakari o te makitakitaanga i tana e makitakita ra. Pera katoa, noatu peea te mareka anga me kare te navenaveanga i te aatianga i tetai o ta te Atua au ture ra, ka tau tatou kia akakite kia tatou uaorai e kare ia i te mea puapinga. (Galatia 6:7, 8) E pikikaa te ngakau tangata nei, e akavare, e te tau kore, mei tei akamaaraia maira kia tatou ia Ieremia 17:9. Te rekareka ra te ngakau Kerititiano i te au mea meitaki, manea, viivii kore katoa oki. Inara i etai tuatau ka akaariu ke te au manako apa ki te inangaro katoa i te kino. Mei te ngakau o to Iseraela tei akamori ra ia Iehova mari ra kua mou i ta ratou “au ngai teitei” no te itoro, no reira penei ka noinoi to tatou uaorai ngakau e ka kikite ua. (1 Ariki 22:43; Deuteronomi 12:2) Penei ka tauta to tatou ngakau apa ua nei i te kimi te kotoeanga kia tuku ia tatou ki roto i te timataanga. Penei ka tamata i te akameangiti mai i te kino o te tarevake tei timataia maira tatou. Penei ka tauta to tatou ngakau i te akariro kia irinaki tatou e ko te akautunga i tukua mai e mea poto ua ia.
7. Eaa i tikai kia paruru atu tatou i te au inangaro no te rave kino?
7 No te manako ariki i to te Atua ra aroa, ka tau tatou kia paruru atu i te anoano i te kino, mei te inangaro atu i te akaturi ra, noatu me e takaua tatou me kare kua akaipoipoia. E putuputu, e ko tei akamataia ei aere anga kapiti ua kua akaopeia i nga Kerititiano e rua i te riroanga kia o ki te manako ngakau no raua uaorai e kua rave raua i te ara e kua akaateaia i te putuputuanga. Noatu ko te aronga pakari, tei tau ra ratou ei akaraanga apa kore ki te anana, kua o katoa ki te tu mii i teia au tu!—Akaaiteia atu kia 1 Ariki 15:4, 5.
8. Eaa te akaraanga no te akamatakiteanga ta te apotetoro ko Paulo e oronga maira no tatou, e akapeea te akatutu anga mai i te reira manamanata?
8 E akamanako ana i te apotetoro ia Paulo, kua akameitakiia aia e te Atua ma te au orama, te au mana, e ma te apinga tei orongaia mai e te akauru angaia. Kia autu ei aia i te maroanga i te kino ra, kua moto aia—ae, kua papa pakari—i tona kopapa. Te mareka ra ainei tatou uaorai i te raveanga kia mea ngiti mai i te reira? (Roma 7:15-25; 1 Korinetia 9:27) Mei te mea rai e tei roto tatou i tetai poti rikiriki i te kauvai te viviki i te taʼeanga e te aere atura ki te ngai topa anga te vai. Ei akakore i te tupu anga te tumatetenga, ka tau rai tatou kia rave maroiroi i te oe ki runga i taua kauvai ra. E i te akara anga penei kare e maata ana to tatou neke atu anga, inara na to tatou tauta marie anga ma te maroiroi, kare tatou e topa atu i taua vai rere ra e tae atu ei ki to tatou akapouanga. E mea tika rai, ka tau te au akakitekite anga i to te Atua ko Iehova ra aroa no tatou kia tauta marie tatou uaorai ma te akamaroiroi kia vai tiratiratu kiaia na te makitakitaanga i te kino e te inangaroanga i te tuatua tika.
E Akakite i te Aroa Taeake
9. Eaa te akoanga ta te apotetoro ko Ioane i oronga mai no te aroaanga i to tatou au taeake?
9 Ka tau katoa te akakitekite anga i to te Atua ra aroa kia akakeu ia tatou kia aroa atu i to tatou au taeake mei ia Iesu Mesia i aroa ra i tana au pipi. (Ioane 13:1) E tau tikai, ta te apotetoro ko Ioane i tuatua ra: “Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara. E aku au akaperepere e, i pera te Atua i te aroa anga mai ia tatou nei, kia aroa katoa tatou ia tatou uaorai e tikaʼi.” (1 Ioane 4:10, 11) Ko te tika, kua karanga a Iesu e ko te mataara no te akataka i tana au pipi mou ra, na to ratou aroa ia ratou uaorai.—Ioane 13:34, 35.
10, 11. Eaa etai au mataara no tatou e akakite ei i te aroa taeake?
10 Kua kite rai tatou e ka tau te au Kerititiano kia akaari i te aroa taeake. Inara kare i te tarevake kia akamaaraara ia tatou uaorai i te au tu tuke tuke e rave ei tatou i te akaari anga i teia aroa mei ta Iesu rai tetai ki tetai. Na te reira tu aroa e tauturu ia tatou kia akakore atu i te au tuke anga no te iti tangata, te enua tangata, te kite apii, te peu, e te tu o te pae puapinga oki. Pera katoa, ka akakeu te aroa taeake kia akaputu atu tatou ki te au uipaanga. Me e aroa mou to tatou no te au taeake, kare tatou e tuku i te kinokino o te reva me kare e manga apikepike ua o te kopapa kia akakore i to tatou rekareka no te akaputuanga ma ratou katoa e te akamaroiroi anga tetai i tetai. (Roma 1:11, 12) E maata atu oki i te reira, na te aroa taeake e akariro ia tatou kia akapapa meitaki no ta tatou au uipaanga e kia rave i tetai tuanga o te reira kia raukai ia tatou i te akamaroiroi atu tetai i tetai kia maata te aroa, e te angaanga memeitaki ra.—Ebera 10:23-25.
11 Akapeea te tauturuanga i to tatou au taeake i te angaanga tutu aere? Te kitea ra te aronga pakari e te au tavini tauturu orometua te putuputu ra i te rave i te tutu aere i tera are e tera are ko ratou rai e ko ratou tatakitai i te tuatau ka rauka ia ratou, ma te akanoonooanga meangiti ua, e pati i te aronga te tau ra kia tauturuia i te tutu aere i te Patireia kia aere kapiti atu ma ratou katoa. Na te akaarianga i te aroa i teia tu ka akariro i te angaanga tutu aere a te aronga pakari e te au tavini tauturu orometua kia tere atu te puapinga. E akapeea me arataki atu i te kite ou ki tetai apiianga Puka Tapu i te ngutuare?—Roma 15:1, 2.
12. Eaa ta tatou ka kite meitaki mei ia 1 Ioane 3:16-18?
12 Na te aroa katoa oki e akariro ia tatou kia tauturu atu i to tatou au taeake penei te ngere ra i te apinga no te kopapa nei. Kua tata te apotetoro ko Ioane e: “Ko te mea teia i kite ei tatou i te aroa, ko te Mesia i oronga i tona uaorai ora no tatou: e kia oronga katoa tatou i to tatou ora no te au taeake e tikaʼi. Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia? E aku au tamariki ra, auraka to tatou i te aroa vaa ua, e te aroa arero; ei aroa rave ra, ei mea mou.” (1 Ioane 3:16-18) Penei kare tatou e patiia kia oronga i to tatou uaorai ora no ratou, mari ra i etai tuatau te vaira to tatou tuatau no te akakite i te aroa no ratou na etai atu mataara, kare na te tuatua ua me kare na te arero ua mari ra ma te angaanga katoa. Kare i te tarevake te aroaanga i to tatou au taeake i te tuatua, inara auraka e kotingaia to tatou aroa ki te reira anake me te ngere ra ratou i te apinga no te kopapa. Ta Iesu tuatua e “e mea meitaki i te oronga atu i te rave mai” te kapiti katoa ra i te oronga anga i te apinga tauturu.—Angaanga 20:35.
13. (a) Eaa etai tumuanga no te tuatua mou tei kitea e tatou na te tauturu anga a te akaerenga akara mataia a Iehova ra? (e) Eaa tikai te tumu mou ta Charles Taze Russell i akakite mai?
13 Te vaira to tatou tuatau no te akaari i te aroa no to tatou au taeake te rave ra i te arataki anga i roto i te putuputuanga me kare i te akaaerenga akara mataia a Iehova i te ao katoa nei. Kapiti katoa te akono tiratiratu ki “te tavini akono meitaki e te pakari ra.” (Mataio 24:45-47) E aro atura tatou i te tika e noatu e maata ta tatou tatauanga Puka Tapu, kare roa e rauka ia tatou te kite i te tuatua mou na tatou uaorai i kite. Kare e kitea e tatou te tuatua mou no runga ia Iehova, tana au akakoroanga e tona au tu, te aiteanga e te puapinga o tona ra ingoa, te Patireia, to Iesu okoanga, e te tuke anga o to te Atua akaaerenga e ta Satani ra, e eaa te tumu i tuku uaʼi te Atua i te rave kino. Mei ta te peretiteni mua o te Watch Tower Society, koia Charles Taze Russell, i tata i te 1914 ra: “Kare ainei tatou i te au tangata tei akameitakiia, e te mataora? Kare ainei to tatou Atua i te pikikaa kore? Me te kite ra tetai tangata i tetai apinga meitaki atu, e mou aia i te reira. Me kite tetai i o kotou na i tetai apinga meitaki atu, te manakonako nei matou e ka akakite mai kotou kia matou. Kare matou i kite ake i tetai apinga meitaki atu kare i apa te meitaki i ta matou i kite i roto i te Tuatua a te Atua ra. . . . Kare e rauka i tetai arero me kare peni i te akakite i te au, te rekareka e te akameitakianga te rauka maira no te kite marama i te Atua mou ki roto i to tatou ngakau e te oraanga. Te Tua no to te Atua ra Pakari, te Tika, te Mana e te Aroa te akamerengo ra i te inangaro o to tatou upoko e te ngakau. Kare tatou e kimi i tetai atu ngai. Kare atu e apinga kia inangaroia i te pae atu i teianei Tua umere kia taka meitaki ki roto i to tatou manako.” (The Watch Tower, Titema 15, 1914, nga kapi 377-8) Mei teaa ra te tika i te reira au tuatua tei tata meitakiia ra!
Tutu Anga ki te Aronga i Vao
14. Eaa te mea tau na te au akakiteanga mai i to te Atua aroa kia akakeu ia tatou kia rave no te aronga o vao?
14 Ka tau te au akakite anga i to te Atua ra aroa ta tatou kua rekareka akenei kia akakeu ia tatou kia akaari i te aroa ki te au tangata tupu koia te aronga i vao i te putuputuanga ra. Akapeea tatou me rave i teia? Na te au tu e akakite e ka rauka ia tatou te tauturu i to tatou tangata tupu i te pae o te apinga. Inara, eaa te mea puapinga maata, ka rauka ia tatou te akaari i te aroa ki te tangata tupu na te apaianga kia etai atu i te tuatua meitaki o te Patireia o te Atua ra e te tauturuanga i te aronga tei inangaro i te tuatua tika kia riro ei pipi na Iesu Mesia. Te rave putuputu ra ainei koe i teia angaanga i te ngai tangata, me kare te akono kore ra ainei tatou i te reira? Kua riro ainei te reira ei ravenga ua me kare ei tutu angaanga ua? Te akakeu mouia ra ainei tatou no te aroa i te tangata tupu tikai? Te akakite ra ainei tatou i te tu aroa kite? Te akakoromaki ra ainei tatou, i te tiakianga i te tangata kia akarongo mai? Te akamaroiroi ra ainei tatou i te au tangata o te ngutuare kia akakite mai i to ratou manako? Ae, auraka na tatou anake te tuatuaanga, e tuku tatou na te aroa i te tangata tupu ra e akakeu ia tatou kia akarongo atu e kia uriuri i te manako puapinga i te Puka Tapu ma te au tangata ta tatou ka aravei i ta tatou angaanga tutu aere.
15. (a) Eaa i meitaki atu ei te tuatua “tutu ua anga” i to te tuatua “tutu anga tupu ua mai”? (e) Eaa i meitaki ei kia akono i te au tuatau te vai maira no te tutu ua anga?
15 Te matakite ra ainei tatou kia rave i te au tuatau te vai maira no te tutu ua anga? E mea tau kia manakoia e kare teia i te tutu anga tupu ua mai, ma te manakoanga e e angaanga kare i akapapaia me kare e meangiti ua te puapinga. E puapinga maata to te tutu ua anga, e na te aroa no te au tangata e akariro ia tatou kia inangaro e ka oparaia tatou i te reira na te akapapa anga i te tuatau no te reira. Mei teaa ra te putuputu te uua mai i te reira tu tutu anga! Ei akaraanga, iaia i tetai uruoaanga no te au Kite o Iehova i te tokerau o Itaria, kua aere atu tetai taeake ki te karati e tiki i tetai mori ou no tona motoka. Iaia e tiaki ra, kua tutu atu ki te aronga i te pae iaia e kua oronga atura i te aenga pepa no te patianga ia ratou ki te tua o te Puka Tapu i te Tapati. I tetai uruoaanga maata i Roma i te mataiti i muri mai, kua aroa pumaana maira tetai taeake iaia kare roa aia i kite ana. Koai teia taeake? Eaa oki, koia tetai o te aronga tana i oronga atura i te aenga pepa i te karati i te mataiti i mua akera! I aere atu taua tangata ra kia akarongo atu i te tuatua ki te katoatoa ra e kua tuku atu i tona ingoa no tetai apii Puka Tapu. I teianei ko raua ko tona tokorua e nga Kite no Iehova tei akatapuia ra. Kare e ekoko anga e e rave anga puapinga tikai te tutu ua anga!
Kia Tamou te Akonoanga i to te Atua Aroa
16. Eaa te au uianga te ka tau tatou kia ui kia tatou uaorai?
16 E maata tikai ta Iehova akakiteanga i te aroa no tana au mea ora katoa. Mei ta tatou i kite akenei, te oronga maira te au Tuatua Tapu i te au akaraanga meitaki no te aronga tei akono noinoi kore i te au akakiteanga i to te Atua aroa. E mea tau tikai, ta te tata salamo tei akauruia ra i tuatuaʼi: “Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei.” (Salamo 107:8, 15, 21, 31) Ka ariki ainei tatou i to te Atua ra Aroa ua e kare e mou i tona akakoroanga? Auraka rava te reira kia tupu! (2 Korinetia 6:1) No reira e ui tatou tatakitai ia tatou uaorai: ‘Te manako ariki tika nei ainei au i te au akakiteanga i to te Atua ra aroa taku i rekareka ke ana e te manakonako papu nei kia rekareka ua atu no te tuatau ki mua? Te akakeu ainei te reira iaku kia aroa atu ia Iehova ma toku ngakau katoa, toku meta, toku manako, e toku ririnui katoa? Te manako tika ra ainei au i te Atua? Te inangaro ra ainei au i te tuatua tika e te makitakita atu te rave i te kino ra? Te akaari ra ainei au i te aroa taeake? E akapeea te piri vaitata i taku tautaanga i te aaere i to Iesu au tapuae ra i te pae o taku angaanga tutu aere?’
17. Eaa te ka tupu mai me ka akono noinoi kore tatou i te au akakite anga no to te Atua ko Iehova ra aroa?
17 E tika tikai, e manganui te au mataara no te akaari anga i to tatou akameitaki anga papu no te au akakitekite anga ravarai i to te Atua aroa ta tatou i kite ana. Na te akono anga i te au tuatau ravarai kia akaari i te reira manako ariki anga, ka akarekareka tatou i te ngakau o to tatou Metua i te rangi ra, ka riro ei akameitakianga ia etai ke atura, e ka rauka mai te rekareka, te au, e te ngakau pumaana no tatou uaorai. Kia tamou ua atu tatou i te akono noinoi kore i te au akakitekite anga i to te Atua aroa.
Akapeea Koe Me Pau?
◻ Eaa te umuumuia ra kia akono noinoi kore atu i to te Atua ra aroa?
◻ Akapeea tatou i te paruru anga i te au timataanga?
◻ Eaa etai mataara no te akaari i te aroa taeake?
◻ Eaa ta te au akakitekite anga i to Iehova ra aroa te ka akakeu ia tatou kia rave no to tatou au tangata tupu?
[Tutu i te kapi 17]
Ka tau tatou kia maro atu i te au inangaro no te rave i te ara ei kopae i te kino
[Tutu i te kapi 18]
Ka akaari te aronga pakari i te aroa taeake na te aere kapitianga ma etai atu i te angaanga tutu aere i te Patireia
[Tutu i te kapi 19]
Kua akaariu mai a Charles Taze Russell, koia te peretiteni mua o te “Watch Tower Society,” i te au, te rekareka, e te akameitakianga te ka rauka mai mei ko mai i te Atua anake ra